Hosea 10:1-15
10 “Isiraele e swana le moterebe o senyegago wo o enywago dienywa.
Ge dienywa tša gagwe di oketšega, le yena o oketša dialetare.Ge naga ya gagwe e huma, ke moo a dirago diphilara tše dibotse tše kgethwa.
2 Baisiraele* ba tletše boikaketši,Bjale ba tlo bonwa molato.
Dialetare tša bona di tlo thubiwa gomme diphilara tša bona tša pšhatlaganywa.
3 Bjale ba tla re: ‘Ga re na kgoši ka gobane ga se ra boifa Jehofa.
Ge e le kgoši yona e tla re direla’ng?’
4 Ba bolela mantšu a lefeela, ba dira dikeno tša maaka le dikgwerano.Kahlolo ya bona e tla tla bjalo ka sekoro seo se melago diforong tša mašemo.
5 Badudi ba Samaria ba tla tšhogela modimo wa namane wa Bethe-abene.
Batho bao ba o rapelago ba tlo o llela,Wa ba wa llelwa ke baperisita bao ba o thabelago le go o nea letago,Ka gobane o tla tlošwa go bona wa išwa bothopša.
6 Modingwana woo o tla išwa e le mpho go kgoši e kgolo ya Asiria.
Efuraime e tla hlabja ke dihlong,Gomme Isiraele e tla lewa ke dihlong ka gobane e theeditše keletšo ya bošilo.
7 Samaria le kgoši ya yona di tla fedišwaBjalo ka lekalana leo le robegilego leo le phaphametšego godimo ga meetse.
8 Go tla fedišwa mafelo a phagamego a Bethe-abene ao a dirago gore Isiraele e dire sebe.
Dialetare tša bona di tla mela meetlwa le ditshehlo.
Batho ba tla re go dithaba: ‘Re khupetšeng!’
Ba re go meboto: ‘Re weleng!’
9 Go tloga mehleng ya seo se diragetšego Gibea, lena bana ba Isiraele, le dirile sebe.
Ga sa nka la fetoga.
Batho ba go se loke ba kua Gibea ga sa nka ba fedišwa ke ntwa.
10 Le gona nka ba otla ge ke rata.
Batho ba meraforafo ba tla kgobokana gore ba lwe le bona,Gomme ba rwešwa melato ya bona e mebedi.
11 Efuraime e be e le kgomo ya tshadi* yeo e tlwaetšego go fola e bile e go rata,Ka gona ga se ka nyaka go gobatša molala wa yona ka go e rweša joko.
Bjale ke tla dira gore motho yo mongwe a namele* Efuraime a mo gapeletše go šoma.
Juda o tla lema gomme Jakobo a mo thubela makwate.
12 Bjalang peu ya lena ka toko gomme le bune botho bjo bogolo.*
Itemeleng naga e botseGo sa na le nako ya go tsoma Jehofa,Go fihlela a etla gomme a le ruta ka toko.
13 Eupša le bjetše dilo tše mpe,Gomme la buna go se loke.Le jele dienywa tša bofora,Ka gobane le itshepile kudu,Lena le bagale ba lena ba bantšhi.
14 Go tla tsoga mašata gare ga batho ba lena,Gomme metse ya lena ka moka yeo e šireleditšwego e tla senywaGo swana le ge Shalemane a ile a senya ntlo ya Arabele letšatšing la ntwa,Ge basadi le bana ba bona ba be ba bethwa go fihlela ba ehwa.
15 Lena ba Bethele, le tla dirwa ka yona tsela ye ka baka la bobe bja lena bjo bo feteletšego.
Ruri kgoši ya Isiraele e tla fedišwa e sa le ka masa.”
Mengwalo ya tlase
^ Goba, “dipelo tša Baisiraele.”
^ Ke gore, kgomo yeo e sego ya hlwa e tswala.
^ Goba “pane.”
^ Goba, “lerato le le botegago.”
