Ekisodo 31:1-18
31 Jehofa a tšwela pele a bolela le Moshe a re:
2 “Tseba gore ke kgethile Betsalele morwa wa Uri, e lego morwa wa Huru, wa moloko wa Juda.
3 Ke tla mo nea moya wa ka,* gore a be le bohlale, kwešišo, tsebo le bokgoni bja go dira mošomo o mongwe le o mongwe wa diatla,
4 gore a dire dilo tše dibotse tša go kgabiša, a šome ka gauta, silifera le koporo,
5 a betle maswika le go a direla moo a tlago go tsenywa gona le go šoma ka kota go betla dilo tša mehuta ka moka.
6 Tseba gore ke kgethile Oholiaba morwa wa Ahisamake wa moloko wa Dani gore a mo thuše, gomme ke tla dira gore bašomi ka moka bao ba nago le bokgoni ba be le bohlale bja go dira dilo ka moka tšeo ke go laetšego tšona, e lego
7 taberenakele, areka yeo e nago le maswika ao a ngwadilego melao ya ka, sekhurumelo seo se lego godimo ga yona, dibjana ka moka tša ka taberenakeleng,
8 tafola le dibjana tša yona, sehlomelamabone sa gauta yeo e hlwekilego le didirišwa tša sona ka moka, aletare ya diorelo,
9 aletare ya sebego sa go fišwa le dibjana tša yona ka moka, sekotlelo sa go hlapela le selo seo se bewago godimo ga sona,
10 diaparo tšeo di logilwego gabotse, diaparo tše kgethwa tša moperisita Arone, diaparo tša barwa ba gagwe tša boprista,
11 makhura a go tlotša motho ge a kgethwa le diorelo tša go nkga bose tša lefelong le lekgethwa. Ba dire dilo ka moka go ya kamoo ke go laetšego ka gona.”
12 Jehofa a tšwela pele a re go Moshe:
13 “Bolela le Baisiraele o re: ‘Sa bohlokwa kudu ke gore le boloke disabatha tša ka, ka gobane ke seka sa kgwerano yeo ke e dirilego le lena melokong ya lena ka moka e le gore le tsebe gore nna Jehofa ke le kgethile gore le be setšhaba sa ka seo se kgethegilego.
14 Le boloke sabatha ka gobane ke letšatši le lekgethwa go lena. Motho yo a sa latelego molao wa sabatha a bolawe. Le gona ge go ka ba le yo a šomago ka letšatši leo, motho yoo a bolawe.
15 Le šome ka matšatši a tshelelago eupša ka letšatši la bošupa ke sabatha, e lego letšatši la go khutša. Ke letšatši le lekgethwa go nna Jehofa. Motho le ge e le ofe yo a šomago ka letšatši la sabatha a bolawe.
16 Baisiraele ba boloke sabatha melokong ya bona ka moka. Ke kgwerano ya go ya go ile.
17 Sabatha ke seka seo se tlago go dula se le gona magareng ga ka le Baisiraele, ka gobane nna Jehofa ke dirile magodimo le lefase ka matšatši a tshelelago gomme ka letšatši la bošupa ka khutša ke thabišitšwe ke mošomo wa ka.’”
18 Ge Modimo a fetša go bolela le Moshe Thabeng ya Sinai, o ile a mo nea maswika a mabedi ao a ngwadilwego melao ya gagwe, e lego maswika ao Modimo a a ngwadilego ka seatla sa gagwe.*
Mengwalo ya tlase
^ Phetolelo ya lentšu ka lentšu e re, “moya wa Modimo.”
^ Phetolelo ya lentšu ka lentšu e re, “monwana wa gagwe.”
