Ekisodo 2:1-25
2 Ka yona nako yeo, monna yo mongwe wa Molefi o ile a nyala mosadi yo mongwe yoo le yena a tšwago lelokong la Lefi.
2 Mosadi yoo a ima gomme a belega ngwana wa mošemane. Ya re ge a bona gore ngwana yoo ke yo mobotse, a mo uta dikgwedi tše tharo.
3 Ge mmagwe a be a se sa kgona go mo uta, o ile a mo direla manki wa mahlaka ao a bitšwago papirase. O ile a o tlotša ka sekontiri le moti, a tsenya ngwana yoo ka gare ga wona gomme a o bea gare ga mahlakanoka kgauswi le Noka ya Nile.
4 Eupša sesi wa gagwe a emela kua kgojana gore a bone seo se tlago go diragalela ngwana yoo.
5 Ge morwedi wa Farao a ile go hlapa Nokeng ya Nile, o ile a bona manki woo gare ga mahlakanoka. Ka nako yeo, bahlokomedi ba gagwe ba basadi ba be ba sepela kgauswi le noka yeo. Kapelapela, morwedi wa Farao a romela lekgoba la gagwe la mosadi gore le yo tšea manki woo.
6 Ge a o bula a bona ngwana wa mošemanyana gomme o be a lla. Ke moka a mo kwela bohloko, eupša a re: “Yo ke yo mongwe wa bana ba Baheberu.”
7 Ka gona, sesi wa ngwana yoo a bolela le morwedi wa Farao a re: “Na ke yo go biletša mosadi yo a amušago go basadi ba Baheberu gore a tle a go amušetše ngwana yo?”
8 Morwedi wa Farao a re go yena: “Ee, eya!” Kapejana mosetsana yoo a yo bitša mmago ngwana yoo.
9 Ke moka morwedi wa Farao a re go mosadi yoo: “Tšea ngwana yo o nkamušetše yena gomme nna ke tla go patela.” Ka gona mosadi yoo a tšea ngwana yoo a yo mo amuša.
10 Ge ngwana yoo a godile, mosadi yoo a mo nea morwedi wa Farao gomme ya ba morwa wa gagwe. A mo reela leina a re ke Moshe* gomme a re: “Ke ka gobane ke mo ntšhitše ka meetseng.”
11 Bjale ge Moshe a godile, o ile a ya go bana babo gomme a bona kamoo ba bego ba šoma boima ka gona. O ile a bona Moegepeta yo mongwe a itia Moheberu, e lego yo mongwe wa bana babo.
12 Ka gona a lebelela ka mathoko ka moka gomme a bona gore ga go na motho yo a mmonago, ke moka a itia Moegepeta yoo a mmolaya a mo epela santeng.
13 Letšatšing le le latelago o ile a ya gape go bana babo, gomme a bona banna ba babedi ba Baheberu ba elwa. Ke moka a re go yoo a nago le molato: “Ke ka baka la’ng o itia ngwaneno?”
14 Yena a re: “Ke mang a go kgethilego gore o re buše e bile o re ahlole? Na o nyaka go mpolaya go swana le ge o bolaile Moegepeta yola?” Bjale Moshe a tšhoga gomme a re: “Go ra gore batho ba tseba taba ye!”
15 Ke moka Farao a kwa ka taba yeo, gomme a leka go bolaya Moshe. Eupša Moshe a tšhabela Farao a yo dula nageng ya Midiane. Ge a fihla moo a dula kgauswi le sediba.
16 Bjale yo mongwe wa baperisita ba Midiane o be a na le barwedi ba šupago, gomme ba tla moo go ga meetse ke moka ba tlatša dilo tšeo diruiwa di nwelago meetse ka go tšona gore ba tle ba nweše diruiwa tša tatago bona meetse.
17 Eupša badiši ba ile ba tla gomme ba ba raka go swana le mehleng. Ge Moshe a bona seo, o ile a ema gomme a namolela basadi bao, a ba a nweša diruiwa tša bona meetse.
18 Bjale ge ba fihla gae, Reguele* tatago bona a ba botšiša a maketše a re: “Go tlile bjang gore lehono le tle gae kapejana?”
19 Ba ile ba mo araba ba re: “Moegepeta yo mongwe o re namoletše go badiši, a re gela meetse a ba a nweša diruiwa tša rena.”
20 Ke moka a re go barwedi ba gagwe: “Bjale monna yoo o kae? Le re’ng le mo tlogetše? Mmitšeng a tle a je le rena.”
21 Ka morago ga moo, Moshe a dumela go tlo dula le Reguele. Ke moka Reguele a nea Moshe Tsipora morwedi wa gagwe gore a mo nyale.
22 Ka morago Tsipora a belega morwa gomme Moshe a mo reela leina a re ke Gerishome,* ka gobane o itše: “Ke dutše nageng yeo e sego ya gešo.”
23 Ka morago ga nako e telele kgoši ya Egepeta ya hwa. Eupša Baisiraele ba tšwela pele ba lla ka baka la ge e le makgoba. Le gona ba be ba dula ba llela Modimo wa nnete gore a ba thuše ka ge ba be ba šoma boima.
24 Mafelelong Modimo a kwa sello sa bona gomme a gopola kgwerano yeo a e dirilego le Aborahama, Isaka le Jakobo.
25 Ka gona Modimo a lebelela Baisiraele, gomme a bona gore ba a tlaišega.
Mengwalo ya tlase
^ Leina le le ra gore, “Go Ntšhwa ka Meetseng.”
^ E lego Jethero.
^ Leina le le ra gore, “Yo a Dutšego Nageng Yeo e Sego ya Gabo.”
