Genesi 19:1-38
19 Bjale barongwa bale ba babedi ba fihla Sodoma mantšiboa gomme Lota o be a dutše kgorong ya motse wa Sodoma. Ya re ge Lota a ba bona a ema a ba gahlanetša ke moka a khunama a inamiša sefahlego.
2 A re go bona: “Beng ba ka, hle ke kgopela gore le yeng ntlong ya ka, nna mohlanka wa lena, le robaleng gona gomme re le hlapišeng maoto. Ke moka le tla tsoga ka masa la sepela.” Bona ba mo fetola ba re: “Aowa, re tla ithobalela kgorong ya motse.”
3 Eupša o ile a ba rapeletša moo ba ilego ba dumela gomme ba sepela le yena ba ya ntlong ya gagwe. Ke moka a ba direla dijo tša maemo a godimo, a ba apeela dinkgwa tše di sa omelwago gomme ba ja.
4 Pele ba ka robala, go ile gwa tla banna ka moka ba motseng woo, go tloga ka mošemane go fihla ka mokgalabje, ba dikologa ntlo ka moka ba tsošitše mpherefere.
5 Ba goeletša Lota ba re: “Ba kae banna bale ba tlilego mo ga gago bošego? Ba ntšhe o ba tliše mo go rena gore re tle re robale le bona.”
6 Ke moka Lota a tšwa a ya go bona gomme a tswalela mojako.
7 A re go bona: “Aowa hle bana bešo, le se dire selo se sebe.
8 Ntheetšeng hle, ke na le barwedi ba babedi bao ba sa kago ba robala le monna. E re ke ba tlišeng go lena le ba direng selo le ge e le sefe seo le bonago se lokile. Eupša banna ba le se ke la ba dira selo ka gobane ba nketetše le gona ke swanetše go ba šireletša.”*
9 Bona ba re: “Tloga moo!” Ba ba ba re: “O tlile mo o le motšwantle, eupša o na le sebete sa go nyaka go re ahlola. Bjale re tla go dira dilo tše mpe go feta banna ba.” Ba kgorometša Lota, gomme ba be ba le kgauswi le go roba mojako.
10 Bjale banna bale ba babedi ba ntšhetša matsogo ka ntle gomme ba gogela Lota ka ntlong, ke moka ba tswalela mojako.
11 Eupša ba dira gore banna bale ba bego ba eme mojakong wa ntlo ba foufale, go tloga ka yo monyenyane go fihla ka yo mogolo, moo ba ilego ba ba ba lapa go nyakana le mojako.
12 Ke moka banna bale ba babedi ba re go Lota: “Na go na le motho le ge e le ofe yo mongwe wa geno mo? Tšea bakgonyana ba gago, barwa ba gago, barwedi ba gago le batho ka moka bao e lego ba geno mo motseng, o ba ntšhe mo lefelong le!
13 Ka gobane re tlo fediša lefelo le, ka ge Jehofa a kwele sello se segolo sa batho bao ba llago ka badudi ba motse wo, gomme Jehofa o re romile go fediša motse wo.”
14 Ke moka Lota a tšwela ka ntle a bolela gantšintši le bakgonyana ba gagwe bao ba bego ba tlo nyala barwedi ba gagwe a re: “Dirang kapela le tšweng lefelong le, ka gobane Jehofa o tlo fediša motse wo!” Eupša bakgonyana ba gagwe ba be ba bona okare Lota o itshwaretše metlae.
15 Eupša ge go esa, barongwa ba leka go dira gore Lota a se ke a senya nako. Ba re go yena: “Dira kapela! Tšea mosadi wa gago le barwedi ba gago ba babedi bao o nago le bona, e le gore o se fedišwe ge motse wo o fedišwa ka baka la dibe tša wona!”
16 Ka ge Jehofa a be a kwela Lota bohloko, eitše ge a diega banna bao ba swara seatla sa gagwe, seatla sa mosadi wa gagwe le diatla tša barwedi ba gagwe ba babedi ba ba ntšhetša ka ntle gomme ba ba emiša ka ntle ga motse.
17 Gateetee ge ba ba ntšheditše ka ntle ga motse, yo mongwe wa banna bao a re go bona: “Tšhabang le phološeng maphelo a lena! Le se ke la lebelela morago, le gona le se ke la ema lefelong le ge e le lefe tikologong ye ka moka! Tšhabelang dithabeng gore le se ke la fedišwa!”
