Ekisodo 37:1-29
37 Bjale Betsalele a dira Areka ka kota ya mohlare wa mošwana. Botelele bja yona e be e le mo e ka bago mithara o tee, bophara bja yona e be e le disenthimithara tšeo e ka bago tše 70, gomme botelele bja yona go ya godimo e be e le disenthimithara tšeo e ka bago tše 70.
2 Ke moka a e penta ka gauta yeo e hlwekilego, a e penta ka ntle le ka gare gomme a e direla selo sa go kgabiša ka gauta ke moka a se bea go dikologa Areka.
3 Ka morago ga moo a e direla mekgoko e mene ya gauta, a e dira gore e be ka godimo ga maotwana a yona a mane. Mekgoko e mebedi ya ba ka lehlakoreng le lengwe la yona gomme e mengwe e mebedi ya ba ka go le lengwe.
4 Ke moka a betla dikota tša mošwana gomme a di penta ka gauta.
5 A tsenya dikota tšeo ka mahlakoreng a Areka e le gore Areka e tle e rwalwe ka tšona.
6 A dira sekhurumelo ka gauta yeo e hlwekilego. Botelele bja sona e be e le mithara wo o ka bago o tee gomme bophara bja sona e le disenthimithara tše e ka bago tše 70.
7 A dira bakerubi ba babedi ka gauta. A ba bea dintlheng ka mahlakoreng a mabedi a sekhurumelo.
8 Mokerubi yo mongwe a mmea ka ntlheng e nngwe ya sekhurumelo, gomme yo mongwe a mmea ka ntlheng e nngwe.
9 Bakerubi bao ba be ba phurolletše maphego a bona godimo, ba širile sekhurumelo ka maphego a bona. Difahlego tša bona di be di lebane gomme di inametše sekhurumelong.
10 Ke moka a dira tafola ka kota ya mošwana. E be e le ya botelele bja mithara wo o ka bago o tee, bophara bja disenthimithara tše e ka bago tše 70 gomme botelele bja yona go ya godimo e be e le disenthimithara tše e ka bago tše 70.
11 Ke moka a e penta ka gauta yeo e hlwekilego, gomme a dira selo sa go kgabiša ka gauta ke moka a se bea go e dikologa.
12 Ka morago ga moo a e direla foreime ya disenthimithara tšeo e ka bago tše šupago,* gomme a e kgabiša ka gauta go e dikologa.
13 Le gona, o ile a e direla mekgoko e mene ya gauta gomme a e bea dikhoneng tše nne tša tafola moo maotwana a mane a lego gona.
14 Mekgoko yeo e be e le kgauswi le foreime ya tafola gore e thekge dikota tša go rwala tafola yeo.
15 Ke moka a dira dikota ka mošwana, a di penta ka gauta gore tafola yeo e rwalwe ka tšona.
16 Ka morago ga moo a dira dikotlelwana, dikomiki, le dibjana tša go tšhela dibego tša dino, a di dira ka gauta yeo e hlwekilego.
17 Ke moka a dira sehlomelamabone ka gauta yeo e hlwekilego. Leotwana la sona, makala a sona, dilo tšeo di hlomelwago go sona, dikgokolwana tša sona le mapolomo a sona. A di dira ya ba selo setee.
18 Mahlakoreng a sona go be go na le makala a tshelelago, ka lehlakoreng letee la sona go be go na le makala a mararo, gomme ka go le lengwe go na le makala a mararo.
19 Makala a ka lehlakoreng le lengwe a be a na le dihlomelo tše tharo tšeo di bopegilego bjalo ka matšoba a mohlare wa moalmonte, gomme dikgokolwana di hlatlagane le mapolomo. Go be go le bjalo le ka lehlakoreng le lengwe, makala a tshelelago a sehlomelamabone a be a le ka mokgwa woo.
20 Godimo ga sehlomelamabone go be go na le dilo tše nne tšeo di hlomelwago go sona tšeo di bopegilego go swana le matšoba a mohlare wa moalmonte, gomme dikgokolwana tša gona di be di hlatlagane le mapolomo.
21 Ka tlase ga makala a mangwe le a mangwe a mabedi go be go na le kgokolwana. Makala a tshelelago ao a lego godimo ga sehlomelamabone le ona a be a le ka mokgwa woo.
22 Sehlomelamabone ka moka le dikgokolwana tša sona le makala a sona di be di dirilwe ka karolo e tee ya gauta yeo e hlwekilego.
23 Ke moka a direla sehlomelamabone seo mabone a šupago, dithapo tša mabone* le dibjana tša go swara magala. A di dira ka gauta yeo e hlwekilego.
24 A dira sehlomelamabone seo le didirišwa tša sona ka gauta yeo e hlwekilego ya dikhilograma tše 34.*
25 Bjale o ile a dira aletare ya go fišetša diorelo ka kota ya mošwana. Botelele bja yona e be e le disenthimithara tšeo e ka bago tše 45, gomme bophara bja yona e be e le disenthimithara tše e ka bago tše 45. E be e lekana ka mahlakoreng ka moka a mane, gomme botelele bja yona go ya godimo e be e le disenthimithara tše e ka bago tše 89. Manaka a yona a be a dirilwe ka kota yeo go dirilwego aletare ka yona.
26 A e penta ka gauta yeo e hlwekilego karolong ya yona ya ka godimo, mahlakoreng a yona ka moka le manakeng a yona. A e direla morumo wa gauta go e dikologa.
27 A e direla mekgoko e mebedi ya gauta ka tlasana ga morumo wa yona, ya ba ka mahlakoreng a mabedi a yona a go lebana gore e tle e be ya go tsenya dikota tša go e rwala.
28 Ka morago ga moo a dira dikota ka mošwana gomme a di penta ka gauta.
29 A dira le makhura a makgethwa a go tlotša motho ge a kgethwa, le seorelo seo se sego sa tswakwa ka selo sa go nkga bose. Dilo tše ka moka di be di tswakilwe gabotse kudu.
Mengwalo ya tlase
^ Phetolelo ya lentšu ka lentšu e re, “bophara bja go lekana le seatla.” Bona Dit. B14.
^ Goba “dipete.”
^ Phetolelo ya lentšu ka lentšu e re, “talente e tee.” Bona Dit. B14.
