Ekisodo 24:1-18
24 Ke moka Jehofa a re go Moshe: “Rotogela mo thabeng go nna, o tle le Arone, Nadaba, Abihu gotee le banna ba 70 go ba bangwe ba bagolo ba Isiraele, gomme le khuname le sa le kgole.
2 Ke moka Jehofa a tšwela pele a re: “Wena Moshe o batamele o nnoši go nna, eupša bona ba se ke ba batamela, e bile setšhaba se se ke sa tla mo thabeng le wena.”
3 Ke moka Moshe a tla a botša setšhaba dilo ka moka tšeo Jehofa a di boletšego, le dikahlolo tša gagwe ka moka, gomme setšhaba sa bolela ka lentšu letee sa re: “Dilo ka moka tšeo Jehofa a di boletšego re ikemišeditše go di dira.”
4 Ka gona Moshe a ngwala dilo ka moka tšeo Jehofa a di boletšego. Ke moka a tsoga ka masa a aga aletare moo thaba e thomago gona, a hloma le maswika a 12 ao a emelago meloko e 12 ya Isiraele.
5 Ka morago ga moo, a roma masogana a Baisiraele gore a iše dibego tša go fišwa le go hlaba dipoo gore a dire dihlabelo tša go dira khutšo le Jehofa.
6 Moshe a tšea madi ao a a arola ka dikarolo tše pedi tša go lekana. Ke moka a tšea karolo e nngwe a e tšhela ka dibjaneng, gomme karolo e nngwe a e foketša godimo ga aletare.
7 Ke moka a tšea puku yeo e ngwadilwego melao, a e balela setšhaba ka moka se mo theeditše. Sona sa re: “Dilo ka moka tšeo Jehofa a di boletšego re ikemišeditše go di dira gomme re tla di kwa.”
8 Ka gona Moshe a tšea madi ale a lego ka dibjaneng a foketša setšhaba ka ona gomme a re: “Madi a a kgonthišetša kgwerano yeo Jehofa a e dirilego le lena go ya le ka mantšu ka moka ao le sa tšwago go dumelelana le ona.”
9 Moshe, Arone, Nadaba, Abihu gotee le ba bangwe ba banna ba 70 go bagolo ba Isiraele ba rotogela thabeng,
10 gomme ba bona Modimo wa Isiraele. Ka tlase ga maoto a gagwe, go be go na le lebato leo le dirilwego ka maswika ao a bitšwago safire, e bile le kgahliša go swana le leratadima leo le se nago maru.
11 Modimo a se gobatše banna bao ba hlomphegago ba Isiraele, eupša ba ile ba bona Modimo wa nnete ponong gomme ba ja ba ba ba nwa.
12 Bjale Jehofa a re go Moshe: “Etla mo go nna thabeng gomme o dule gona. Ke tla go nea diphaphathi tša maswika gomme godimo ga tšona ke tlo ngwala melao le ditaelo gore ke rute setšhaba.”
13 Ka gona Moshe le Joshua mohlanka wa gagwe ba ema, gomme Moshe a rotogela thabeng ya Modimo wa nnete.
14 Eupša pele a eya thabeng, o be a boditše bagolo bale gore: “Lena re emeleng mo go fihlela re boa. Arone le Huru ba tla šala le lena. Mang le mang yo a nyakago go rarollelwa bothata a ye go bona.”
15 Ke moka Moshe a rotogela thabeng ge leru le dutše le khupetša thaba.
16 Letago la Jehofa la dula Thabeng ya Sinai gomme ya dula e khupeditšwe ke leru ka matšatši a tshelelago. Ka letšatši la bošupa Modimo a bitša Moshe a le lerung.
17 Baisiraele ba bona letago la Jehofa le le bjalo ka mollo o mogolo ntlheng ya thaba.
18 Ke moka Moshe a tsena ka gare ga leru a rotogela godimodimo thabeng. Moshe a dula moo thabeng matšatši a 40 le mašego a 40.
