Ekisodo 36:1-38
36 “Betsalele, Oholiaba le banna ka moka bao ba nago le bokgoni ba tla dira dilo ka moka tša ka tenteng ya go hlankela Modimo bjalo ka ge Jehofa a ba laetše. Jehofa o ba file bohlale le bokgoni bja go dira dilo tše gabotse.”
2 Ke moka Moshe a bitša Betsalele, Oholiaba le banna ka moka bao ba nago le bokgoni bao Jehofa a ba neilego bohlale, e lego batho ka moka bao ba bego ba ithaopetše go šoma ka go rata.
3 Ke moka ba tšea moneelo ka moka woo Baisiraele ba bego ba o tlišitše go Moshe gore go dirwe dilo tša ka tenteng ya go hlankela Modimo. Ge e le Baisiraele bona, mesong e mengwe le e mengwe ba be ba sa tšwela pele ba tliša dimpho tšeo ba di ntšhago ka go rata.
4 Banna ka moka bao ba bego ba na le bokgoni bao ba bego ba dira modiro tenteng ya go hlankela Modimo, ba thoma go tla ka go latelana,
5 gomme ba re go Moshe: “Batho ba tliša dilo tše dintšhi go feta tšeo di nyakegago bakeng sa mošomo wo Jehofa a laetšego gore o dirwe.”
6 Ka gona Moshe a laela gore ba iše tsebišo ditenteng, gomme ba botše batho ba re: “Le se sa hlwa le tliša moneelo le dilo tše dingwe gore go agwe taberenakele.” Ka gona batho ba emišwa gore ba se sa tliša dilo tše dingwe.
7 Dilo ka moka di be di lekane go dira mošomo wo o bego o swanetše go dirwa, e bile e le tše dintšhi kudu.
8 Ka gona batho ka moka bao ba nago le bokgoni ba dira taberenakele ka mašela a lesome a linene e boletiana, garane e talalerata, wulu ya mmala o mophepholo le garane e khwibidukhwibidu. Ke moka Betsalele a kgabiša mašela ao ka go rokelela diswantšho tša bakerubi.
9 Lešela le lengwe le le lengwe la tente e be e le dimithara tše e ka bago tše 12 ka botelele, gomme bophara bja mašela ao e be e le dimithara tše e ka bago tše pedi. Mašela ao ka moka a be a lekana.
10 Ke moka a kopanya mašela a mahlano ka go a rokelela gotee, gomme a kopanya le a mangwe a mahlano ka go a rokelela gotee.
11 Ka morago ga moo a dira mašoba ka garane e talalerata mafelelong a lešela letee la tente moo mašela a gahlanago gona. A dira se se swanago le ka mafelelong a lešela la tente la ka lehlakoreng le lengwe moo mašela a gahlanago gona.
12 A dira mašoba a 50 lešeleng letee la tente le mašoba a 50 moo lešela la tente le felelago gona ka lehlakoreng le lengwe moo mašela a gahlanago gona e le gore mašoba ao a lebane.
13 Mafelelong a dira dihuku tše 50 tša gauta gomme a kopanya mašela a tente gotee ka dihuku tšeo ke moka ya ba taberenakele e tee.
14 Ke moka a dira mašela a tente a 11 ka boya bja pudi gore a khupetše taberenakele.
15 Lešela le lengwe le le lengwe la tente e be e le dimithara tše e ka bago tše 13 ka botelele, gomme bophara bja mašela ao e be e le dimithara tše e ka bago tše pedi. Mašela ao ka moka a 11 a be a lekana.
16 Ke moka a kopanya mašela a mahlano ka go a rokelela gotee gomme a ba a kopanya mašela a mangwe a tshelelago ka go a rokelela gotee.
17 Mafelelong a lešela letee la tente a dira mašoba a 50, a a dira lešeleng leo le lego ka mafelelong mašeleng ao a rokagantšwego. A dira le mašoba a mangwe a 50 a lešela la tente leo le lego ka lehlakoreng le lengwe moo mašela a kopanago gona.
