Jeremia 42:1-22
42 Ke moka balaodi ka moka ba mašole, Johanana morwa wa Karea, Jesania morwa wa Hoshaya gotee le batho ka moka, go tloga ka ba maemo a tlasana go fihla ka ba maemo a godimo, ba batamela
2 moporofeta Jeremia gomme ba re go yena: “Hle re kgopela gore o re kwe ge re go kgopela gore o re kwele bohloko, gomme o re rapelele go Jehofa Modimo wa gago, o rapelele le batho ba ka moka bao ba šetšego, ka ge le wena o bona gore bao ba šetšego ke ba sego kae.
3 Anke Jehofa Modimo wa gago a re botše tsela yeo re swanetšego go sepela ka yona le seo re swanetšego go se dira.”
4 Ke moka moporofeta Jeremia a ba araba a re: “Ke le kwele, gomme ke tla rapela Jehofa Modimo wa lena go ya le ka mokgwa wo le kgopetšego ka gona, e bile selo se sengwe le se sengwe seo Jehofa a le arabago sona, ke tla le botša sona. Nka se tlogele le selo setee.”
5 Bona ba araba Jeremia ba re: “Anke Jehofa e be hlatse ya nnete le yeo e tshepegago go rena, ge e ba re sa dire go ya le ka mokgwa woo Jehofa Modimo wa gago a re laelago gore re dire ka gona a diriša wena.
6 Go sa šetšwe gore seo Jehofa Modimo wa rena a se bolelago re a se rata goba ga re se rate, re tla mo kwa, yena yo re go romago go yena e le gore dilo di re sepelele gabotse ka ge re ekwa seo Jehofa Modimo wa rena a se bolelago.”
7 Bjale ka morago ga matšatši a lesome Jehofa o ile a bolela le Jeremia.
8 Ka gona Jeremia a bitša Johanana morwa wa Karea le balaodi ka moka ba mašole bao ba bego ba na le yena gotee le batho ka moka, go tloga ka ba maemo a tlasana go fihla ka ba maemo a godimo.
9 A re go bona: “Jehofa Modimo wa Isiraele, yoo le nthomilego go yena gore ke yo mo kgopela gore a le gaugele, o re:
10 ‘Ge e ba ka nnete le tla dula le le nageng ye, gona ke tla itshola ka baka la masetlapelo ao ke le tlišeditšego ona, gomme ke tla le aga, ka se le phušole, ka le bjala gomme nka se le tumole.
11 Le se ke la tšhošwa ke kgoši ya Babilona yeo le e boifago.’
“Jehofa o re: ‘E se ke ya le tšhoša, ka gobane ke na le lena, gore ke le phološe le go le hlakodiša go yona.
12 Le gona ke tla le gaugela, gomme kgoši yeo le yona e tla le gaugela ya ba ya le bušetša nageng ya lena.
13 “‘Eupša ge e ba le ka re: “Aowa, re ka se dule nageng ye,” gomme la se kwe Jehofa Modimo wa lena,
14 ka go bolela gore: “Re tla ya nageng ya Egepeta, moo re ka se bonego ntwa goba go kwa modumo wa lenaka goba ra bolawa ke tlala, gona moo ke gona mo re tlago go dula gona,”
15 gona ekwang seo Jehofa a se bolelago, lena bao le šetšego ba Juda. Jehofa wa madira, yena Modimo wa Isiraele, o re: “Ge e ba le ikemišeditše go ya Egepeta gore le yo dula moo,
16 gona yona sabola yeo le e tšhabago e tla le hwetša nageng yona yeo ya Egepeta, gomme tlala yona yeo le e tšhabago e tla le latela Egepeta gomme la hwela moo.
17 Le gona batho ka moka bao ba ikemišeditšego go ya Egepeta gore ba yo dula moo, ba tla bolawa ka sabola, tlala le bolwetši. Go ka se be le o tee wa bona yo a tlago go phologa masetlapelo ao ke tlago go ba tlišetša ona.”’
18 “Jehofa wa madira, yena Modimo wa Isiraele, o re: ‘Go no swana le ge ke ile ka galefa le go tukela bogale badudi ba Jerusalema, le lena ke tla le tukela bogale ge e ba le ka ya Egepeta, gomme le tla rogakwa, la tšhoša batho, la rogwa la ba la gobošwa, e bile le ka se tsoge le bone naga ye gape.’
19 “Lena batho bao le šetšego ba Juda, Jehofa o le boditše gore le se ke la ya Egepeta. Le se ke la lebala gore lehono ke le lemošitše gore
20 molato wa lena o tla dira gore le hwe. Ka gobane le nthomile go Jehofa Modimo wa lena, la re: ‘Re rapelele go Jehofa Modimo wa rena, ke moka o re botše dilo ka moka tšeo Jehofa Modimo wa rena a di bolelago gomme re tla di dira.’
21 Le gona ke le boditše se lehono, eupša la se kwe seo Jehofa Modimo wa lena a se bolelago, e bile la se dire selo le ge e le sefe seo a nthomilego gore ke le botše sona.
22 Bjale le tsebeng gabotse gore le tla bolawa ka sabola, tlala le bolwetši nageng yeo le nyakago go ya go yona gomme la dula go yona.”
