Ekisodo 33:1-23
33 Jehofa a tšwela pele a re go Moshe: “Tloga mo o sepele le setšhaba se o se etilego pele wa se ntšha nageng ya Egepeta, gomme le ye nageng yeo ke e enetšego Aborahama, Isaka le Jakobo ka re: ‘Ke tla e nea bana ba lena.’
2 Ke tla roma morongwa a le ete pele gomme ka raka Bakanana, Baamore, Bahethe, Baperetse, Bahefe le Bajebusi.
3 Eyang nageng yeo e elago maswi le todi ya dinose. Eupša nka se sepele le lena, ka ge le le setšhaba sa dihlogo tše thata, ka gore nka tla ka le fediša mo tseleng.”
4 Ge batho ba ekwa mantšu ao a kwešago bohloko, ba lla kudu gomme ga go le o tee go bona yoo a ilego a rwala dilo tša go ikgabiša.
5 Jehofa a re go Moshe: “Botša Baisiraele o re: ‘Le setšhaba sa dihlogo tše thata. Ge nka tla go lena ka motsotsonyana ke tla le fediša. Bjale le se ke la rwala dilo tša go ikgabiša ge ke dutše ke sa nagana gore ke tla dira eng ka lena.’”
6 Bjale go tloga Thabeng ya Horebe go ya pele, Baisiraele ba ile ba se sa rwala dilo tša bona tša go ikgabiša.
7 Moshe yena a tšea tente ya gagwe a e hloma ka ntle ga ditente, kgole le ditente tše dingwe, gomme a e bitša gore ke tente ya go kopana. Motho yo mongwe le yo mongwe yo a bego a nyaka go botšiša Jehofa o be a eya moo tenteng ya go kopana yeo e bego e le kgole le ditente tše dingwe.
8 E be e re ge Moshe a eya tenteng yeo, batho ka moka ba be ba ema mejakong ya ditente tša bona, ke moka ba lebelela Moshe go fihlela a tsena ka tenteng.
9 Ke moka ge Moshe a tsena ka moo tenteng, leru le be le theoga gomme le ema mojakong wa tente ke moka Modimo a bolela le yena.
10 Ge batho ka moka ba bona leru leo le eme mojakong wa tente, ba be ba ema gomme yo mongwe le yo mongwe a khunama a le mojakong wa tente ya gagwe.
11 Jehofa a bolela le Moshe ba lebantše difahlego, go no swana le ge motho a bolela le motho yo mongwe. Ge Moshe a be a boela ditenteng, Joshua morwa wa Nuni yo e bego e le mohlanka wa gagwe e bile a mo thuša, o be a sa tloge tenteng yeo.
12 Bjale Moshe a re go Jehofa: “Wena o re go nna: ‘Etelela setšhaba se pele o sepele,’ eupša ga se wa mpotša motho yo o tlago go nthoma le yena. E bile wena o itše: ‘Ke go tseba gabotse,* le gona ke a go amogela.’
13 Bjale ge e ba o nkamogela, hle ntsebiše gore o Modimo wa mohuta mang, ka gobane ke nyaka go go tseba e bile o tšwele pele o nkamogela. Le gona o se ke wa lebala gore setšhaba se ke batho ba gago.”
14 Ka gona Modimo a re: “Nna ke tla sepela le wena gomme ka go nea khutšo.”
15 Ke moka Moshe a re go yena: “Ge e ba o sa sepele le rena, gona o se ke wa dira gore re tloge mo lefelong le.
16 Bjale batho ba tlo tseba bjang gore o amogela nna le setšhaba sa gago? Ge e ba o ka sepela le rena, gona nna le setšhaba sa gago re tla be re kgethilwe gare ga ditšhaba tše dingwe ka moka mo lefaseng.”
17 Jehofa a tšwela pele a re go Moshe: “Le sona se o se kgopetšego ke tla se dira, ka gobane ke a go amogela e bile ke go tseba gabotse.”
18 Ke moka Moshe a re go Modimo: “Hle dira gore ke bone letago la gago.”
19 Eupša Modimo a re: “Ke tla feta pele ga gago gomme ka dira gore o bone botho bja ka ka moka, ke tla go tsebiša leina la ka, nna Jehofa, gomme ka šokela yo ke mo šokelago le go gaugela yo ke mo gaugelago.”
20 Modimo a oketša ka gore: “O ka se kgone go bona sefahlego sa ka ka gobane ga go na motho yo a ka mponago gomme a phela.”
21 Jehofa a tšwela pele a re: “Lefelo šele mo kgauswi le nna, dula leswikeng leo le lego moo.
22 E tla re ge ke feta gomme ke bonagatša letago la ka, ka go bea leweng la leswika ke moka ka go šira ka seatla sa ka go ba go fihlela ke fetile.
23 Ka morago ga moo ke tla tloša seatla sa ka gomme o tla mpona ka mo morago. Eupša o ka se bone sefahlego sa ka.”
Mengwalo ya tlase
^ Phetolelo ya lentšu ka lentšu e re, “ke go tseba ka leina.”
