Hosea 8:1-14
8 “Letšang phalafala!
Go na le lenaba leo le tlago bjalo ka ntšhu go tlo lwa le batho ba Jehofa.*Ka gobane ba tshetše kgwerano yeo ke e dirilego le bona, e bile ba tshetše molao wa ka.
2 Ba a nkgoeletša ba re: ‘Wena o Modimo wa rena, rena re le Isiraele re a go tseba.’
3 Isiraele o tlogetše go dira tše dibotse.
Anke lenaba la gagwe le mo fenye.
4 Ba ipeetše dikgoši ba sa laelwa ke nna.
Ba ipeetše baetapele ke sa ba dumelela.
Ba itiretše medingwana ka silifera le gauta ya bona,Ka gona ba tlo fedišwa.
5 Wena Samaria, ke lahlile modingwana wa gago wa namane.
Ke go galefetše kudu.
O tla dula o na le molato go fihla neng?
6 Gobane namane yeo e be e etšwa Isiraele.
E betlilwe ke motho, e sego Modimo.Namane yeo ya Samaria e tla pšhatlaganywa.
7 Ba dira dilo tše mpe bjalo ka ge eka ba bjala phefo.Ka gona, ba tlo buna dilo tše mpe bjalo ka ge eka ba buna ledimo.
Dilo tšeo ba di bjetšego ga di tšweletše selo.Dilo tšeo di metšego ga di tšweletše dijo.
Le ge di ka tšweletša dijo, di tlo jewa ke bao ba tšwago dinageng tše dingwe.
8 Baisiraele ba tla fedišwa.
Ba tlo ba bjalo ka sebjana seo se se nago moholaGare ga ditšhaba.
9 Ka gobane ba ile Asiria bjalo ka pitsi ya tšhikanoši.
Efuraime e patetše basadi ba diotswa gore e robale le bona.
10 Le ge basadi bao ba etšwa ditšhabeng tše dingwe,Ke tlo ba kgoboketša.Ba tla tlaišega ka baka la merwalo yeo ba e rwešitšwego ke kgoši le baetapele ba bona.
11 Efuraime o okeditše dialetare gore a dire sebe.
O diriša dialetare tšeo go dira sebe.
12 Ke mo ngwaletše melao e mentšhi,Eupša ga a na taba le yona.
13 Ba dira dihlabelo gomme ba ja nama ya tšona,Eupša Jehofa ga a di amogele.
Bjale o tlo gopola diphošo tša bona gomme a ba otlela dibe tša bona.
Ba boetše Egepeta.*
14 Isiraele o lebetše Mmopi wa gagwe e bile o agile ditempele,Gomme Juda a oketša metse e šireleditšwego.
Eupša ke tla otla metse ya gagwe ka mollo,Gomme o tla fiša ditora tša motse o mongwe le o mongwe.”
Mengwalo ya tlase
^ Phetolelo ya lentšu ka lentšu e re, “ba ntlo ya Jehofa.”
^ Goba mohlomongwe, “ba tlo boela Egepeta.”
