Genesi 30:1-43
30 Ge Ragele a bona gore ga a kgone go belega bana, a jela sesiagwe mona gomme a re go Jakobo: “Mphe bana ka gore go sego bjalo ke tlo hwa.”
2 Ka gona Jakobo a galefela Ragele gomme a re go yena: “Na ke nna Modimo, e lego yena yo a dirilego gore o se ke wa ba le bana?”
3 Ke moka Ragele a re: “Robala le Biliha lekgoba la ka la mosadi gore a mpelegele bana bao e tlago go ba ba ka.”
4 Ke moka a mo nea Biliha mohlanka wa gagwe ya ba mosadi wa gagwe, gomme Jakobo a robala le yena.
5 Biliha a ima gomme ka morago a belegela Jakobo morwa.
6 Ke moka Ragele a re: “Modimo e bile moahlodi wa ka a ba a ntheetša gomme a nnea morwa.” Ke ka baka leo a mo reetšego leina la Dani.*
7 Biliha mohlanka wa Ragele a ima gape gomme a belegela Jakobo morwa wa bobedi.
8 Ke moka Ragele a re: “Ke lwele le sesiaka kudu gomme ke fentše!” Ka gona a mo reela leina la Nafutali.*
9 Ge Lea a bona gore ga a sa ima, a tšea Silipa mohlanka wa gagwe a mo nea Jakobo gore e be mosadi wa gagwe.
10 Ke moka Silipa mohlanka wa Lea a belegela Jakobo morwa.
11 Ka gona Lea a re: “Ke na le mahlatse!” Ke moka a mo reela leina la Gada.*
12 Ka morago ga moo Silipa mohlanka wa Lea a belegela Jakobo morwa wa bobedi.
13 Ke moka Lea a re: “Ke thabile kudu! Basadi ba mo nageng ba tla re ke thabile.” Ka gona a mo reela leina la Ashere.*
14 Bjale nakong ya ge go be go bunwa korong, Rubeni o be a itshepelela nageng gomme a hwetša dienywa.* Ka gona a di tliša go Lea mmagwe. Ke moka Ragele a re go Lea: “Hle mphe tše dingwe tša dienywa tša morwa wa gago.”
15 Lea a re: “Na ga se wa kgotsofala gore o ntšeetše monna gomme gona bjale o nyaka go ntšeela le dienywa tša morwa wa ka?” Ka gona Ragele a re: “Ge o ka nnea dienywa tša morwa wa gago, Jakobo o tla robala le wena bošegong bjo.”
16 Ge Jakobo a boa madišong mantšiboa, Lea a tšwa a yo mo gahlanetša gomme a re go yena: “Ke patetše Ragele ka dienywa tša morwa wa ka gore o tle o robale le nna.” Bošegong bjoo Jakobo a robala le Lea.
17 Ka gona Modimo a kwa Lea a ba a araba thapelo ya gagwe, gomme a ima a belegela Jakobo morwa wa bohlano.
18 Ke moka Lea a re: “Modimo o nneile moputso, ka gobane ke neile monna wa ka mohlanka wa ka.” Ka gona a mo reela leina la Isakara.*
19 Lea a ima gape gomme a belegela Jakobo morwa wa botshelela.
20 Ke moka Lea a re: “Modimo o nneile mpho e botse kudu. Bjale gona monna wa ka o tla nkgotlelela, ka gobane ke mmelegetše barwa ba tshelelago.” Ka gona a mo reela leina la Sebulone.*
21 Ka morago ga moo a belega morwedi gomme a mo reela leina la Dina.
22 Mafelelong Modimo a gopola Ragele, a mo kwa a ba a araba thapelo ya gagwe ka go dira gore a kgone go ima.
23 Ka morago ga moo a ima a belega morwa, gomme a re: “Modimo o dirile gore ke se sa gobošwa!”
24 Ka gona a mo reela leina la Josefa* a re: “Jehofa o nkokeleditše ka morwa yo mongwe.”
25 Ka morago ga ge Ragele a belege Josefa, kapejana Jakobo a re go Labane: “Ntumelele ke boele ga gešo le nageng ya gešo.
26 Nnee basadi ba ka le bana ba ka bao ke go hlanketšego ka baka la bona gore ke sepele. Ka gobane o tseba gabotse gore ke go šometše ka thata.”
27 Ke moka Labane a re go yena: “Ke kgopela gore o se ke wa sepela. Ke bone dilo tšeo di mpontšhitšego gore Jehofa o ntšhegofatša ka baka la gago.”
