Ekisodo 16:1-36
16 Ka morago Baisiraele ka moka ba tloga Elima gomme mafelelong ba fihla lešokeng la Sini leo le lego magareng ga Elima le Sinai. Ba fihlile moo ka letšatši la lesomehlano la kgwedi ya bobedi ya ka morago ga ge ba tšwile nageng ya Egepeta.
2 Ke moka setšhaba ka moka sa Baisiraele sa thoma go ngongoregela Moshe le Arone lešokeng.
3 Baisiraele ba dulela go ba botša gore: “Na le re tlišitše mo lešokeng gore re tle re hwe ka baka la tlala? Go kaone ge nkabe Jehofa a re bolaetše kua nageng ya Egepeta, ka gobane ge re be re le moo dipitša tša rena di be di tlala dinama, e bile re eja senkgwa re khora.”
4 Ke moka Jehofa a re go Moshe: “Bjale ke dira gore dijo di we go tšwa magodimong go swana le pula, gomme motho yo mongwe le yo mongwe a tšwe letšatši le lengwe le le lengwe a itopele tšeo di mo lekanego. Ke dira se gore ke bone ge e ba Baisiraele ba tla kwa molao wa ka goba ba se o kwe.
5 Ka letšatši la botshelela ba tope dijo tšeo ba tlwaetšego go di topa ka matšatši a mangwe gomme ba di apee, eupša ba di oketše gabedi.”
6 Ka gona Moshe le Arone ba botša Baisiraele ka moka ba re: “Mantšiboa le tla tseba gore Jehofa ke yena a le ntšhitšego nageng ya Egepeta.
7 Mesong le tla bona letago la Jehofa, ka gobane Jehofa o kwele ge le ngongorega ka yena. Rena re bomang le ka ngongoregago ka rena?”
8 Moshe a tšwela pele a re: “Mantšiboa Jehofa o tla le nea nama gore le je gomme mesong a le nea senkgwa gore le je le khore, ka gobane Jehofa o kwele ge le mo ngongoregela. Rena re bomang? Ga le ngongoregele rena, eupša le ngongoregela Jehofa.”
9 Ke moka Moshe a re go Arone: “Botša setšhaba ka moka sa Baisiraele o re: ‘Batamelang pele ga Jehofa, ka gobane o kwele dingongorego tša lena.’”
10 Ke moka ge Arone a fetša go bolela le Baisiraele ka moka, ba retologa ba lebelela thoko ya lešokeng gomme ba bona letago la Jehofa lerung.
11 Jehofa a bolela le Moshe gape a re:
12 “Ke kwele dingongorego tša Baisiraele. Ba botše o re: ‘Mantšiboa pele e eba leswiswi* le tla ja nama gomme mesong la ja senkgwa la khora. Ke moo le tlago go tseba gore ke nna Jehofa Modimo wa lena.’”
13 Mantšiboeng ao, dinonyana* tša tšwelela tša tlala moo Baisiraele ba bego ba dula gona, gomme mesong phoka e be e tletše gohle kgauswi le ditente.
14 Ge phoka yeo e be e tlogile fase, go ile gwa šala mafoforana a manyenyane moo lešokeng, e le a masesenyane go swana le kapoko.
15 Ge Baisiraele ba a bona, ba botšišana ba re: “Ke eng dilo tše?” Ka gobane ba be ba sa a tsebe. Ka gona Moshe a re go bona: “Ke dijo tšeo Jehofa a le neilego tšona.
16 Jehofa o re go lena: ‘Yo mongwe le yo mongwe wa lena a tope tšeo di lekanego mpa ya gagwe. Yo mongwe le yo mongwe a itšeele tšeo di ka lekanago sebjana sa dilithara tše pedi, go ya le ka palo ya batho bao a dulago le bona ka tenteng ya gagwe.’”
17 Baisiraele ba dira bjalo, gomme ba yo di topa. Ba bangwe ba topa tše dintšhi gomme ba bangwe ba topa tše dinyenyane.
18 Ge ba be ba di kala ka sebjana sa dilithara tše pedi, yo a bego a topile tše dintšhi o be a sa fetiše tekanyo gomme yo a bego a topile tše dinyenyane o be a sa hlaetše. Yo mongwe le yo mongwe o be a topile tše di lekanego mpa ya gagwe.
