Genesi 13:1-18
13 Ka morago ga moo Aborama o ile a tloga Egepeta a ya Negebe, a na le mosadi wa gagwe le dilo ka moka tšeo a bego a na le tšona, gomme ba be ba sepela le Lota.
2 Aborama o be a humile kudu, a na le mehlape, silifera le gauta.
3 O be a tšama a hloma ditente a di hlomolla go tloga Negebe go ya Bethele, go fihlela a fihla lefelong leo tente ya gagwe e bego e le magareng ga Bethele le Ai,
4 e lego lefelo leo a bego a kile a aga aletare go lona. Lefelong leo ke moo Aborama a ilego a tumiša leina la Jehofa.
5 Bjale Lota yoo a bego a sepela le Aborama le yena o be a humile, a na le dinku, dikgomo le ditente.
6 Ka ge ba be ba na le dithoto tše dintši ba ile ba se sa kgona go dula felo gotee ka ge naga yeo e be e sa ba lekane.
7 Ka baka leo badiši ba diruiwa tša Aborama le badiši ba diruiwa tša Lota ba ile ba thoma go lwa. Ka nako yeo Bakanana le Baperetse ba be ba dula mo nageng yeo.
8 Ka gona Aborama a re go Lota: “Hle, a go se be le ntwa magareng ga ka le wena le magareng ga badiši ba ka le badiši ba gago, ka gobane re bana ba motho.
9 O ka ikgethela gore o nyaka go dula kae. A re arogane hle. Ge e ba o eya ka go le letshadi nna ke tla ya ka go le letona, eupša ge e ba o eya ka go le letona, gona nna ke tla ya ka go le letshadi.”
10 Ka gona Lota a lebelela gomme a bona gore tikologo ka moka ya Noka ya Jorodane e be e na le meetse a mantši (pele Jehofa a ka fediša Sodoma le Gomora). Tikologo yeo e be e swana le serapa sa Edene seo Jehofa a bego a se dirile, e swana le naga ya Egepeta go fihla ka Tsoare.
11 Ke moka Lota a ikgethela tikologo ka moka ya Noka ya Jorodane gomme a thothela ditente tša gagwe ka bohlabela. Ka morago ga moo ba arogana.
12 Aborama a dula nageng ya Kanana, eupša Lota a dula kgauswi le metse ya tikologo yeo. Mafelelong Lota a hloma tente ya gagwe kgauswi le Sodoma.
13 Bjale batho ba Sodoma e be e le ba babe, ba direla Jehofa dibe tše dikgolo kudu.
14 Ka morago ga ge Lota a arogane le Aborama, Jehofa a bolela le Aborama a re: “Hle lebelela o le moo o lego gona, o lebelele ka leboa, ka borwa, ka bohlabela le ka bodikela,
15 ka gobane naga ka moka yeo o e bonago ke tlo e nea wena le bana ba gago go ya go ile.
16 Ke tla dira gore bana ba gago e be ba bantši bjalo ka lerole la lefase, go swana le ge go se na motho yo a ka kgonago go bala lerole la lefase, le bana ba gago ba ka se balege.
17 Bjale sepela naga ye ka moka, ka gobane ke tlo go nea yona.”
18 Ka gona Aborama a tšwela pele a dula moo ditenteng. Ka morago a tla a dula kgauswi le mehlare e megolo ya Mamure yeo e lego Heburone, gomme a agela Jehofa aletare moo.
