Ekisodo 25:1-40
25 Ke moka Jehofa a bolela le Moshe a re:
2 “Botša Baisiraele gore ba nntšhetše moneelo. Le amogele moneelo woo go mang le mang yo a ratago go neela.
3 Moneelo wo le tlago go o amogela go bona e be gauta, silifera, koporo,
4 garane e talalerata, wulu ya mmala o mophepolo, lešela le lehwibiduhwibidu, lešela le boletiana la linene, boya bja pudi,
5 matlalo a dinku tše tona ao a tailwego ka mmala o mohwibidu, matlalo a phoofolo,* kota ya mohlare wa mošwana,
6 makhura a mabone, balesamo* ya go dira makhura a makgethwa le seorelo sa go nkga bose,
7 maswika ao a bitšwago onikisi le maswika a mangwe ao a bewago efodeng* le ao a bewago phaphathianeng ya sehubeng.
8 Le ntirele tente e kgethwa yeo le tlago go nthapela go yona.
9 Le direng tente ye e kgethwa le ditlabakelo tša yona le latela tlwaa polane yeo ke tlago go le bontšha yona.
10 “Le dire areka ka kota ya mohlare wa mošwana, botelele bja yona e be mithara o ka bago o tee, bophara bja yona e be disenthimithara tše e ka bago tše 70 gomme botelele bja yona go ya godimo e be disenthimithara tše e ka bago tše 70.*
11 O e pente ka gauta yeo e hlwekilego. O e pente ka ntle le ka gare gomme o dire selo sa go kgabiša ka gauta ke moka o se bee go dikologa areka.
12 O e direle mekgoko e mene ya gauta gomme o e bee ka godimo ga maotwana a yona a mane. Mekgoko e mebedi e be ka lehlakoreng le lengwe la yona gomme e mengwe e mebedi e be ka go le lengwe.
13 O betle dikota tša mohlare wa mošwana gomme o di pente ka gauta.
14 O tsenye dikota tšeo mekgokong yeo e lego ka mahlakoreng a Areka e le gore Areka e tle e rwalwe ka tšona.
15 Dikota tšeo di tsene mekgokong ya Areka. Di se ke tša ntšhwa go yona.
16 Ka Arekeng o tsenye maswika ao a ngwadilwego melao ya ka.*
17 “O dire sekhurumelo sa Areka ka gauta yeo e hlwekilego, e be sa botelele bja mithara o ka bago o tee le bophara bja disenthimithara tše e ka bago tše 70.
18 O dire bakerubi ba babedi ka gauta. O ba bee dintlheng ka mahlakoreng a mabedi a sekhurumelo.
19 Mokerubi yo mongwe o mmee ka ntlheng e nngwe ya sekhurumelo, gomme yo mongwe o mmee ka ntlheng e nngwe.
20 Bakerubi bao ba phurollele maphego a bona godimo, ba šire sekhurumelo ka maphego a bona. Difahlego tša bona di lebane gomme di inamele sekhurumelong.
21 O khurumetše Areka ka sekhurumelo gomme ka Arekeng o tsenye maswika ao a ngwadilwego melao ya ka ao ke tlago go go nea ona.
22 Ke tla iponagatša go wena gona moo gomme ka bolela le wena ke le sekhurumelong, ke tla be ke le magareng ga bakerubi ba babedi bao ba lego Arekeng yeo e nago le maswika ao a ngwadilwego melao ya ka, gomme ke tla go botša dilo ka moka tšeo o swanetšego go di botša Baisiraele.
23 “O dire tafola ka kota ya mohlare wa mošwana, e be ya botelele bja mithara o ka bago o tee le bophara bja disenthimithara tše e ka bago tše 70, gomme botelele bja yona go ya godimo e be disenthimithara tše e ka bago tše 70.
24 O e pente ka gauta yeo e hlwekilego, gomme o dire selo sa go kgabiša ka gauta ke moka o se bee go e dikologa.
25 Tafola yeo o e direle foreimi ya bophara bja go lekana le seatla* gomme o e kgabiše ka gauta go e dikologa.
26 O e direle mekgoko e mene ya gauta gomme o e bee dikhoneng tše nne tša tafola moo maotwana a mane a lego gona.
27 Mekgoko yeo e be kgauswi le foreimi ya tafola gore e thekge dikota tša go rwala tafola.
28 O dire dikota ka mošwana, o di pente ka gauta gomme le rwale tafola yeo ka tšona.
29 “O e direle dikotlelwana, dikomiki, digo le dibjana tšeo le tlago go tšhela dibego tša dino ka go tšona. O di dire ka gauta yeo e hlwekilego.
30 Le gona tafoleng yeo o dule o bea senkgwa seo batho ba se neetšego go nna.
31 “O dire sehlomelamabone ka gauta e tee yeo e hlwekilego. Leotwana la sona, makala a sona, dilo tšeo di hlomelwago go sona, dikgokolwana tša sona le mapolomo a sona di be go sona.
32 Mahlakoreng a sona go be le makala a tshelelago, ka lehlakoreng letee la sona go be le makala a mararo gomme ka go le lengwe go be le makala a mararo.
33 Makala a ka lehlakoreng le lengwe a swanetše go ba le dilo tše tharo tšeo di hlomelwago go sona tšeo di bopegilego bjalo ka mapolomo a mohlare wa moalmonte, gomme dikgokolwana di hlatlagane le mapolomo. Go swanetše go ba bjalo le ka lehlakoreng le lengwe. Makala a tshelelago a sehlomelamabone a be ka mokgwa woo.
34 Sehlomelamaboneng go be le dilo tše nne tšeo di hlomelwago go sona tšeo di bopegilego go swana le mapolomo a mohlare wa moalmonte, gomme dikgokolwana tša gona di hlatlagane le mapolomo.
35 Ka tlase ga makala a mangwe le a mangwe a mabedi go be le kgokolwana. Makala a tshelelago ao a lego sehlomelamaboneng a swanetše go ba ka mokgwa woo.
36 Sehlomelamabone ka moka le dikgokolwana tša sona le makala a sona di dirwe ka gauta yeo e hlwekilego.
37 O direle sehlomelamabone seo mabone a šupago, ge mabone ao a laetilwe a tla bonega lefelong leo le lego pele ga sona.
38 Dithapo tša mabone a sona* le dibjana tša go swara magala di dirwe ka gauta yeo e hlwekilego.
39 Ge o dira sehlomelamabone seo le didirišwa tša sona ka moka, o diriše gauta e hlwekilego ya dikhilograma tše 34.*
40 O netefatše gore o di dira go ya ka polane yeo ke go bontšhitšego yona kua thabeng.
Mengwalo ya tlase
^ Phoofolo yeo go bolelwago ka yona mo ke ya ka meetseng.
^ Bona Tlhaloso ya Mantšu.
^ Bona Dit. B5.
^ Phetolelo ya lentšu ka lentšu e re, “botelele e be moelo wa dikubiti tše pedi le seripa, bophara e be moelo wa kubuti le seripa, botelele bja yona go ya godimo e be moelo wa kubiti le seripa.”
^ Phetolelo ya lentšu ka lentšu e re, “Areka ya Bohlatse.” Bona Tlhaloso ya Mantšu.
^ “Bophara bja seatla” ke mo e ka bago disenthimithara tše 7,4.
^ Goba “dipete.”
^ Phetolelo ya lentšu ka lentšu e re, “talente e tee.” Bona Dit. B14.
