Ekisodo 35:1-35
35 Ka morago Moshe a kgobokanya Baisiraele ka moka gomme a re go bona: “Dilo tšeo Jehofa a re laetšego gore re di dire ke tše:
2 Le ka šoma ka matšatši a tshelelago, eupša letšatši la bošupa e be le lekgethwa go lena. E tla ba letšatši la sabatha, e lego letšatši la go khutša le lekgethwa go Jehofa. Motho le ge e le ofe yo a šomago ka letšatši leo, a bolawe.
3 Ka letšatši la Sabatha, le se ke la gotša mollo mafelong ao le dulago go ona.”
4 Ke moka, Moshe a bolela le Baisiraele ka moka a re: “Jehofa o itše:
5 ‘Ntšhetšang nna Jehofa moneelo. Anke yo mongwe le yo mongwe a ntšhetše Jehofa moneelo ka go rata go tšwa pelong. A tliše gauta, silifera, koporo,
6 garane e talalerata, wulu ya mmala o mophepolo, lešela le lekhwibidukhwibidu, linene e boletiana, boya bja pudi,
7 matlalo a dinku tše tona ao a tailwego ka mmala o mohwibidu, matlalo a boleta a phoofolo ya ka meetseng, kota ya mošwana,
8 makhura a mabone, balesamo ya go dira makhura a go tlotša motho ge a kgethwa le a go dira seorelo sa go nkga bose,
9 maswika ao a bitšwago onikisi le maswikana ao a bewago efodeng le phaphathianeng ya sehubeng.
10 “‘Anke batho ka moka bao ba tsebago mešomo ya diatla mo go lena, ba tle ba dire dilo ka moka tšeo Jehofa a laetšego gore di dirwe.
11 Ba dire taberenakele le tente ya yona le sekhurumelo sa yona, mašoba a yona, diforeime tša yona tša kota, dikota tša yona, diphilara tša yona, maotwana a yona ao a nago le mašoba,
12 Areka le dikota tša yona, sekhurumelo le gareteine ya go e šira gore e se ke ya bonagala.
13 Tafola le dikota tša yona, dibjana tša yona ka moka le senkgwa seo se neelwago Modimo.
14 Sehlomelamabone le didirišwa tša sona, mabone a sona le makhura a go laeta mabone.
15 Aletare ya diorelo le dikota tša yona, makhura a go tlotša motho ge a kgethwa le seorelo sa go nkga bose le gareteine ya mojako wa taberenakele.
16 Aletare ya sebego sa go fišwa le sefo ya yona ya koporo, dikota tša yona le dibjana tša yona ka moka, sekotlelo sa go hlapela le selo seo se bewago godimo ga sona.
17 Digareteine tša lapa, diphilara tša lona, maotwana a lona ao a nago le mašoba le gareteine ya mojako wa lapa.
18 Dipikiri tša tente ya taberenakele, dipikiri tšeo di tlago go šomišwa go dira lapa le dithapo tša tšona.
19 Diaparo tše di rokilwego gabotse tša go hlankela ka sekgethweng, diaparo tše kgethwa tša moperisita Arone le diaparo tša barwa ba gagwe tša boperisita.’”
20 Ka gona, ge Moshe a fetša go bolela, Baisiraele ka moka ba ile ba phatlalala.
21 Ke moka yo mongwe le yo mongwe yoo a bego a nyaka go thuša o ile a ntšhetša Jehofa moneelo go tšwa pelong, e lego moneelo woo o bego o tlo šomišwa ka tenteng ya go kopana, le dilong ka moka tšeo di bego di tlo dirišwa go hlankela Modimo le go dira diaparo tše kgethwa.
22 Banna le basadi ba tla ba sa kgaotše, gwa tla yo mongwe le yo mongwe yo a ratago go neela go tšwa pelong. Ba tliša dipelete, mangina, dipalamonwana, dilo tša go ikgabiša le dilo ka moka tša mehutahuta tša gauta. Ka moka ga bona ba tlišetša Jehofa meneelo ya gauta.
23 Le batho ka moka bao ba bego ba na le garane e talalerata, wulu ya mmala o mophepolo, lešela le le khwibidukhwibidu, linene e boletiana, boya bja pudi, matlalo a dinku tše tona ao a tailwego ka mmala o mohwibidu le matlalo a boleta a phoofolo ya ka meetseng. Ba ile ba neela ka tšona.
24 Batho ka moka bao ba bego ba nyaka go neela ka silifera le koporo, ba ile ba ntšhetša Jehofa moneelo. Le batho ka moka bao ba bego ba na le kota ya mošwana yeo e bego e tlo šomišwa mošomong le ge e le ofe wa ka taberenakeleng, ba ile ba e tliša.
25 Basadi ka moka bao ba bego ba kgona go dira garane le dithapo, ba ile ba tliša dilo ka moka tšeo ba di dirilego, e lego garane e talalerata, wulu ya mmala o mophepolo, garane e khwibidukhwibidu le linene e boletiana.
26 Basadi ka moka bao ba bego ba rata go neela go tšwa pelong, ba ile ba dira garane le wulu ka boya bja pudi.
27 Matona a tliša maswika ao a bitšwago onikisi le maswikana ao a bewago efodeng le phaphathianeng ya sehubeng,
28 balesamo, makhura a go laeta mabone le makhura a go tlotša motho ge a kgethwa le a seorelo sa go nkga bose.
29 Banna ka moka le basadi ba Baisiraele ba ile ba neela Jehofa dimpho ka go rata go tšwa pelong. Ba ile ba tliša dimpho tšeo go thekga mošomo woo Jehofa a bego a laetše Moshe gore a ba botše gore ba o dire.
30 Ke moka Moshe a re go Baisiraele: “Tsebang gore Jehofa o kgethile Betsalele morwa wa Uri, e lego morwa wa Huru wa moloko wa Juda.
31 Modimo o neile Betsalele moya wa gagwe gore a be le bohlale, kwešišo, tsebo le bokgoni bja go dira mošomo o mongwe le o mongwe wa diatla,
32 gore a dire dilo tše dibotse tša go kgabiša, a šome ka gauta, silifera le koporo.
33 A betle maswika le go a direla moo a tlago go tsenywa gona le go šoma ka kota go betla dilo tša mehutahuta.
34 Modimo o dirile gore Betsalele le Oholiaba morwa wa Ahisamake wa moloko wa Dani, ba be le bokgoni bja go ruta.
35 O ba file bokgoni bja go kgabiša, go loga ka garane e talalerata, wulu ya mmala o mophepolo, garane e khwibidukhwibidu, linene e boletiana, le go dira mešomo e mengwe ka moka ya diatla. Banna ba ba tla dira mešomo ka moka le go hlama dilo tša mehutahuta.
