Ekisodo 29:1-46
29 “Seo o tlago go se dira ge o kgethagatša Arone le barwa ba gagwe gore e be baperisita ba ka ke se: Tšea powana le dinku tše pedi tše tona tšeo di phetšego gabotse,
2 senkgwa seo se se nago komelo, dinkgwa tša nkgokolo tšeo di se nago komelo tšeo di dirilwego ka folouru yeo e tšhetšwego makhura gotee le diphaphatha tšeo di se nago komelo tšeo di tloditšwego ka makhura. O di dire ka folouru ya korong yeo e šitšwego gabotse.
3 O di tsenye ka manking gomme o di tliše di le ka go wona, o tliše le poo le dinku tše pedi tše tona.
4 “O tliše Arone le barwa ba gagwe mojakong wa taberenakele gomme o ba hlapiše ka meetse.
5 Ke moka o apeše Arone diaparo, e lego seaparo sa sekotšho, seaparo sa go hloka matsogo seo se aparwago ka tlase ga efoda, phaphathiana ya sehubeng yeo e nago le maswikana gotee le efoda, gomme o tlemelele efoda ka lepanta lethekeng la gagwe.
6 O mmofe tuku hlogong gomme o bee tšhipi e kgethwa* ya gauta moo tukung.
7 O tšee makhura a go tlotša motho ge a kgethwa o a tšhele hlogong ya gagwe gomme o mo tlotše.
8 “Ke moka o batametše barwa ba gagwe go nna gomme o ba apeše diaparo.
9 O tleme Arone le barwa ba gagwe ka mapanta, o be o ba bofe ka dituku, e be baperisita. Wo ke molao wa ka go ya go ile. Se ke seo o swanetšego go se dira ge o bea Arone le barwa ba gagwe gore e be baperisita.
10 “Ke moka o tliše poo pele ga taberenakele, Arone le barwa ba gagwe ba bee diatla tša bona hlogong ya yona.
11 O hlabe poo yeo pele ga ka nna Jehofa, mojakong wa taberenakele.
12 O tšee a mangwe a madi a poo yeo o a rothetše manakeng a aletare ka monwana wa gago. Madi ka moka ao a šetšego o a tšhollele fase kgauswi le aletare.
13 O tšee makhura ka moka ao a khupeditšego mala le ao a lego sebeteng, o tšee le dipshio tše pedi gotee le makhura ao a lego go tšona gomme o di fiše aletareng gore di thunye muši.
14 Eupša nama ya poo yeo, letlalo la yona gotee le ditšhila tša yona tšeo di lego ka maleng* o di fišetše ka ntle ga ditente. Ke sebego sa sebe.
15 “Ke moka o tšee e nngwe ya dinku tšela tše tona gomme Arone le barwa ba gagwe ba bee diatla tša bona hlogong ya yona.
16 O hlabe nku yeo ke moka o tšee madi a yona o a foketše mahlakoreng ka moka a aletare.
17 O ripaganye nku yeo, o hlatswe mala a yona le maoto a yona gomme o bee ditho tša yona ka go latelana le hlogo ya yona.
18 O fiše nku yeo ka moka aletareng. Ke sebego sa go fišwa seo se nkgago bose seo se diretšwego nna Jehofa. Ke sebego seo se fišeditšwego nna Jehofa.
19 “Ke moka o tšee nku yela e nngwe gomme Arone le barwa ba gagwe ba bee diatla tša bona hlogong ya yona.
20 O hlabe nku yeo, gomme o tšee madi a mangwe a yona o a tlotše karolong e boletiana ya tsebe ya le letona ya Arone le karolong e boletiana ya ditsebe tša le letona tša barwa ba gagwe. Le gona o a tlotše menwaneng e megolo ya diatla tša bona le menwaneng e megolo ya dinao tša bona tša le letona gomme o foketše madi ao ka mahlakoreng ka moka a aletare.
21 Ke moka o tšee a mangwe a madi ao a lego aletareng le a mangwe a makhura a go tlotša motho ge a kgethwa gomme o a foketše Arone le diaparo tša gagwe le barwa ba gagwe gotee le diaparo tša bona, e le gore yena le barwa ba gagwe e be ba bakgethwa, le gore diaparo tša gagwe le tša barwa ba gagwe le tšona e be tše kgethwa.
22 “Mo nkung yeo o tšee makhura, mosela o nonnego, makhura ao a khupeditšego mala, makhura ao a lego sebeteng, dipshio tše pedi gotee le makhura a tšona le leoto la le letona, ka gobane nku yeo ke ya ge motho a bewa go ba moperisita.
23 O tšee le senkgwa sa nkgokolo seo folouru ya sona yeo e dubilwego e tšhetšwego makhura, o tšee le sephaphatha ka manking wa dinkgwa tšeo di se nago komelo woo o lego pele ga ka, nna Jehofa.
24 Ka moka ga tšona o di bee diatleng tša Arone le diatleng tša barwa ba gagwe, o iše diatla tša bona pele le morago gore ba tšokotše sebego sa go tšokotšwa pele ga ka, nna Jehofa.
25 O tšee dinkgwa tšeo diatleng tša bona gomme o di fiše aletareng godimo ga nku yela ya mathomo yeo e bego e neetšwe e le sebego sa go fišwa, e le gore di ntirele monkgo o mobose, nna Jehofa. Ke sebego seo se fišeditšwego nna Jehofa.
