Hagai 2:1-23
2 Ka letšatši la bo-21 la kgwedi ya bošupa, Jehofa o ile a botša moporofeta Hagai, a re:
2 “Hle botša Serubabele morwa wa Shealatiele, mmuši wa Juda le Joshua morwa wa Jehosadaka moperisita yo a phagamego gotee le batho ka moka, o re:
3 ‘Ke mang yo a gopolago gore ntlo ye e be e le e botse bjang peleng?* Gona bjale e bjang? Na le nagana gore e botse go swana le yela ya kgale?’
4 “Jehofa o re: ‘Ka gona eba le sebete wena Serubabele, le wena Joshua morwa wa Jehosadaka moperisita yo a phagamego, eba le sebete.’
“Jehofa o re: ‘Ebang le sebete lena batho ka moka ba naga gomme le šome.’
“‘Ka gobane ke na le lena,’ o re’alo Jehofa wa madira.
5 ‘Le se lebale seo ke le tshepišitšego sona ge le be le etšwa nageng ya Egepeta, e bile le gona bjale ke sa le hlahla ke diriša matla a ka. Le se ke la tšhoga.’”
6 “Se ke seo Jehofa wa madira a se boletšego: ‘E se kgale ke tlo šikinya magodimo le lefase le lewatle gotee le naga e omilego.’
7 “Jehofa wa madira o re: ‘Ke tla šikinya ditšhaba ka moka gomme dilo tše bohlokwa* tša ditšhaba ka moka di tla tla, gomme ke tla dira gore ntlo ye e tlale ka leta.’
8 “Jehofa wa madira o re: ‘Silifera ke ya ka le gauta ke ya ka.’
9 “Jehofa wa madira o re: ‘Ntlo ye e mpsha e tla ba le letago kudu go feta ya kgale.’
“‘Le gona ke tla dira gore go be le khutšo lefelong le,’ o realo Jehofa wa madira.”
10 Ka letšatši la bo-24 la kgwedi ya senyane ngwageng wa bobedi wa ge go buša Dario, Jehofa o boletše le moporofeta Hagai, a re:
11 “Se ke seo Jehofa wa madira a se boletšego: ‘Ke kgopela o botšiše baperisita gore molao o reng.
12 “Ge motho a ka phuthela nama e kgethwa ka seaparo sa gagwe, gomme seaparo seo sa kgwatha senkgwa goba sopo goba beine goba makhura goba sejo sa mohuta le ge e le ofe, na dijo tšeo e sa tlo dula e le tše kgethwa?”’”
Baperisita ba re: “Aowa!”
13 Hagai a re: “Ge e ba motho yo a šilafaditšwego ke go kgwatha setopo a ka kgwatha se sengwe sa dijo tše, na di tla šilafala?”
Baperisita ba araba ba re: “Di tla šilafala.”
14 Ke moka Hagai a araba a re: “Jehofa o re: ‘Ye ke tsela yeo ke bonago batho ba le setšhaba se. Dilo ka moka tšeo ba di dirago le dihlabelo tšeo ba di tlišago mo di šilafetše.
15 “‘Bjale hle, go tloga gona bjale go ya pele naganang ka se: Pele le thoma go aga tempele ya Jehofa,
16 go be go le bjang? Ka nako yeo ge motho a be a nyaka masaka a 20 a mabele, o be a hwetša a 10 feela. Ge a be a nyaka mabotlelo a 50 a beine, o be a hwetša a 20 feela.’
17 Jehofa o re: ‘Ke le otlile ka go dira gore mašemong a lena go be le phišo, bolwetši le sefako. Eupša ga go le o tee wa lena yoo a ilego a boela go nna.
18 “‘Hle, bonang gore go tla direga eng go tloga lehono go ya pele. Go tloga letšatšing la bo-24 la kgwedi ya senyane, ge go thongwa go agiwa fantešene ya tempele ya Jehofa, naganang ka se:
19 Ga go sa na peu ka ntlong ya bobolokelo. Moterebe, mogo, mogarenate le mohlware ga di sa enywa dienywa. Eupša ke tla le šegofatša go tloga letšatšing le.’”
20 Jehofa a bolela le Hagai la bobedi ka letšatši la bo-24 la kgwedi, a re:
21 “Botša Serubabele mmuši wa Juda o re: ‘Ke tla šikinya magodimo le lefase.
22 Ke tla wiša mebušo gomme ka amoga mebušo ya ditšhaba matla a yona. Ke tla wiša dikoloi le banamedi ba tšona, dipere ka moka di tla hwa gomme banamedi ba tšona ba tla bolayana ka lerumo.’”
23 “Jehofa wa madira o re: ‘Letšatšing leo, ke tla go tšea wena mohlanka wa ka Serubabele morwa wa Shealatiele,’ o realo Jehofa, ‘ka go swara bjalo ka palamonwana e bohlokwa, ka gobane ke wena yo ke go kgethilego,’ o realo Jehofa wa madira.”
Mengwalo ya tlase
^ Phetolelo ya lentšu ka lentšu e re, “Ke mang a gopolago gore ntlo ye e be e na le letago bjang peleng?”
^ Goba, “matsaka.”
