Ekisodo 12:1-51
12 Bjale Jehofa a bolela le Moshe le Arone ba le nageng ya Egepeta a re:
2 “Go tloga gona bjale ngwaga* wa lena o tla thoma ka kgwedi ye.
3 Bolelang le Baisiraele ka moka le re: ‘Ka letšatši la lesome la kgwedi ye, yo mongwe le yo mongwe a tšeele ba lapa la gabo nku, ntlo e nngwe le e nngwe e be le nku.
4 Eupša ge e ba lapa leo e le le lenyenyane gomme le ka se kgone go fetša nku yeo, gona mong wa lapa leo o swanetše go bitša baagišane ba gagwe ka ntlong ya gagwe gomme ba e hlakanele le bona. Ke moka ba arole nku yeo ka palo ya batho bao ba tlago go eja.
5 Le tšee nku e tona ya ngwaga o tee yeo e phetšego gabotse. Ge le sa nyake go tšea nku le ka tšea putšanyane.
6 Le e hlokomele go fihlela ka letšatši la bo-14 la kgwedi ye, gomme lapa le lengwe le le lengwe la setšhabeng sa Isiraele le swanetše go e hlaba mantšiboa pele e eba leswiswi.*
7 Ba tšee a mangwe a madi a yona ba a gaše ka mathokong a mabedi a foreime ya lebati le karolong ya ka godimo ya yona. Ba dire seo dintlong tšeo ba tlago go e jela go tšona.
8 “‘Ba je nama yeo bošegong bjona bjoo. Ba e beše gomme ba e je ka dinkgwa tšeo di se nago komelo gotee le merogo ya go galaka.
9 Le se ke la ja nama yeo e le e tala goba la e fufutša, eupša le e bešeng mollong. Le beše hlogo ya yona e kopantšwe le maoto a yona le dikateng tša yona.
10 Le se ke la šadiša nama le ge e le efe go fihla mesong, eupša ge go ka ba le yeo e šalago go fihla mesong le e fiše mollong.
11 Ge le eja le tleme matheka ka mapanta, le rwale dieta maotong a lena gomme le sware lepara ka seatla, le e je le phakiša. Ke paseka ya Jehofa.
12 Ke tla feta nageng ya Egepeta bošegong bjo gomme ka bolaya ngwana yo mongwe le yo mongwe wa mathomo le leitšibulo la phoofolo e nngwe le e nngwe. Ke tla ahlola medimo ya bona ka moka ka ba ka e otla. Ke nna Jehofa.
13 Madi ao e tla ba leswao dintlong tšeo le lego go tšona gore ge ke a bona ke fete. Ge ke otla Baegepeta lena nka se le otle.
14 “‘Le swanetše go gopola letšatši le, le be le dire monyanya wa go le keteka ngwaga o mongwe le o mongwe gore le tumiše nna Jehofa. Le bana ba bana ba lena, le bona ba le keteke. Wo ke molao wa go ya go ile.
15 Le fetše matšatši a šupago le eja dinkgwa tšeo di se nago komelo. Ka letšatši la pele le lahle folouru yeo e dubilwego yeo e bedilego ka dintlong tša lena. Ka gobane motho le ge e le ofe yo a jago selo seo se nago le komelo, go tloga ka letšatši la pele go fihla ka la bošupa, motho yoo o swanetše go bolawa moo Isiraeleng.
16 Letšatšing la pele le letšatšing la bošupa le kgobokaneng gore le hlankele nna Modimo. Go se be le motho yo a šomago matšatšing ao. Selo setee feela seo le ka se dirago ke go dira dijo, eupša le direng feela tšeo le nyakago go di ja.
17 “‘Le keteke Monyanya wa Dinkgwa tše di sa Omelwago, ka gobane ke tla le ntšha ka moka* nageng ya Egepeta. Le ditlogolo tša lena le tšona di swanetše go dula di keteka monyanya wo, wo ke molao wa go ya go ile.
