Ekisodo 8:1-32
8 Ke moka Jehofa a re go Moshe: “Eya go Farao gomme o mmotše o re: ‘Jehofa o re: “Lokolla setšhaba sa ka gore se yo ntlhankela.
2 Ge e ba o gana go se lokolla, gona ke tla otla naga ya gago ka moka ka digwagwa.
3 Noka ya Nile e tla nyeuma ka digwagwa, gomme di tla tla tša tsena ka ntlong ya gago, ka kamoreng ya gago, mpeteng wa gago, ka dintlong tša bahlanka ba gago, tša namela batho ba gago, tša tsena ka dibešong tša gago le ka dibjaneng tša gago tša go dubela folouru.
4 Digwagwa di tla go namela, tša namela batho ba gago le bahlanka ba gago ka moka.”’”
5 Ka morago Jehofa a re go Moshe: “Botša Arone gore a sware lepara la gagwe ka seatla gomme a šupe dinoka tša Baegepeta ka lona. A šupe mekero ya Noka ya Nile le mo go nago le meetse le mahlakanoka gomme a dire gore digwagwa di tšwelele di tlale nageng ya Egepeta.”
6 Ke moka Arone a šupa meetse a Egepeta ka lepara la gagwe gomme digwagwa tša tšwelela tša tlala naga ya Egepeta.
7 Eupša baperisita ba Egepeta bao ba dirago dilo tša botemona ba dira se se swanago ba diriša matla a bona ao a sa tsebjego. Le bona ba dira gore digwagwa di tšwelele di tlale naga ya Egepeta.
8 Ka morago Farao a bitša Moshe le Arone gomme a re: “Kgopelang Jehofa gore a tloše digwagwa go nna le go setšhaba sa ka, ka gobane ke nyaka go lokolla setšhaba sa gabo lena gore se sepele se yo direla Jehofa dihlabelo.”
9 Ke moka Moshe a re go Farao: “Ka ge ke go hlompha, ke tla kwa ka wena gore ke kgopele Modimo neng gore a tloše digwagwa go wena, go bahlanka ba gago, go setšhaba sa gago le dintlong tša gago. Di tla šala feela Nokeng ya Nile.”
10 Ke moka Farao a re: “Mo kgopele gosasa.” Ka gona Moshe a re: “Dilo ka moka di tla direga ka tsela yeo o boletšego ka yona, e le gore o tle o tsebe gore ga go na yo mongwe yo a swanago le Jehofa Modimo wa rena.
11 Digwagwa di tla tloga go wena, dintlong tša gago, go bahlanka ba gago le setšhabeng sa gago, gomme di tla šala feela Nokeng ya Nile.”
12 Ka gona Moshe le Arone ba tloga pele ga Farao, gomme Moshe a kgopela Jehofa gore a tloše digwagwa tšeo a bego a di tlišeditše Farao.
13 Ke moka Jehofa a dira seo Moshe a se kgopetšego gomme digwagwa tša thoma go hwa ka dintlong, ka malapeng le nageng ka moka.
14 Batho ba di kgoboketša ya ba mekgobokgobo gomme naga ka moka ya nkga.
15 Ge Farao a bona gore digwagwa ga di sa le gona, a thatafiša hlogo ya gagwe gomme a se ke a theetša Moshe le Arone, feela bjalo ka ge Jehofa a boletše.
16 Bjale Jehofa a re go Moshe: “Botša Arone gore a sware lepara la gagwe ka seatla a itie mo fase, gomme mobu o tla fetoga menang mo nageng ka moka ya Egepeta.”
17 Ke moka ba dira seo. Ka gona Arone a itia fase ka lepara la gagwe gomme gwa tšwelela menang ya namela batho le diphoofolo. Mobu ka moka wa nageng ya Egepeta wa fetoga menang.
18 Baperisita ba Egepeta bao ba dirago dilo tša botemona ba leka go dira se se swanago ba diriša matla a bona ao a sa tsebjego e le gore ba tšweletše menang, eupša ba palelwa. Menang ya namela batho le diphoofolo.
19 Ka gona baperisita bao ba re go Farao: “Se se dirilwe ka matla a Modimo!”* Eupša Farao a dula a thatafaditše hlogo gomme a se ke a ba theetša, feela bjalo ka ge Jehofa a boletše.
20 Ke moka Jehofa a re go Moshe: “Ge Farao a eya Nokeng ya Nile e sa le mesong, eya go yena gomme o mmotše o re: ‘Jehofa o re: “Lokolla setšhaba sa ka gore se tle se ntlhankele.
21 Eupša ge e ba o sa lokolle setšhaba sa ka sa sepela, ke tlo romela dintšhi tša go loma* go wena, go bahlanka ba gago, go batho ba gago le ka dintlong tša gago. Le gona dintlo tša Baegepeta di tlo tlala dintšhi tša go loma, tša tlala le gohle mo fase moo ba lego gona.
22 Letšatšing leo ke tla šireletša naga ya Goshene yeo setšhaba sa ka se dulago go yona. Nageng yeo go ka se be le ntšhi le e tee ya go loma, gomme ke moo o tlago go tseba gore ke nna Jehofa lefaseng ka moka.
23 Ke tla dira gore go be le phapano magareng ga setšhaba sa ka le sa gago. Se se tla direga gosasa.”’”
24 Jehofa a dira bjalo, gomme metšhitšhi e megolo ya dintšhi tša go loma ya tsena ntlong ya Farao le dintlong tša bahlanka ba gagwe le nageng ka moka ya Egepeta. Dintšhi tšeo di ile tša tlaiša batho ba Egepeta kudu.
25 Mafelelong Farao a bitša Moshe le Arone a re: “Sepelang le yo direla Modimo wa lena dihlabelo mo nageng ye.”
26 Eupša Moshe a re: “Go kaone gore re se ke ra dira dihlabelo tšeo pele ga Baegepeta, ka gobane dihlabelo tše re nyakago go di direla Jehofa Modimo wa rena di tlo šišimiša Baegepeta. Ge re ka dira dihlabelo tšeo di ba šišimišago pele ga bona, ba tlo re kgatla ka maswika.
27 Re tla tšea leeto la matšatši a mararo ra ya lešokeng gomme ra direla Jehofa Modimo wa rena dihlabelo, feela bjalo ka ge a re boditše.”
28 Bjale Farao a re: “Ke tla le lesa la sepela la yo direla Jehofa Modimo wa lena dihlabelo lešokeng. Eupša le se ke la ya kgole. Le nkgopeleleng go Modimo gore a tloše dintšhi tše tša go loma.”
29 Ke moka Moshe a re: “Bjale ke a tloga mo go wena gomme ke tla kgopela Jehofa gore gosasa a tloše dintšhi tše tša go loma go wena Farao, go bahlanka ba gago le go setšhaba sa gago. Eupša wena Farao o se ke wa leka wa re hlalefetša gape ka gore o ganetše setšhaba se gore se yo direla Jehofa dihlabelo.”
30 Ka morago ga moo Moshe a tloga go Farao gomme a yo rapela Jehofa.
31 Ka gona Jehofa a dira kamoo Moshe a boletšego ka gona, dintšhi tšeo tša tloga go Farao, go bahlanka ba gagwe le go setšhaba sa gagwe. Gwa se šale le e tee.
32 Eupša Farao a thatafiša hlogo ya gagwe gape gomme a se tlogele setšhaba se sepela.
