Jeremia 31:1-40
31 Jehofa o re: “Ka nako yeo ke tla ba Modimo wa malapa ka moka a Baisiraele, gomme bona e tla ba batho ba ka.”
2 Jehofa o re:
“Batho bao ba phologilego go bolawa ka sabola ba ile ba gaugelwa lešokeng,Ge Baisiraele ba be ba sepela gore ba hwetše lefelo leo ba ka khutšago go lona.”
3 Jehofa o ile a iponagatša go nna a le kgole, a re:
“Ke go ratile ka lerato leo le sa felego.
Ke ka baka leo ke ilego ka go botegela* gomme ka go gogela go nna.
4 Ke tla go aga gape, gomme wa boela wa ba setšhaba.
Wena morwedi wa Isiraele, o tla tšea meropa ya gago gapeGomme wa yo bina o thabile.
5 Le gona le tla bjala gape mašemo a diterebe dithabeng tša Samaria,Balemi ba tla a lema, gomme ba ipshina ka go ja dienywa tša ona.
6 Ka gobane go tla letšatši leo batho bao ba letago motse ba le dithabeng tša Efuraime ba tlago go goeletša ba re:
‘Emang, a re yeng thabeng ya Tsione, moo Jehofa Modimo wa rena a lego gona.’”
7 Ka gobane Jehofa o re:
“Opelelang Jakobo le thabile.
Goeletšang le thabile ka gobane le phagametše ditšhaba tše dingwe.
Bolelang molaetša woo gomme le rete Modimo le re:‘Wena Jehofa, phološa batho ba gago, bona Baisiraele bao ba šetšego.’
8 Ke ba buša ba etšwa nageng ya ka leboa.
Ke tla ba kgoboketša go tšwa dikarolong tša kgole kudu tša lefase.
Gare ga bona go tla be go na le bao ba foufetšego, bao ba golofetšego,Basadi ba baimana le bao ba belegago.
Ba tla boela mo e le ba bantšhi kudu.
9 Ba tla tla ba lla.
Ke tla ba tliša ba dutše ba le gare ba kgopela go gaugelwa.
Ke tla ba hlahla ka ba iša dinokaneng tša meetse.Ke tla dira gore ba sepele tseleng e botse yeo e ka se dirego gore ba kgopše.
Ka gobane ke nna Tatago Isiraele, gomme Efuraime ke morwa wa ka wa mathomo.”
10 Lena ditšhaba, ekwang seo Jehofa a se bolelago,Gomme le boleleng seo dihlakahlakeng tša kgole, le re:
“Yo a gašantšego Baisiraele o tla ba kgoboketša gape.
O tla ba hlokomela go swana le ge modiši a diša mohlape wa gagwe.
11 Ka gobane Jehofa o tla rekolla ditlogolwana tša Jakobo,Le go di phološa go yo a di fetago ka matla.
12 Ba tla tla gomme ba goeletša ba thabile thabeng ya Tsione,Difahlego tša bona di tla thaba ka baka la dilo tše dibotse tšeo di tšwago go Jehofa,Le ka baka la mabele, beine e mpsha le makhura,Diputšane, dikwana le dinamane.
Ba tla swana le serapa seo se nošetšwago gabotse,Gomme ba ka se tsoge ba omelela gape.”
13 “Ka nako yeo dikgarebe di tla bina di thabile,Tšona gotee le masogana le bakgalabje.
Ke tla fetoša sello sa bona gore e be lethabo.
Ke tla ba homotša gomme ka dira gore ba thabe go e na le gore ba lle.
14 Ke tla nea baperisita dijo tše dintšhi,Gomme batho ba ka ba tla kgotsofatšwa ke go loka ga ka,” o realo Jehofa.
15 “Jehofa o re:
‘Go kwagala lentšu la sello kua Rama, go kwagala sello seo se kwešago bohloko.
Ragele o llela bana ba gagwe.
Ga a nyake le go homotšwa ka baka la bana ba gagwe,Ka gobane ga ba sa le gona.’”
16 Jehofa o re:
“‘Homola hle, o phumole megokgo,Ka gobane ke tlo go putsa ka seo o se dirilego,’ o realo Jehofa.
Bana ba gago ba tla boa go tšwa nageng ya lenaba.’
17 “‘Go sa na le se sengwenyana seo o ka holofelago gore se tla direga nakong e tlago,
Bana ba gago ba tla boela nageng ya bona,’ o realo Jehofa.”
18 “Ruri ke kwele Efuraime a lla a re:‘Go no swana le namane yeo e sego ya tlwaetšwa, o nkotlile,Gomme nna ka lokiša diphošo tša ka.
Mpušetše go wena, gomme nna ke tla boa ntle le go senya nako,Ka gobane o Jehofa Modimo wa ka.
19 Ka morago ga gore ke boe ke ile ka itshola,Le gona ka morago ga gore o ntire gore ke kwešiše, ke ile ka nyama kudu.*
Ka baka la dilo tšeo ke di dirilego ke sa le yo moswa,Ke ile ka hlabja ke dihlong e bile ka ikwa ke tlontlolotšwe.’”
20 “Na Efuraime ga se morwa wa ka yo bohlokwa, yena ngwana yo ke mo ratago kudu?
Ka gobane le ge ke mo kgalema gantšhi, ke sa dutše ke mo gopola.