28 Le gona a re: “Mpotše gore ke go patele ka eng gomme ke tla go patela.”
29 Jakobo a re go yena: “O a tseba gore ke go hlanketše ka go tshepega, le gore mohlape wa gago o gotše kudu ge ke be ke o diša.
30 Ge ke be ke etla mo, mohlape wa gago e be e le o monyenyane, eupša gona bjale o gotše ka gobane Jehofa o go šegofaditše ga e sa le ke tlile. Bjale nna ke tlo direla neng ba lapa la ka se sengwe?”
31 Ke moka Labane a re: “Ke go patele ka eng?” Jakobo a re: “O se ke wa mpatela! Ge o ka dira seo ke tlago go go kgopela sona, gona ke tla thoma go diša mohlape wa gago gape le go o hlokomela.
32 Ke tla feta mohlapeng wa gago lehono. Wena o hlaole nku e nngwe le e nngwe yeo e nago le marothontho* le mebalabala, nku e nngwe le e nngwe e tsootho* mo gare ga dinku tše dinyenyane tše tona le dipudi ka moka tše tshadi tšeo di nago le mebalabala le marothontho. Go tloga gona bjale o tla mpatela ka tšona.
33 Mohlang o etla o bona mehlape ya ka, o tlo bona gore ke be ke tshepega. Ge e ba mo mehlapeng o ka hwetša pudi e tshadi e ntsho goba nku e nyenyane e tšhweu, gona ke tla be ke di utswitše.”
34 Ke moka Labane a re: “Go lokile! Ke dumelelana le seo o se boletšego.”
35 Lona letšatšing leo Labane a hlaola diphooko tša methalothalo le tša mebalabala le dipudi ka moka tše tshadi tša marothontho le tša mebalabala, eupša dinku ka moka tše nyenyane tše tona tše tšhweu le tše tsootho, tšona a di nea barwa ba gagwe gore ba di hlokomele.
36 Ka morago ga moo, a tšea mehlape ya gagwe a e iša lefelong leo go bego go ka tšea matšatši a mararo go fihla go lona go tloga moo Jakobo a bego a le gona, gomme Jakobo yena o be a diša mehlape ya Labane yeo e bego e šetše.
37 Ke moka Jakobo a tšea diphatana tšeo di sego tša tšwa di omelela tša mohlare wa mosetorekisi, wa moalmonte le wa mopolane gomme a di hloba gore di šale di na le marothontho a mašweu.
38 Mafelelong a tšea diphatana tšeo a di hlobilego a di bea ka pele ga mohlape, moo diphoofolo di bego di enwa meetse gona, e le gore di tle di goelane ge di tlo nwa meetse.
39 Ka gona mehlape yeo e be e goelana pele ga diphatana tšeo, gomme ya tswala tša methalothalo, tša marothontho le tša mebalabala.
40 Jakobo a hlaola dinku tše nyenyane tše tona a di bea ka pele ga mohlape wa Labane, gore mohlape woo o lebelele dinku tšeo ka moka tša methalothalo le tše tsootho. Ke moka a beela mehlape ya gagwe ka thoko a se e tswake le mehlape ya Labane.
41 E be e re ka mehla ge tše di phetšego gabotse mo mehlapeng di goelana, Jakobo a bea diphatana ka moo di nwago meetse pele ga mehlape gore di goelane di le kgauswi le diphatana tšeo.
42 Eupša ge mehlape e be e fokola o be a sa tsenye diphatana tšeo ka moo. Ka gona ka mehla tše di fokolago e be e eba tša Labane, eupša tše di phetšego gabotse e eba tša Jakobo.
43 Lehumo la monna yoo le ile la oketšega ya ba le lentšintši, a ba le mehlape e megolo, bahlanka ba bantši ba banna le ba basadi, dikamela le ditonki.
Mengwalo ya tlase
^ Leina le le ra gore, “Moahlodi.”
^ Leina le le ra gore, “Go lwa ga ka.”
^ Leina le le ra gore, “Lehlogonolo goba Mahlatse.”
^ Leina le le ra gore, “Go Thaba” goba “Lethabo.”
^ Dienywa tša mmala o mokheri goba serolane tša sehlašana sa legoro la ditapola.
^ Leina le le ra gore, “Moputso.”
^ Leina le le ra gore, “Kgotlelelo.”
^ Leina le le ra gore, “Anke Jah a Tlaleletše (Oketše).”
^ Goba “ditobatoba.”
^ Goba “brown.”