18 Mantšiboeng a letšatši la bo-14 la kgwedi ya pele, le je dinkgwa tšeo di se nago komelo go ba go fihla mantšiboeng a letšatši la bo-21 la kgwedi yeo.
19 Go fete matšatši a šupago go se na folouru yeo e dubilwego yeo e bedilego ka dintlong tša lena. Ka gobane ge go ka ba le motho le ge e le ofe yo a ka jago selo seo se nago le komelo, motho yoo o swanetše go bolawa setšhabeng sa Isiraele, go sa šetšwe gore ke Moisiraele goba ga se Moisiraele.
20 Le se ke la ja selo le ge e le sefe seo se nago le komelo. Ka dintlong tša lena ka moka le je dinkgwa tšeo di se nago komelo.’”
21 Kapelapela Moshe a bitša banna ba bagolo ba Isiraele gomme a re go bona: “Sepelang le yo tšeela malapa a lena diphoofolo* gore le direng sehlabelo sa Paseka.
22 Le tšeeng ngatana ya semela se se bitšwago hisopo, le e ineng ka mading ao a lego ka sebjaneng gomme le a gašeng karolong ya ka godimo ya foreime ya lebati le ka mathokong a yona a mabedi. Go se ke gwa ba le motho yo a tšwago ka ntlong ya gagwe go ba go fihla mesong.
23 Ke moka e tla re ge Jehofa a feta mo nageng gore a otle Baegepeta gomme ge a bona madi ao a lego karolong ya ka godimo ya foreime ya lebati le mathokong a yona a mabedi, Jehofa o tla feta dintlo tšeo, a ka se otle batho bao ba lego ka dintlong tša lena ka go ba bolaya.
24 “Lena le bana ba lena le keteke monyanya wo. Wo ke molao wa go ya go ile.
25 Ge le fihla nageng yeo Jehofa a tshepišitšego go le fa yona, le keteke monyanya wo.
26 Ge bana ba lena ba le botšiša gore: ‘Ke ka baka la’ng le dira monyanya wo?’
27 Lena le ba arabe le re: ‘Ka gobane re direla Jehofa sehlabelo sa paseka, ka ge a ile a feta ka godimo ga dintlo tša Baisiraele kua Egepeta ge a be a bolaya Baegepeta eupša rena a re phološa.’”
Ke moka batho ba inama, ba khunamela fase.
28 Ka gona Baisiraele ba tloga ba yo dira ka mokgwa wo Jehofa a ba laetšego ka gona a diriša Moshe le Arone. Ba dira feela ka wona mokgwa woo.
29 Ke moka gare ga bošego Jehofa a bolaya ngwana yo mongwe le yo mongwe wa mathomo nageng ya Egepeta, go tloga ka ngwana wa mathomo wa Farao yo a bego a buša, go fihla ka ngwana wa mathomo wa motho yo a thopilwego yo a bego a le teronkong, le leitšibulo la phoofolo e nngwe le e nngwe.
30 Ke moka Farao le bahlanka ba gagwe gotee le Baegepeta ba bangwe ka moka, ba tsoga bošego. Baegepeta ka moka ba be ba lla gabohloko kudu. Ka gobane ntlong e nngwe le e nngwe go be go na le motho yo a hwilego.
31 Kapelapela Farao a bitša Moshe le Arone bjona bošegong bjoo gomme a re go bona: “Sepelang le tloge mo setšhabeng sa ka, lena gotee le Baisiraele ka moka. Le yo hlankela Jehofa bjalo ka ge le boletše.
32 Le tšeeng le diruiwa tša lena ka moka bjalo ka ge le kgopetše gomme le sepele. Le gona le kgopeleng Modimo gore a ntšhegofatše.”
33 Ke moka Baegepeta ba dulela go kgopela Baisiraele gore ba sepele ka pelapela mo nageng. Ba be ba re go bona: “Ge le sa sepele ka moka ga rena re tlo hwa!”
34 Ka gona Baisiraele ba tšea folouru yeo e dubilwego yeo e sego ya tšwa e omelwa. Ba tšea le diaparo tša bona ba phuthela dibjana tša go dubela folouru gomme ba di rwala magetleng a bona.
