Habakuku 3:1-19
3 Koša ya moporofeta Habakuku ya sello še:
2 Jehofa, ke kwele ka dilo tšeo o di dirilego.
E bile di mpoifiša kudu wena Jehofa.
Ge mengwaga e dutše e eya,* dira dilo tše di makatšago gape.
Ge mengwaga e dutše e eya,* dira gore batho ba di tsebe.
Nakong ya masetlapelo, anke o re gopole gomme o re gaugele.
3 Modimo a tla a etšwa Themane,Yena Mokgethwa yo a tšwago Thabeng ya Parane. (Selah)*
Bogolo bja gagwe bo tletše magodimo.Lefase le tletše ka batho bao ba mo retago.
4 Go phadima ga gagwe go be go le bjalo ka seetša.
Seatleng sa gagwe go be go etšwa mahlasedi.Gona moo, ke moo go bego go khutile matla a gagwe.
5 O be a etilwe pele ke leuba la bolwetši,Gomme a šetšwe morago ke phišo e kgolo.*
6 O ile a ema pho gomme a šikinya lefase!
A lebelela ditšhaba, ke moka tša thoma go thothomela.
Dithaba tšeo e bego e le kgale di le gona di ile tša pšhatlaganywa.Meboto ya kgale yona ya phušoga.
Dilo tše ke tšeo a ilego a di dira go tloga kgale.
7 Ke bone dilo tše di kwešago bohloko ditenteng tša batho ba Kushane.*
Mašela a ditente tša nageng ya Midiane a ile a thothomela.
8 Jehofa, na ge o galefile,O galefetše dinoka?
Goba na o galefetše lewatle?
Ka gobane o be o nametše dipere tša gagoE bile dikoloi tša gago tša ntwa di ile tša fenya.
9 O ntšhitše bora bja gago e bile o ikemišeditše go thuntšha.
Dibetša* tša gago di loketše go dira mošomo wa tšona go etša ge o enne. (Selah)
O arogantše lefase ka dinoka.
10 Dithaba di ile tša kwa bohloko ge di go bona.
Go ile gwa na pula e kgolo.
Meetse ao a lego ka garegare ga lewatle, a ile a dira lešata le legolo.
A ile a ya godimo.
11 Letšatši le ngwedi di ile tša ema pho lefaufaung!
Mesebe ya gago e ile ya tšwa bjalo ka seetša.
Lerumo la gago le be le phadima bjalo ka legadima.
12 O be o gwanta lefaseng o galefile.
Wa gatakela batho ba ditšhaba o galefile.
13 O ile wa tšwa e le gore o phološe batho ba gago. O phološitše motlotšwa wa gago.
Wa pšhatlaganya moetapele wa ntlo ya batho ba babe.
Ntlo yeo e ile ya senywa go tloga godimo go fihla fantešeneng ya yona. (Selah)
14 O hlabile moetapele wa mašole ka dibetša tša gagwe.Mašole a gagwe a ile a ikuta.
A be a thabetše go tlo bolaya batho bao ba hlakago.
15 Eupša wena Modimo o ile wa tshela lewatle ka dipere tša gago,Ka gare ga maphoto a magolo a lewatle.
16 Ge ke ekwa ka seo, ke ile ka thothomela.Melomo ya ka e ile ya thothomela ge ke ekwa molaetša wo.
Marapo a ka a ile a fela matla.Maoto a ka a thothomela.
Eupša ke tla letela letšatši la masetlapelo ke sa fele pelo.Ka gobane le tlo tlela batho bao ba re hlaselago.
17 Le ge mogo o ka se thunye mapolomo,Gomme moterebe wa se be le diterebe,Le ge mohlware o ka se enywe,Gomme mašemong gwa se be le dijo,Le ge mohlape o ka fela ka lešakeng,Gomme gwa se be le dikgomo ka mašakeng,
18 Ge e le nna ke tla thabela Jehofa.Ke tla thaba ka baka la Modimo yo a mphološago.
19 Mmuši Morena Jehofa ke matla a ka.O tla dira gore maoto a ka a be le lebelo go swana le a kgama,*A ba a dira gore ke sepele mafelong ao a lego godimo.
Mengwalo ya tlase
^ Goba mohlomongwe, “Mehleng ya rena.”
^ Goba mohlomongwe, “Mehleng ya rena.”
^ Bona Tlhaloso ya Mantšu.
^ Goba, “bolwetši bja letadi.”
^ Go ka direga gore badudi ba Kushane e be e le ditlogolo tša Kushe.
^ Goba mohlomongwe, “Mesebe.”
^ “Kgama” ke phoofolo yeo e nyakilego go swana le phala.
