Ekisodo 26:1-37
26 “O dire taberenakele ka mašela a lesome a go dira tente. Mašela ao e be a linene e boletiana, a garane e talalerata le wulu ya mmala o mophepolo gotee le garane e khwibidukhwibidu. Mašela ao le a kgabiše ka go a rokelela diswantšho tša bakerubi.
2 Lešela le lengwe le lengwe la tente e be dimithara tšeo e ka bago tše 12 ka botelele, gomme bophara bja mašela ao e be dimithara tšeo e ka bago tše pedi. Mašela ao ka moka a tente a lekane.
3 Le kopanye mašela a mahlano gomme e be lešela letee le legolo, ao a šetšego a mahlano le ona le a kopanye gotee.
4 Morumong wa lešela le lengwe le lengwe le legolo, le dire mašoba ka garane ya mmala o motalalerata e le gore mašela a a mabedi a magolo a kopane.
5 O dire mašoba a 50 lešeleng letee la tente, le mašoba a 50 morumong wa lešela la tente lehlakoreng le lengwe moo mašela a gahlanago gona, gomme mašoba ao a lebane.
6 O dire dihuku tše 50 tša gauta gomme o kopanye mašela a tente gotee ka dilo tšeo gore di dire taberenakele.
7 “O dire mašela ka boya bja pudi gore a khupetše taberenakele. O dire mašela a tente a 11 a mohuta woo.
8 Lešela le lengwe le le lengwe la tente e be dimithara tše e ka bago tše 13 ka botelele, gomme bophara bja mašela ao e be dimithara tše e ka bago tše pedi. Mašela ao ka moka a 11 a lekane.
9 O kopanye mašela a mahlano ka go a rokelela gotee, o be o kopanye a mangwe a tshelelago ka go a rokelela gotee, gomme lešela la botshelela o le phuthe ka pele ga tente.
10 Mo morumong wa lešela letee la tente o dire mašoba a 50, o a dire lešeleng leo le lego ka mafelelong la mašela ao a rokagantšwego, o dire le mašoba a mangwe a 50 a lešela la tente leo le lego ka lehlakoreng le lengwe moo mašela a kopanago gona.
11 O dire dihuku tše 50 tša koporo, gomme o di tsenye mašobeng ke moka o kopanye tente gore e be selo setee seo se tlago go khupetša taberenakele.
12 Go tlo ba le karolo ya lešela la tente leo le šetšego ka morago ga taberenakele, o tlogele lešela leo le lekeletše.
13 Mašela ao a šetšego a tente a lekelele ka mahlakoreng a mabedi a taberenakele. Lehlakoreng le lengwe le le lengwe go lekelele disenthimithara tše e ka bago tše 45, e le gore a khupetše taberenakele.
14 “O dire selo seo se ka khupetšago tente ka matlalo a dinku tše tona ao a tailwego ka mmala o mokhwibidu, o dire le se sengwe ka matlalo a boleta a phoofolo ya ka meetseng seo o tlago go se bea ka godimodimo.
15 “O direle taberenakele diforeime ka kota ya mošwana, o dire gore di eme thwii.
16 Foreime e tee e be dimithara tšeo e ka bago tše nne ka botelele, gomme bophara bja foreime e nngwe le e nngwe e be disenthimithara tšeo e ka bago tše 67.
17 Foreime e nngwe le e nngwe e be le dintlha tše pedi tša go e swaraganya. Diforeime ka moka tša taberenakele o swanetše go di dira ka mokgwa wo.
18 O direle taberenakele diforeime tše 20, gomme o di bee ka lehlakoreng la ka borwa la taberenakele.
19 “Ka tlase ga diforeime tšeo tše 20 o bee maotwana a silifera a 40 ao a nago le mašoba, gomme ka tlase ga foreime e nngwe le e nngwe ka go latelana ga tšona go be le maotwana a mabedi ao a nago le mašoba a mabedi gotee le dintlha tša yona tše pedi.
20 Ka lehlakoreng le lengwe la taberenakele, e lego lehlakoreng la ka leboa, go be le diforeime tše 20,
21 le maotwana a tšona a silifera a 40 ao a nago le mašoba. Ka tlase ga foreime e nngwe le e nngwe go be le maotwana a mabedi ao ka moka ga ona a nago le mašoba.
22 Ka thoko ya bodikela ya taberenakele, o dire diforeime tše tshelelago gomme o di bee ka morago ga taberenakele.
23 Dikarolong tše pedi tša ka morago tša taberenakele o dire diforeime tše pedi tšeo e tlago go ba dikhona tša yona.
24 Foreime yeo e be le dikota tše pedi tšeo di tlogago fase di eya godimo. Dikota tšeo di kopanywe mokgokong wa pele.
25 Le gona go be le diforeime tše seswai le maotwana a tšona a 16 a silifera ao a nago le mašoba. Ka tlase ga foreime e nngwe le e nngwe go be le maotwana a mabedi ao ka moka ga ona a nago le mašoba.
26 “O dire dikota ka mohlare wa mošwana, dikota tše hlano di be diforeimeng tša ka lehlakoreng letee la taberenakele,
27 dikota tše dingwe tše hlano di be diforeimeng tša ka lehlakoreng le lengwe la taberenakele, gomme tše dingwe tše hlano di be diforeimeng tša ka lehlakoreng la ka morago la taberenakele go ya ka bodikela.
28 Kota yeo e lego gare ga diforeime e tloge thokong e nngwe e fihle thokong e nngwe.
29 “O pente diforeime tšeo ka gauta, o di direle mekgoko ya gauta yeo e tsenyago dikota, o pente dikota tšeo ka gauta.
30 O dire taberenakele go ya ka polane ye ke go bontšhitšego yona thabeng.
31 “O dire gareteine ka garane e talalerata, wulu yeo e tailwego ka mmala o mophepholo, garane e khwibidukhwibidu le linene e boletiana. Gareteine ye e kgabišwe ka go rokelelwa diswantšho tša bakerubi.
32 O e fege godimo ga diphilara tše nne tša dikota tša mošwana tšeo di pentilwego ka gauta. Dihuku tša tšona e be tša gauta. Diphilara tšeo di be godimo ga maotwana a mane a silifera ao a nago le mašoba.
33 O fege gareteine yeo diphilareng tše nne ka dihuku, gomme o tsenye Areka yeo e nago le maswika ao a ngwadilwego melao ya ka ka Sekgethwakgethweng. Gareteine yeo e aroganye Sekgethwa le Sekgethwakgethwa.
34 O khurumele Areka yeo e nago le maswika ao a ngwadilwego melao ya ka yeo e lego ka Sekgethwakgethweng.
35 “O bee tafola ka ntle ga Sekgethwakgethwa* ka lehlakoreng la ka leboa, gomme sehlomelamabone o se bee go lebana le tafola ka lehlakoreng la ka borwa la taberenakele.
36 Mojakong wa tente o dire gareteine ka garane e talalerata, wulu ya mmala o mophepolo, garane e khwibidukhwibidu le linene e boletiana.
37 O direle gareteine yeo diphilara tše hlano ka dikota tša mošwana gomme dikota tšeo o di pente ka gauta. Dihuku tša yona e be tša gauta, diphilara tšeo o di direle maotwana a mahlano a koporo ao a nago le mašoba.
Mengwalo ya tlase
^ Phetolelo ya lentšu ka lentšu e re, “gareteine.”