35 Baisiraele ba dira ka mokgwa wo Moshe a ba boditšego ka gona gomme ba yo kgopela Baegepeta dilo tša silifera, tša gauta gotee le diaparo.
36 Jehofa a dira gore Baegepeta ba bontšhe batho ba gagwe botho, ke moka ba ile ba ba nea dilo tšeo ba di kgopetšego. Baisiraele ba ile ba tšea mahumo a Baegepeta.
37 Baisiraele ba tloga Ramasese ba leba Sukothe, e le banna ba 600 000 (dikete tše makgolotshela) go sa balwe le bana.
38 Batho ba bantšhi bao e bego e se Baisiraele, ba ile ba sepela le bona. Ba ba ba sepela le diruiwa tša bona ka moka tšeo e bego e le tše dintšhi kudu.
39 Ba ile ba tšea folouru yeo e dubilwego yeo ba sepetšego le yona Egepeta ba apea dinkgwa tša nkgokolo tšeo di bego di se tša omelwa. Ba be ba se ba di tšhela komelo ka gobane ba be ba rakilwe Egepeta ka lephakuphaku gomme ga se ba ba le nako ya go itokišetša go sepela le dijo tše dingwe.
40 Mengwaga yeo Baisiraele ba e feditšego ba dula Egepeta, e bile e 430 (makgolonne-masometharo).
41 Mafelelong a mengwaga yeo e 430 (makgolonne-masometharo), batho ba Jehofa ka moka ba ile ba tšwa nageng ya Egepeta.
42 Bošegong bjo ba be ba swanetše go dira monyanya wa gore Jehofa o ba ntšhitše nageng ya Egepeta. Jehofa o be a nyaka gore Baisiraele ka moka ba dule ba dira monyanya wa go gopola bošego bjoo, le ditlogolo tša bona di dule di dira bjalo go ya go ile.
43 Jehofa a re go Moshe le Arone: “Molao wa paseka šo: Motho yo e sego Moisiraele a se ke a ja nama ya Paseka.
44 Eupša ge e ba le na le monna wa lekgoba yoo a rekilwego ka tšhelete, le mmolotše. Ka morago ga moo e tla ba gona a e jago.
45 Motho yo a tšwago nageng e nngwe le motho yo a hirilwego ba se ke ba eja.
46 Batho bao ba lego ka ntlong e tee, ba swanetše go e ja ba le ka moka. Le se ke la ntšha nama le ge e le efe ya yona ka ntlong la e iša lefelong le lengwe ka ntle. Le se ke la roba lerapo le ge e le lefe la yona.
47 Setšhaba ka moka sa Baisiraele se keteke Paseka.
48 Ge e ba motho yo le dulago le yena yo e sego Moisiraele a nyaka go keteka Paseka ya Jehofa, gona le swanetše go bolotša motho yo mongwe le yo mongwe yo motona. Ka morago ga moo, a ka e keteka gomme o tlo swana le Baisiraele. Eupša e se ke ya ketekwa ke monna yo a sa bollago.
49 Molao woo o šoma go Moisiraele le go motho yo e sego Moisiraele.”
50 Ka gona Baisiraele ka moka ba dira ka mokgwa wo Jehofa a laetšego Moshe le Arone. Ba dira feela ka wona mokgwa woo.
51 Letšatšing lona leo, Jehofa o ile a ntšha Baisiraele ka moka* nageng ya Egepeta.
Mengwalo ya tlase
^ Phetolelo ya lentšu ka lentšu e re, “dikgwedi.”
^ Phetolelo ya lentšu ka lentšu e re, “magareng ga mantšiboa a mabedi.”
^ Phetolelo ya lentšu ka lentšu e re, “mašole a lena.”
^ Ke gore, nku e nyenyane goba putšanyana.
^ Phetolelo ya lentšu ka lentšu e re, “o ile a ntšha Baisiraele le mašole a bona.”