26 “O tšee sehuba* sa nku ya ge Arone a kgethwa go ba moperisita, o se tšokoletše pele le morago gomme e be sebego sa go tšokotšwa pele ga ka, nna Jehofa. Ka morago ga moo e tla ba sa gago.
27 O kgethe sehuba sa sebego sa go tšokotšwa gore e be sa baperisita, o kgethe le leoto la sebego se sekgethwa sa go tšokotšwa. Sehuba seo le leoto leo di tšwa nkung e tona yeo go neetšwego ka yona le yeo go dirilwego sehlabelo ka yona ge Arone le barwa ba gagwe ba be ba bewa go ba baperisita.
28 Sehuba seo le leoto leo e be tša Arone le barwa ba gagwe, wo ke molao wa go ya go ile wo Baisiraele ba swanetšego go o phetha, ka gobane dilo tšeo ke sebego se sekgethwa. E tla ba sebego sa bona se sekgethwa seo ba swanetšego go se nea nna Jehofa go tšwa dihlabelong tša bona tša go dira khutšo le nna.
29 “Diaparo tše kgethwa tša Arone di tla fiwa barwa ba gagwe ka morago ga gore a hlokofale gore ba di apare ge ba tlotšwa le ge ba bewa go ba baperisita.
30 Morwa wa gagwe yo a tlago go kgethwa gore a mo latele gore e be moperisita, le yo a tsenago ka taberenakeleng gore a hlankele lefelong le lekgethwa o tla di apara ka matšatši a šupago.
31 “O tšee nku e tona ya ge motho a bewa go ba moperisita gomme o fufutše nama ya yona lefelong le lekgethwa.
32 Arone le barwa ba gagwe ba je nama ya nku yeo le senkgwa seo se lego ka manking seo se lego mojakong wa taberenakele.
33 Ba je dilo tšeo di dirišitšwego go dira sehlabelo sa gore ba lebalelwe dibe, gore ba bewe go ba baperisita le gore ba kgethagatšwe. Eupša motho yo e sego moperisita* a se ke a di ja ka gobane ke dilo tše kgethwa.
34 Ge e ba senkgwa le nama le ge e le efe ya sehlabelo sa ge motho a bewa go ba moperisita di ka šala go fihla mesong, gona o di fiše. Di se ke tša jewa ka gobane ke dilo tše kgethwa.
35 “O dire dilo tše ka moka ge o bea Arone le barwa ba gagwe gore e be baperisita, o di dire go ya le ka mokgwa wo ke go boditšego ka gona. O fetše matšatši a šupago o ba bea go ba baperisita.
36 Letšatši le letšatši o hlabe poo e le sehlabelo gore Modimo a ba lebalele dibe le gore aletare e be e kgethwa. O foketše makhura godimo ga aletare yeo go bontšha gore ke e kgethwa.
37 O fetše matšatši a šupago o dira dihlabelo tša go dira gore aletare e be e kgethwa, le gona o e neele go Modimo gore e be e kgethwakgethwa. Aletare yeo e kgwathwe feela ke motho yo e lego yo mokgethwa.
38 “Dilo tšeo o tlago go di neela aletareng ke tše: Dinku tše tona tšeo di nago le ngwaga o tee, o dule o hlaba tše pedi ka letšatši.
39 O hlabe nku e nngwe mesong gomme e nngwe o e hlabe mantšiboa pele e eba leswiswi.*
40 Nku yela ya mathomo o e neele le folouru yeo e šitšwego gabotse ya dilithara tše e ka bago tše pedi* le makhura a mohlware ao e ka bago lithara gotee le sebego sa dino sa beine yeo e ka bago lithara.
41 O hlabe nku yela ya bobedi mantšiboa pele e eba leswiswi. O tliše folouru le sebego sa dino tša go swana le tšeo o di tlišitšego mesong. O di fišetše nna Jehofa gore monkgo wa tšona o bose o nthabiše.
42 Le duleng le dira sehlabelo se melokong ka moka ya lena, le se dira mojakong wa taberenakele, pele ga ka nna Jehofa, moo ke tlago go iponagatša go lena batho ba ka gore ke bolele le wena Moshe ke le moo.
43 “Ke tla iponagatša go Baisiraele moo, gomme matla a ka a tla dira gore lefelo leo e be le lekgethwa.
44 Ke tla kgethagatša taberenakele gomme ka dira gore Arone le barwa ba gagwe e be ba bakgethwa gore e be baperisita ba ka.
45 Ke tla dula gare ga Baisiraele gomme ka ba Modimo wa bona.
46 Ruri ba tla tseba gore ke nna Jehofa Modimo wa bona yo a ba ntšhitšego nageng ya Egepeta gore ke dule gare ga bona. Ke nna Jehofa Modimo wa bona.
Mengwalo ya tlase
^ Goba “seka se sekgethwa sa go bontšha gore Arone o ineetše go Modimo.”
^ Goba “mošwang.”
^ Goba “kgara.”
^ Ke gore, “motho yo e sego wa lapa la Arone.”
^ Phetolelo ya lentšu ka lentšu e re, “magareng ga mantšiboa a mabedi.”
^ Phetolelo ya lentšu ka lentšu e re, “karolo ya lesome ya efa.” Bona Dit. B14.
