Hagai 1:1-15
1 Ka letšatši la pele la kgwedi ya botshelela ngwageng wa bobedi wa ge go buša Kgoši Dario, Jehofa o ile a diriša moporofeta Hagai gore a botše Serubabele morwa wa Shealatiele mmuši wa Juda le Joshua morwa wa Jehosadaka moperisita yo a phagamego molaetša wo o rego:
2 “Jehofa wa madira o re: ‘Setšhaba se se re: “Nako ya gore ntlo ya Jehofa e agiwe ga se ya tšwa e fihla.”’”
3 Jehofa o ile a diriša moporofeta Hagai gape go bolela gore:
4 “Na ye ke nako ya gore le dule dintlong tša lena tše dibotse mola ntlo ya ka e senyegile?
5 Bjale Jehofa wa madira o re: ‘Hlokomelang dilo tšeo le di dirago.
6 Le bjetše peu e ntšhi, eupša le bunne ganyenyane. Le a ja, eupša ga le khore. Le a nwa, eupša ga le kgotsofale.* Le a apara, eupša ga le ruthele. Yo a šomago o tsenya mogolo wa gagwe ka pekeng ya go ba le mašoba.’”
7 “Jehofa wa madira o re: ‘Hlokomelang dilo tšeo le di dirago.’
8 “Jehofa o re: ‘Eyang thabeng le tleng le dikota. Ke moka le age ntlo ya ka e le gore ke e thabele e bile batho ba tle ba ntumiše ka go yona.’”
9 “Jehofa wa madira o re: ‘Le be le letetše go hwetša dilo tše dintšhi, eupša la hwetša tše dinyenyane, ge le di tliša ntlong ya ka nna ke ile ka dira gore di timelele. Ka baka la’ng? Ka gobane ntlo ya ka e senyegile eupša lena le swaregile ka go hlokomela dintlo tša lena.
10 Ke ka lebaka leo magodimo a sa le nešetšego phoka le lefase le sa medišego selo.
11 Ke ile ka dira gore naga ya lena le dithaba di dule di omeletše gomme go se ke gwa ba le mabele, beine, makhura le dimela. Lena le a tlaišega gotee le diruiwa tša lena gomme mošomo wa lena ke wa lefeela.’”
12 Serubabele morwa wa Shealatiele le Joshua morwa wa Jehosadaka, moperisita yo a phagamego, gotee le batho ka moka ba theetša lentšu la Jehofa Modimo wa bona le mantšu a moporofeta Hagai, ka gobane o be a romilwe ke Jehofa Modimo wa bona. Ka baka leo batho ba thoma go hlompha Jehofa kudu.
13 Hagai yo a bego a romilwe ke Jehofa, o ile a botša setšhaba molaetša wo o tšwago go Jehofa a re: “Jehofa o re: ‘Ke na le lena.’”
14 Jehofa o ile a hlohleletša Serubabele morwa wa Shealatiele mmuši wa Juda le Joshua morwa wa Jehosadaka moperisita yo a phagamego, gotee le batho ka moka gore ba yo thoma go aga ntlo ya Jehofa wa madira, yena Modimo wa bona.
15 E be e le letšatšing la bo-24 la kgwedi ya botshelela ngwageng wa bobedi wa ge go buša Kgoši Dario.
Mengwalo ya tlase
^ Phetolelo ya lentšu ka lentšu e re, “ga le tagwe.”