18 A dira dihuku tše 50 tša koporo gore a kopanye tente gore e be selo setee.
19 A dira selo seo se khupetšago tente ka matlalo a dinku tše tona ao a tailwego ka mmala o mohwibidu, a dira le se sengwe ka matlalo a boleta a phoofolo ya ka meetseng seo a tlago go se bea ka godimodimo.
20 Ke moka a direla taberenakele diforeime ka kota ya mošwana, a dira gore di eme thwii.
21 Foreime e tee e be e le dimithara tše e ka bago tše nne ka botelele, gomme bophara bja foreime e nngwe le e nngwe e le disenthimithara tšeo e ka bago tše 67.
22 Foreime e nngwe le e nngwe e be e na le dintlha tše pedi tša go e swaraganya. Diforeime ka moka tša taberenakele o be a di dirile ka mokgwa woo.
23 A direla taberenakele diforeime tše 20, gomme a di bea ka lehlakoreng la ka borwa la taberenakele.
24 Ka tlase ga diforeime tšeo tše 20 a bea maotwana a silifera a 40 ao a nago le mašoba, gomme ka tlase ga foreime e nngwe le e nngwe ka go latelana ga tšona a dira maotwana a mabedi ao a nago le mašoba a mabedi gotee le dintlha tša yona tše pedi.
25 Ka lehlakoreng le lengwe la taberenakele, e lego lehlakoreng la ka leboa, a dira diforeime tše 20,
26 le maotwana a tšona a silifera a 40 ao a nago le mašoba. Ka tlase ga foreime e nngwe le e nngwe a dira maotwana a mabedi ao ka moka ga ona a nago le mašoba.
27 Ka thoko ya bodikela ya taberenakele a dira diforeime tše tshelelago gomme a di bea ka morago ga taberenakele.
28 Dikarolong tše pedi tša ka morago tša taberenakele a dira diforeime tše pedi gore e be dikhona tša yona.
29 Diforeimi tšeo e be e le dikota tše pedi tšeo di tlogago fase di eya godimo gomme di kopantšwe mokgokong wa pele. Se ke seo a ilego a se dira ka dikhona tšeo tše pedi.
30 Ka gona go be go na le diforeime tše seswai le maotwana a tšona a 16 a silifera ao a nago le mašoba. Ka tlase ga foreime e nngwe le e nngwe go be go na le maotwana a mabedi ao ka moka ga ona a nago le mašoba.
31 Ke moka a dira dikota ka mohlare wa mošwana. Dikota tše hlano a di bea diforeimeng tša lehlakoreng letee la taberenakele,
32 dikota tše dingwe tše hlano a di bea diforeimeng tša ka lehlakoreng le lengwe la taberenakele, gomme tše dingwe tše hlano a di bea diforeimeng tša ka lehlakoreng la ka morago la taberenakele go ya ka bodikela.
33 Ke moka a dira kota yeo e lego gare ga diforeime gomme ya tloga thokong e nngwe ya fihla thokong e nngwe.
34 A penta diforeime tšeo ka gauta, a di direla mekgoko ya gauta yeo e tsenyago dikota gomme a penta dikota tšeo ka gauta.
35 A dira gareteine ka garane e talalerata, wulu ya mmala o mophepolo, garane e khwibidukhwibidu le linene e boletiana. Gareteine yeo a e kgabiša ka go e rokelela diswantšho tša bakerubi.
36 A dira diphilara tše nne tša dikota tša mošwana a di penta ka gauta, a dira le dihuku tša gauta. Diphilara tšeo a di direla maotwana a mane a silifera ao a nago le mašoba.
37 Ke moka mojakong wa tente a dira gareteine ka garane e talalerata, wulu ya mmala o mophepolo, garane e khwibidukhwibidu le linene e boletiana.
38 A direla gareteine yeo diphilara tše hlano le dihuku tša yona. A penta karolo ya tšona ya ka godimo le moo di kopanago gona ka gauta, eupša maotwana a tšona a mahlano ao a nago le mašoba e be e le a koporo.