Ke ka baka leo ke huduegilego ka baka la gagwe.
Ruri ke tla mo kwela bohloko,” o realo Jehofa.
21 “Ipeele maswao mo tseleng,Gomme o hlome maswao.
Lebeledišiša tsela e kgolo, e lego tsela yeo o tlago go sepela ka yona.
Boa wena morwedi wa Isiraele. Boela metseng ye ya gago.
22 O tla ya kua le kua go fihlela neng, wena morwedi wa go se tshepege?
Ka gobane Jehofa o dirile selo se sengwenyana se seswa lefaseng:
Mosadi o tla nyaka monna ka mahlo a mahwibidu.”
23 Jehofa wa madira, yena Modimo wa Isiraele, o re: “Ba tla bolela mantšu a gape nageng ya Juda le metseng ya yona, ge ke kgoboketša gape batho ba bona bao ba bego ba thopilwe, ba re: ‘Anke Jehofa a le šegofatše, lena bao le lego lefelo leo batho ba hwetšago go loka go lona, yona thaba e kgethwa.’
24 Go tla ba le batho bao ba dulago Juda le metseng ya yona ka moka, gomme balemi le badiši ba tla dula moo ka khutšo.
25 Ke tla matlafatša bao ba lapilego, gomme bao ba fokolago ka ba nea seo ba se hlokago.”
26 Ka gona ka phafoga ka lebaleba, ge e le boroko bja ka bjona bo be bo tsefa.
27 Jehofa o re: “Tsebang gore go tla nako yeo ka yona ke tla dirago gore batho ba setšhaba sa Isiraele le sa Juda e be ba bantšhi. Ke tla dira le gore diruiwa tša bona e be tše dintšhi.
28 “Go swana le ge ke ile ka nyaka ditsela tša go ba tumola, go ba kgereša, go ba fediša, go ba phušola le go ba senya, ke tla nyaka le ditsela tša go ba aga le go ba bjala,” o realo Jehofa.
29 “Nakong yeo ba ka se sa re: ‘Botate ke bona ba jelego diterebe tša go se butšwe, eupša meno a barwa ba bona ke ona a šiišegago.’
30 Eupša ka nako yeo yo mongwe le yo mongwe o tla hwa ka baka la molato wa gagwe. Motho yo mongwe le yo mongwe yo a tlago go ja diterebe tša go se butšwe, ke yena meno a gagwe a tlago go šiišega.”
31 Jehofa o re: “Tsebang gore go tla nako yeo ka yona ke tlago go dira kgwerano e mpsha le setšhaba sa Isiraele le sa Juda.
32 E ka se swane le kgwerano yeo ke e dirilego le borakgolokhukhu ba bona letšatšing la ge ke be ke ba swara ka seatla ke ba hlahla gore ke ba ntšhe nageng ya Egepeta. Jehofa o re: ‘Ba ile ba roba kgwerano ya ka le ge ke be ke le mong wa bona wa nnete.’”
33 “Kgwerano yeo ke tlago go e dira le batho ba setšhaba sa Isiraele ka morago ga nako yeo, ke ye: Ke tla bea molao wa ka ka gare ga bona gomme ka o ngwala dipelong tša bona. Ke tla ba Modimo wa bona gomme bona e tla ba setšhaba sa ka,” o realo Jehofa.
34 “Motho a ka se sa ruta motho yo mongwe le ngwanabo a re: ‘Tsebang Jehofa,’ ka gobane ka moka ga bona ba tla be ba ntseba, go tloga ka ba maemo a fase go fihla ka ba maemo a godimo, ka gobane ke tla ba lebalela molato wa bona e bile nka se sa gopola sebe sa bona,” o realo Jehofa.
35 Jehofa yo a dirilego letšatši gore le re fe seetša mosegare,Yo a filego ngwedi le dinaledi melao ya gore di re fe seetša bošego,Yena yo a huduago lewatleGomme a dira gore maphoto a lona a dume,Yoo leina la gagwe e lego Jehofa wa madira, o re:
36 “‘Ka ge melao ya ka e ka se tsoge ya hloka mohola,Gona ditlogolwana tša Isiraele di tla dula e le setšhaba mo pele ga ka,’ o realo Jehofa.”
37 Jehofa o re: “‘Go no swana le ge go ka se kgonege gore magodimo a metwe, gomme metheo ya lefase e nyakišišwe, gona le nna nka se gane batho ba ka moka ba setšhaba sa Isiraele go sa šetšwe dilo ka moka tšeo ba di dirilego,’ o realo Jehofa.”
38 Jehofa o re: “Tsebang gore go tla nako yeo ka yona motse o tlago go agelwa Jehofa go tloga Lebotong le Letelele la Hananele go fihla Keiting Yeo e Lego Khoneng.
39 Go tloga moo thapo ya go meta e tla ya thwii mmotong wa Garebe, gomme ya khonela thoko tša Goa.
40 Le gona moedi ka moka wo go lahlelwago diphoofolo tše di hwilego le melora, gotee le mašemo ka moka go fihla Moeding wa Kidirone, go ba go fihla Keiting ya Dipere yeo e lego ka bohlabela, lefelo leo ka moka e tla ba le lekgethwa go Jehofa. Le ka se tsoge la fedišwa gape goba la senywa gape.”
