Jeremia 39:1-18
39 Ka ngwaga wa senyane wa ge go buša Kgoši Tsedekia wa Juda, kgweding ya lesome, Kgoši Nebukadinetsara wa Babilona le mašole a gagwe ka moka ba ile ba tla motseng wa Jerusalema gomme ba o dikologa e le gore ba o hlasele.
2 Ka letšatši la senyane la kgwedi ya bone ngwageng wa bo-11 wa ge go buša Tsedekia, ba ile ba phušola leboto la motse.
3 Dintona ka moka tša kgoši ya Babilona tša tla gomme tša dula fase Keiting ya Gare. Tšona e be e le Neregala-sharetsere wa Mosamagara, Nebo-Saresekima yo e bego e le mohlanka yo mogolo wa ka mošate,* Neregala-sharetsere yo e bego e le Morabemaga* le dintona tše dingwe ka moka tša kgoši ya Babilona.
4 Ge Kgoši Tsedekia wa Juda le mašole a gagwe ka moka ba bona dintona tšeo, ba tšhaba, ba tšwa motseng bošego ba diriša tsela ya serapa sa kgoši, ba feta keiting yeo e lego magareng ga maboto a mabedi, gomme ba tšama ba sepela ka tsela ya Araba.
5 Eupša mašole a Bakaladea a ba rakediša, gomme a swara Tsedekia leganateng la Jeriko. Ke moka a mo tšea a mo iša go Kgoši Nebukadinetsara wa Babilona kua Ribila nageng ya Hamathi, moo a ilego a mo ahlola gona.
6 Ke moka kgoši ya Babilona ya laela gore barwa ba Tsedekia ba bolawe pele ga Tsedekia kua Ribila, ya laela le gore bakgomana ka moka ba Juda ba bolawe.
7 Ya ntšha mahlo a Tsedekia gomme ka morago ga moo ya mmofa ka diketane tša koporo gore e mo iše Babilona.
8 Bakaladea ba fiša ntlo ya kgoši le dintlo tša batho ka moka, gomme ba phušola maboto a Jerusalema.
9 Nebusaradani yo e bego e le molaodi wa batho ba go leta, o ile a tšea batho ka moka bao ba bego ba šetše motseng a ba iša bothopša Babilona. A tšea le batho bao ba bego ba tšhabetše go yena, gotee le motho le ge e le ofe yo a bego a šetše.
10 Eupša Nebusaradani molaodi wa batho ba go leta, o ile a tlogela ba bangwe ba batho bao ba diilago kudu nageng ya Juda, e lego bao ba bego ba hloka le pudi ya leleme le letala. Letšatšing leo o ile a ba nea le mašemo a diterebe le mašemo ao ba ka šomago go ona.
11 Bjale Kgoši Nebukadinetsara wa Babilona a nea Nebusaradani molaodi wa batho ba go leta ditaelo mabapi le Jeremia a re:
12 “Mo tšee gomme o mo hlokomele. O se ke wa ba wa mo gobatša, e bile o mo nee selo le ge e le sefe seo a go kgopelago sona.”
13 Ka gona, Nebusaradani e lego molaodi wa batho ba go hlokomela motse, Nebushasabani yo e bego e le mohlanka yo mogolo wa ka mošate, Neregala-sharetsere yo e lego Morabemaga le banna ba bagolo ka moka ba kgoši ya Babilona ba ile ba romela molaetša
14 wa gore Jeremia a tlišwe Lapeng la Motho wa go Leta, gomme a neelwe go Gedalia morwa wa Ahikama yo e lego morwa wa Shafane, gore a mo tliše ntlong ya gagwe. Ka gona Jeremia a thoma go phela gare ga batho ba bangwe.
15 Ge Jeremia a be a sa tswaleletšwe Lapeng la Motho wa go Leta, Jehofa o ile a bolela le yena a re:
16 “Eya o botše Ebede-meleke wa Moethiopia o re: ‘Jehofa wa madira, yena Modimo wa Isiraele, o re: “Bjale ke phethagatša seo ke se boletšego mabapi le motse wo, gore ke tlo o tlišetša masetlapelo, e sego dilo tše dibotse, gomme letšatšing leo o tlo bona seo se direga.”’
17 “‘Eupša letšatšing leo ke tla go phološa, e bile o ka se neelwe bathong bao o ba tšhabago,’ o realo Jehofa.
18 “‘Ruri ke tla go phološa, o ka se bolawe ka sabola. O tla phološa bophelo bja gago ka gobane o ntshepile,’ o realo Jehofa.”
