Genesi 45:1-28
45 Ge Josefa a ekwa seo Juda a se boletšego, a se sa kgona go itshwara pele ga bahlanka ba gagwe ka moka. Ke moka a ba goeletša a re: “Ka moka ga lena tlogang mo go nna!” Go be go se na motho yo a bego a na le Josefa ge a be a botša bana babo gore ke yena mang.
2 O ile a llela godimo kudu, moo Baegepeta ba ilego ba kwa sello sa gagwe, le ba ntlo ya Farao le bona ba se kwa.
3 Mafelelong Josefa a re go bana babo: “Ke nna Josefa. Na tate o sa phela?” Eupša bana babo ba se kgone go mo araba ka gobane o be a ba makaditše.
4 Ka gona Josefa a re go bona: “Mpatameleng hle,” ke moka ba mmatamela.
Yena a re go bona: “Ke nna ngwanabo lena Josefa yoo le mo rekišitšego gomme a išwa Egepeta.
5 Eupša le se ke la tshwenyega e bile le se ke la galefelana ka ge le nthekišitše, ka gobane Modimo o ntlišitše mo gore ke tle ke phološe maphelo.
6 Wo ke ngwaga wa bobedi go wele tlala nageng, gomme go sa tlo tla mengwaga e mengwe e mehlano yeo batho ba ka se kego ba lema goba ba buna.
7 Ka gona Modimo o ntlišitše mo gore ke le ete pele e le gore le tle le phološwe ka tsela e kgolo e bile le malapa a lena a phološwe.
8 Ka gona ga se lena le ntlišitšego mo, eupša ke tlišitšwe ke Modimo wa nnete, e le gore ke tle ke be moeletši yo mogolo wa Farao le go hlokomela dilo ka moka ka ntlong ya gagwe, le gore ke buše naga ka moka ya Egepeta.
9 “Eyang go tate kapejana le mmotše gore Josefa morwa wa gagwe o re: “Modimo o nkgethile gore ke hlokomele naga ka moka ya Egepeta. Etla go nna, o se ke wa senya nako.
10 O ka tla wa dula nageng ya Goshene, moo o tlago go ba kgauswi le nna. O tle le barwa ba gago, ditlogolo tša gago, mehlape ya gago ya dinku, dipudi le dikgomo le dilo ka moka tšeo o nago le tšona.
11 Ge o le moo, ke tla go nea dijo ka gobane go sa tla mengwaga e mengwe e mehlano ya tlala. E le gore wena le ba lapa la gago le se ke la tla la loba dilo tša lena ka moka gomme la hwa ka tlala.”’
12 Lena le Benjamini ngwanešo le a bona gore ka nnete ke nna ke bolelago le lena.
13 Ka gona le botše tate gore ke na le maemo a godimo kudu mo Egepeta, le mmotše le ka dilo ka moka tšeo le di bonego. Bjale dirang kapela le tlišeng tate mo.”
14 Ke moka a gokarela Benjamini ngwanabo gomme a lla. Benjamini le yena a lla a mo gokaretše.
15 A khisa bana babo ka moka a ba gokaretše e bile a lla, ka morago ga moo bana babo ba bolela le yena.
16 Ge ka ntlong ya Farao ba ekwa gore bana babo Josefa ba tlile, Farao le bahlanka ba gagwe ba ile ba thaba kudu.
17 Ke moka Farao a bolela le Josefa a re: “Botša bana beno gore ba rweše ditonki tša bona merwalo gomme ba ye nageng ya Kanana.
18 Ba tšeeng tatago lena le malapa a bona, gomme ba tle mo gore ke tle ke ba nee dilo tše dibotse tša naga ye, e bile ba tla ja dijo tše di nonnego tšeo di tšwago nageng.
19 O ba botše gore ba tšee dikariki mo nageng ya Egepeta ba yo nametša bana ba bona le basadi ba bona, gomme ba nametše tatago lena go e nngwe ya tšona ke moka ba tle mo.
20 Le se ke la tshwenyega ka dithoto tša lena, ka gobane dilo tše dibotse tša naga ka moka ya Egepeta ke tša lena.”
21 Ka gona barwa ba Isiraele ba ile ba dira bjalo, ke moka Josefa a ba nea dikariki go ya kamoo Farao a laetšego ka gona, a ba a ba nea le dilo tšeo ba tlago go di hloka tseleng.
22 A nea yo mongwe le yo mongwe seaparo se seswa, eupša Benjamini a mo nea ditšhelete tša silifera tše 300 (makgolotharo) le diaparo tše hlano tše diswa.
23 A romela tatagwe ditonki tše lesome tše di rwelego dilo tše dibotse tša Egepeta le tše lesome tše tshadi tšeo di rwelego mabele, senkgwa le dijo tšeo tatagwe a tlago go di ja mo tseleng.
24 Ka gona a lokolla bana babo ba sepela, gomme a re go bona: “Le se ke la tšama le galefelana mo tseleng.”
25 Ba tloga Egepeta gomme ba sepela ba fihla nageng ya Kanana go Jakobo tatago bona.
26 Ke moka ba mmotša ba re: “Josefa o sa phela, e bile ke yena a hlokometšego naga ka moka ya Egepeta!” Eupša pelo ya gagwe ya nyaka go ema, ka gobane o be a sa ba tshepe.
27 Ge Jakobo tatago bona a ekwa dilo ka moka tšeo Josefa a ba boditšego tšona, e bile a bona dikariki tšeo Josefa a di rometšego gore di tle di mo rwale, o ile a thaba.
28 Ke moka Isiraele a re: “Bjale ke a le tshepa! Josefa morwa wa ka o sa phela! Ereng ke sepeleng ke yo mmona pele ke ehwa!”