19 Ke moka Moshe a re go bona: “Go se be le yo a šadišago selo go fihla mesong.”
20 Eupša ba se theetše Moshe. Ge batho ba bangwe ba be ba šadiša dijo tše dingwe go fihla mesong, di be di etšwa diboko gomme di nkga. Ke moka Moshe o ile a ba galefela.
21 Ba be ba di topa mesong e mengwe le e mengwe, yo mongwe le yo mongwe a topa tšeo di lekanego mpa ya gagwe. Ge letšatši le fiša di be di tologa.
22 Ka letšatši la botshelela ba be ba topa dijo tšeo ba bego ba tlwaetše go di topa, eupša ba di oketša gabedi. Motho o tee o be a topa dijo tša matšatši a mabedi. Ka gona matona ka moka a setšhaba a tla a begela Moshe taba ye.
23 Ke moka Moshe a re go ona: “Jehofa o boletše a re: ‘Gosasa e tla ba letšatši la go khutša, ka gobane ke sabatha e kgethwa ya Jehofa. Dijo tšeo le ka di apeago, di apeeng, tšeo le ka di fufutšago, di fufutšeng. Tšeo di šetšego, le ipeeleng tšona go fihlela mesong.’”
24 Ka gona ba bea dijo tšeo go fihlela mesong, bjalo ka ge Moshe a ba laetše. Di ile tša se nkge le gona tša se tšwe diboko.
25 Ke moka Moshe a re: “Ejang dijo tšeo, ka gobane lehono ke sabatha ya Jehofa. Le gona, lehono le ka se di hwetše mo fase.
26 Le tlo di topa ka matšatši a tshelelago, eupša ka letšatši la bošupa e lego Sabatha, di ka se be gona.”
27 Eupša batho ba bangwe ba ile ba tšwa ka letšatši la bošupa gore ba yo topa dijo tšeo, eupša ba se hwetše selo.
28 Ka gona Jehofa a re go Moshe: “Le tla gana go boloka ditaelo tša ka le melao ya ka go fihla neng?
29 Le se ke la lebala gore Jehofa o le file Sabatha. Ke ka baka leo a le neago dijo tša matšatši a mabedi ka letšatši la botshelela. Yo mongwe le yo mongwe a dule ka gae. Ka letšatši la bošupa go se be le motho yo a tšwago mo a dulago gona.”
30 Ka gona batho ba khutša ka letšatši la bošupa, ka gobane e be e le Sabatha.
31 Baisiraele ba reela dijo tšeo leina ba re ke “manna.” A be a le bjalo ka peu e tšhweu, gomme tatso ya ona e le bjalo ka dinkgwa tšeo di nago le todi ya dinose.
32 Ke moka Moshe a re: “Jehofa o itše: ‘A tlatšeng sebjana sa dilithara tše pedi le a bee gore ditlogolo tša lena di tle di bone dijo tšeo ke le diretšego tšona lešokeng ge ke be ke le ntšha nageng ya Egepeta.’”
33 Ka gona Moshe a re go Arone: “Tšea pitšana gomme o tšhele manna a go tlala sebjana sa dilithara tše pedi ka go yona, o e bee pele ga Jehofa gore e lotwe go iša melokong ka moka ya lena yeo e tlago go tla.”
34 Arone a e bea pele ga lepokisi la Bohlatse* gore e lotwe, feela bjalo ka ge Jehofa a laetše Moshe.
35 Baisiraele ba jele manna ka mengwaga e 40 go fihlela ba fihla nageng yeo go dulago batho ba ditšhaba tše dingwe. Ba jele manna go fihlela ba fihla mollwaneng wa naga ya Kanana.
36 Baisiraele ba be ba šomiša sebjana sa dilithara tšeo e ka bago tše pedi* goba sa dilithara tšeo e ka bago tše 20* go kala dijo tša bona.
Mengwalo ya tlase
^ Phetolelo ya lentšu ka lentšu e re, “Magareng ga mantšiboa a mabedi.”
^ Phetolelo ya lentšu ka lentšu e re, “dikhwiri.” Khwiri ke nonyana e nyenyane ya go nona.
^ Lentšu “Bohlatse” mo go bonagala le šupa go lepokisi la go bolokela mangwalo a bohlokwa.
^ Phetolelo ya lentšu ka lentšu e re, “omere.” Bona Dit. B14.
^ Phetolelo ya lentšu ka lentšu e re, “efa.” Bona Dit. B14.