18 Ke moka Lota a re go bona: “E sego moo, hle Jehofa!
19 O nkwetše bohloko gomme wa mpontšha botho bjo bogolo ka go phološa bophelo bja ka. Eupša nka se kgone go tšhabela dithabeng, ka gobane ke tšhaba gore nka tla ka welwa ke kotsi gomme ka hwa.
20 Go na le motse o monyenyane šo mo kgauswi, hle ntumelele gore ke tšhabele go wona. E no ba motse o monyenyane, bophelo bja ka bo tlo šireletšega moo.”
21 Ka gona Modimo a re go yena: “Go lokile, ke tla dira seo o se kgopelago ka go se fediše motse wo o boletšego ka wona.
22 Dira kapela o tšhabele moo! Ka gobane ga go na selo seo nka se dirago go ba go fihlela o fihla moo!” Ke ka baka leo a ilego a reela motse woo leina a re ke Tsoare.*
23 Letšatši le be le šetše le hlabile ge Lota a fihla Tsoare.
24 Ke moka Jehofa a dira gore sebabole* le mollo di nele Sodoma le Gomora. Jehofa a di neša go tšwa magodimong.
25 Ka gona a fediša metse yeo le tikologo yeo ka moka, a fediša le batho ka moka bao ba dulago metseng yeo le dimela tša moo.
26 Eupša mosadi wa Lota yena, yoo a bego a le ka morago ga gagwe, a lebelela morago, gomme mmele wa gagwe ka moka wa fetoga letswai.*
27 Bjale Aborahama a tsoga e sa le mesong a boela lefelong leo Jehofa a ilego a bolela le yena a eme go lona.
28 Ke moka ge a lebelela tlase thoko ya Sodoma le Gomora le tikologong yeo ka moka, a bona selo seo se tšhošago. O ile a bona muši o moso o eya godimo nageng yeo ka moka go swana le muši wa sebešo.
29 Ka gona ge Modimo a be a fediša metse ya tikologo yeo, o ile a gopola seo a ilego a se botša Aborahama ka go phološa Lota. Metse yeo ke yona yeo Lota a bego a dula go yona.
30 Ka morago ga moo, Lota o ile a tloga Tsoare gomme a yo dula dithabeng a na le barwedi ba gagwe ba babedi ka gobane o be a tšhaba go dula Tsoare. Ka gona o ile a dula ka leweng le barwedi ba gagwe ba babedi.
31 Morwedi yo mogolo a bolela le yo monyenyane a re: “Tatago rena o tšofetše gomme ga go na monna mo nageng ye yoo a ka dirago gore re be le bana, go no swana le ge batho ba bangwe ba dira bjalo lefaseng ka moka.
32 Etla re nweše tate beine gomme re robale le yena gore leloko la tate le se ke la hwelela.”
33 Bjale bošegong bjoo ba nweša tatago bona beine e ntši go fihlela a tagwa. Ke moka morwedi yo mogolo a yo robala le tatagwe, eupša tatagwe a se mmone ge a robala le ge a tsoga.
34 Letšatšing le le latelago morwedi yo mogolo a re go yo monyenyane: “Nna ke robetše le tate bošegong bja maabane. Le lehono a re mo nweše beine, ke moka wena o robale le yena gomme re dire gore leloko la tate le se ke la hwelela.”
35 Ka gona ba nweša tatago bona beine e ntši go fihlela a tagwa bošegong bjoo, ke moka yo monyenyane a yo robala le tatagwe, eupša tatagwe a se mmone ge a robala le ge a tsoga.
36 Barwedi bao ba babedi ba Lota ba imišwa ke tatago bona.
37 Morwedi yo mogolo a belega morwa gomme a mo reela leina la Moaba. Ke yena tatago Bamoaba ba lehono.
38 Yo monyenyane le yena a belega morwa gomme a mo reela leina la Bene-ami. Ke yena tatago Baamoni ba lehono.
Mengwalo ya tlase
^ Phetolelo ya lentšu ka lentšu e re, “ba tšhabetše ka tlase ga moriti wa tlhaka ya ka.”
^ Leina le le ra gore, “Bonyenyane.”
^ Mo lentšu sebabole le šupa go mohuta o itšego wa leswika leo le swago.
^ Ke gore, sehlwaseeme sa letswai.
