Jeremia 5:1-31
5 Bjale eyang le ralale mekgotheng ya Jerusalema le bone, le tsebe le be le inyakele marekišetšong a yona ge e ba le ka hwetša motho,+ ge e ba go na le motho yo a bontšhago toka,+ yo a tsomago potego,+ gona ke tla lebalela Jerusalema.
2 Gaešita le ge ba ka re: “Re ikana ka Jehofa yo a phelago!” ge ba re’alo ba tla be ba ena ka maaka a matala.+
3 Wena Jehofa, na mahlo a gago ga a lebelele potego?+ O ba otlile,+ eupša ba se babje.+ O ba fedišitše.+ Ba ganne go amogela tayo.+ Ba thatafaditše difahlego tša bona go feta leswika.+ Ba ganne go goma.+
4 Ge e le nna ke be ke itše: “Ruri bona ke ba maemo a tlase. Ba dirile ka bošilo ka gobane ba hlokomologile tsela ya Jehofa, yona kahlolo ya Modimo wa bona.+
5 Ke tla ikela go ba bagolo gomme ke boledišane le bona;+ ka gobane bona ba swanetše go ba ba etše hloko tsela ya Jehofa, kahlolo ya Modimo wa bona.+ Ruri ka moka ga bona ba swanetše go ba ba robile joko; ba swanetše go ba ba ripagantše ditlemo.”+
6 Ke ka baka leo tau yeo e tšwago sethokgweng e ba hlasetšego, phiri ya leganata e ba bolayago,+ lepogo le ba lalelago metseng ya bona.+ Yo mongwe le yo mongwe yo a tšwago go yona o a rathaganywa. Ka gobane dikarogo tša bona ke tše dintši; ditiro tša bona tša go se botege di atile.+
7 Nka go lebalela bjang ka baka la sona se? Bana ba gago ba ntlogetše, ba dulela go ena+ ka seo e sego Modimo.+ Ke ile ka ba kgotsofatša+ ka mehla, eupša bona ba dulela go hlotlola,+ ba ya ka dihlopha ntlong ya mosadi wa go gweba ka mmele.
8 Ba fetogile dipere tšeo di fišegelago go goela, tša go ba le dithaka tša botona tša go tia. Yo mongwe le yo mongwe o lla wa pere a llela mosadi wa mogagabo.+
9 “Na nka se go sekiše ka baka la dilo tšona tše?” o re’alo Jehofa.+ “Goba na moya wa ka o ka se itefeletše setšhabeng sa mohuta wo?”+
10 “Rotogang le hlasele mašemo a yona a merara le a senye,+ eupša le se ke la a fedišetša sa ruri.+ Tlošang makala a yona a matala, ka gobane ga se a Jehofa.+
11 Ka gobane ba ntlo ya Isiraele le ba ntlo ya Juda ruri ba nthadiile,” o re’alo Jehofa.+
12 “Ba latotše Jehofa, ba re: ‘Ga a gona.+ Re ka se welwe ke bošula, e bile re ka se bone tšhoša goba tlala.’+
13 Baporofeta bona ba fetogile phefo gomme ga go lentšu la therešo go bona.+ Ka gona anke seo ba se bolelago se dirwe go bona.
14 Ka gona se ke seo Jehofa, Modimo wa madira, a se boletšego: “Ka ge lena le bolela se, bjale mantšu a ka a lego molomong wa lena ke a fetoša mollo,+ le gona batho ba e tla ba dikgong gomme mollo o tla ba ja.”+
15 “Bjale ke le tlišetša setšhaba se se tšwago kgole,+ lena ba ntlo ya Isiraele,” o re’alo Jehofa. “Ke setšhaba sa bogologolo.+ Ke setšhaba sa kgalekgale, setšhaba seo le sa tsebego leleme la sona, gomme le ka se kwešiše seo se se bolelago.
16 Kgotlopo ya bona e etša mabitla a ahlamego; ka moka ga bona ke bagale.+
17 Le gona ba tla ja senkgwa sa lena le tše le di bunnego ba di fetša.+ Banna ba gona ba ja barwa le barwedi ba lena ba ba fetša. Ba ja mehlape ya lena ya dihuswane le ya dikgomo ba e fetša. Ba ja morara wa lena le mogo+ wa lena ba e fetša. Metse ya lena e šireleditšwego yeo le e botilego ba tla e pšhatlaganya ka tšhoša.”
18 “Gaešita le mehleng yeo,” o re’alo Jehofa, “lena nka se ke ka le fediša.+
19 Le tla re: ‘Ke ka baka la’ng Jehofa Modimo wa rena a re dirile tše ka moka?’+ Wena o tla re go bona: ‘Bjalo ka ge le ntlogetše la yo hlankela modimo wa lena o šele nageng ya gabo lena, ka mo go swanago le tla hlankela bašele nageng yeo e sego ya gabo lena.’”+
20 Botšang ba ntlo ya Jakobo se gomme le se tsebatšeng Juda, le re:
21 “Bjale ekwang se lena batho ba sa hlalefago ba go hloka pelo,+ bao ba nago le mahlo, fela ba sa bone,+ bao ba nago le ditsebe, eupša ba sa kwe.+
22 ‘Na ga le mpoife,’+ o re’alo Jehofa, ‘goba na ga le mahlokong a magolo ka baka la ka,+ nna ke beilego lešabašaba go ba mollwane wa lewatle, e lego taelo ya neng le neng ya gore le se fete moo? Le ge maphoto a lona a tšokotšega, fela a ka se tshele moo; le ge a ka duma, fela a ka se fete moo.+
23 Eupša batho ba bona ba na le pelo e ngangabetšego le e rabelago; ba arogile gomme ba sepela tseleng ya bona.+
24 Eupša dipelong tša bona ga se ba ka ba re: “Bjale anke re boifeng Jehofa Modimo+ wa rena, Yena yo a nešago pula ya matlorotloro le yo a neago dipula tša lehlabula le tša seruthwane sehleng sa gona,+ Yena yo a šetšago dibeke tše di beilwego gore re bune ka tšona.”+
25 Melato ya lena e tšhabišitše dilo tše gomme dibe tša lena di le hlokišitše tše dibotse.+
26 “‘Gobane gare ga batho ba ka go hweditšwe batho ba kgopo.+ Ba dulela go hlolela go etša ge batanyi ba dinonyana ba di laletše.+ Ba reile moreo o kotsi. Ba tanya batho.
27 Dintlo tša bona di tletše bofora go etša serobe se se tletšego dinonyana.+ Ke ka baka leo e lego ba bagolo e bile ba humago.+
28 Ba nonne;+ ba a phadima. Ba bile ba falala ka dilo tše mpe. Ga go molato wo ba o sekilego,+ gaešita le molato wa tšhiwana,+ e le gore ba tle ba atlege;+ badiidi ga se ba ba ahlolela.’”
29 “Na nka se go sekiše ka baka la dilo tšona tše?” o re’alo Jehofa. “Goba na moya wa ka o ka se itefeletše setšhabeng sa mohuta wo?+
30 Nageng go tlišitšwe boemo bjo bo tlabago, e lego selo se se boifišago:+
31 Baporofeta ba porofeta maaka;+ ge e le baperisita ba gatelela batho.+ Batho ba ka bona ba rata sona se;+ mafelelong lena le tla dira’ng?”+