Genesi 3:1-24
3 Bjale noga e be e hlalefile kudu mo go diphoofolo ka moka tša naga tšeo Jehofa Modimo a di dirilego. Ka gona ya re go mosadi: “Na ke nnete gore Modimo o rile le se ke la ja dienywa tša mohlare o mongwe le o mongwe wa mo serapeng?”
2 Ke moka mosadi a re go noga: “Dienywa tša mehlare ya mo serapeng re ka di ja.
3 Eupša ge e le mabapi le dienywa tša mohlare wo o lego gare ga serapa, Modimo o rile: ‘Le se ke la ja dienywa tša wona, le go o kgwatha le se ke la o kgwatha, go sego bjalo le tlo hwa.’”
4 Ge mosadi a re’alo noga ya re go yena: “Taba ye ga se nnete, ruri le ka se hwe.
5 Ka gobane Modimo o tseba gore ka lona letšatši leo le tlago go ja dienywa tša wona, mahlo a lena a tlo bulega gomme la ba bohlale go swana le yena, la tseba se sebotse le se sebe.”
6 Ke moka mosadi a bona gore dienywa tša mohlare wo ke tše botse gore di ka jewa, a di bona di dumiša e bile di kgahliša. Ke moka a kga se sengwe sa dienywa tšeo gomme a se ja. Ka morago a fa le monna wa gagwe ge a be a na le yena, le yena a se ja.
7 Ke moka ba bulega mahlo gomme ba bona gore ba be ba se ba apara. Ka gona ba rokaganya matlakala a mogo ba ikhupetša bofeela bja bona.
8 Ka morago monna le mosadi wa gagwe ba kwa lentšu la Jehofa Modimo ge a be a sepela serapeng nakong ya ge go be go hlaba phefšana ya mantšiboa, gomme ba ikuta ka gare ga mehlare ya ka serapeng gore ba se bone sefahlego sa Jehofa Modimo.
9 Jehofa Modimo a bitša monna gantšintši a re: “O mo kae?”
10 Mafelelong monna a re: “Ke kwele lentšu la gago mo serapeng eupša ka boifa ka gobane ke be ke se ka apara, ka gona ka ikuta.”
11 Ke moka Modimo yena a re: “O boditše ke mang gore ga se wa apara? Na o jele dienywa tša mohlare wola ke rilego o se ke wa di ja?”
12 Monna a re: “Mosadi yo o nneilego yena, ke yena a mphilego seenywa sa mohlare woo gomme ka se ja.”
13 Ke moka Jehofa Modimo a re go mosadi: “O dirile’ng?” Mosadi a araba a re: “Noga e mphorile gomme ka ja.”
14 Jehofa Modimo a re go noga: “Ka baka la selo seo o se dirilego, o rogakilwe gare ga diruiwa ka moka le diphoofolo ka moka tša naga. O tla gagaba ka mpa wa ba wa ja lerole bophelo bja gago ka moka.
15 Ke tla dira gore wena le mosadi le be manaba, e bile ke tla dira gore peu ya gago le peu ya gagwe di hloyane. E* tla go pšhatla hlogo gomme wena o tla e loma serethe.”
16 A botša mosadi a re: “Ke tla oketša kudu bohloko bja ge o imile, o tla belega bana gabohloko wa ba wa kganyoga go ba le monna wa gago, gomme yena o tla go buša.”
17 Ke moka a botša Adama a re: “Ka ge o theeditše mosadi wa gago gomme wa ja dienywa tša mohlare wo ke go laetšego ka re: ‘O se ke wa ja dienywa tša wona,’ gona mobu o rogakilwe ka baka la gago. O tlo šoma ka thata gore o hwetše dijo* tšeo di tšwago mobung bophelo bja gago ka moka.
18 Mobu o tla go medišetša meetlwa le dimela tše di hlabago, gomme wena o tla ja dimela tša naga.
19 E le gore o je, o tlo šoma ka thata wa ba wa tšwa kudumela go fihlela o boela mobung, gobane o ntšhitšwe go wona. Ka gobane o lerole gomme o tla boela leroleng.”
20 Ka morago ga dilo tše Adama a reela mosadi wa gagwe leina a re ke Efa, ka gobane e be e tla ba mmago batho ka moka.*
21 Jehofa Modimo a direla Adama le mosadi wa gagwe diaparo tše ditelele tša matlalo a diphoofolo gore ba di apare.
22 Ke moka Jehofa Modimo a re: “Gona bjale motho o swana le rena ka go tseba botse le bobe. Bjale ke swanetše go dira se sengwe e le gore a se ke a kga seenywa sa mohlareng wa bophelo gomme a se ja a phela go ya go ile.”
23 Ka baka leo Jehofa Modimo a mo raka serapeng sa Edene gore a yo lema mobu woo a ntšhitšwego go wona.
24 Ka morago ga gore a rake motho o ile a bea bakerubi ka bohlabela bja serapa sa Edene, a bea le tšhoša e bogale e tukago e bile e dikologa e sa kgaotše gore e thibe tsela yeo e yago mohlareng wa bophelo.
Mengwalo ya tlase
^ Ke gore, “peu ya mosadi.”
^ Phetolelo ya lentšu ka lentšu e re, “o tlo di ja gabohloko.”
^ Phetolelo ya lentšu ka lentšu e re, “motho yo mongwe le yo mongwe yo a phelago.”
