Jesaya 10:1-34
10 Go madimabe bao ba beago melao e gatelelago,Bao ba dulelago go ngwala melao yeo e bakelago ba bangwe mathata,
2 E le gore ba se ke ba theetša melato ya batho ba maemo a tlasana,Le go dira gore bao ba hlakišwago setšhabeng ba se ke ba ahlolwa ka toka,Gotee le go tšea dithoto tša bahlologadiLe go tšeela ditšhiwana dilo tša bona!
3 Le tla dira’ng letšatšing la kahlolo,La ge yo a le fedišago a etšwa kgole?
Le tla tšhabela go mang gore le thušwe,Le gona le tla tlogela mahumo a lena kae?
4 Ga go seo le ka se dirago ntle le gore le no dula gare ga bagolegwaGoba le wele gare ga bao ba bolailwego.
Ka baka la dilo tše ka moka Modimo o tla dula a le galefetše,E bile o tla dula a otlollotše seatla sa gagwe gore a le otle.
5 “Bonang Moasiria,Yena yo e lego kgati yeo ke e dirišago go bontšha matla a ka,Le molamo wo ke o dirišago go bontšha gore ke tukile bogale kudu.
6 Ke tla mo roma gore a yo lwa le setšhaba seo se hlanogetšego Modimo,Gore a yo hlasela batho bao ba nkgalefišitšego.Ke tla mo laela gore a tšee dithoto tše dintšhi kudu le go di thopa,Gomme a gatakele setšhaba seo go swana le maraga ao a lego diterateng.
7 Eupša Moasiria a ka se nyake go dira seo,Le pelong ya gagwe a ka se nagane go se dira,Ka gobane yena mo pelong ya gagwe o ikemišeditše go fedišaDitšhaba tše dintšhi a be a di pšhatlaganye.
8 Ka gobane yena o re:‘Na kgane dintona tšeo di ntlhankelago ga se tšona dikgoši?
9 Na Kalino ga e swane le Karakemishi?
Na Hamathi ga e swane le Arapadi?
Na Samaria ga e swane le Damaseko?
10 Go no swana le ge ke ile ka otla mebušo yeo e rapelago medingwana ya go hloka mohola,Yeo diswantšho tša yona tšeo di betlilwego e lego tše dintšhi go feta tša Jerusalema le Samaria,
11 Na nka se dire Jerusalema le medingwana ya yonaGona ka mokgwa wo ke dirilego Samaria le medimo ya yona ya go se re selo?’
12 “E tla re ge nna Jehofa ke fetša mošomo wa ka ka moka Thabeng ya Tsione le Jerusalema, ke tla otla kgoši ya Asiria ka gobane e a ikgantšha, e a ikgodiša e bile e a ikgogomoša.
13 Ka gobane yona e re:‘Ke tla dira se ka matla a ka le bohlale bja ka ka gobane ke hlalefile.Ke tla tloša mellwane ya ditšhaba
Gomme ka tšea dithoto tša tšona tše bohlokwa.E bile ke tla fediša badudi ba tšona,Go no swana le ka mokgwa woo motho yo matla a dirago ka gona.
14 Ke tla tšea dilo tše bohlokwa ka moka tša ditšhabaGo no swana le ge motho a tsenya seatla ka sehlageng,Le go swana le ge motho a kgoboketša mae ao a tlogetšwego a se na mong,Ke tla kgoboketša dilo ka moka tša lefaseng.
Batho ka moka ba tla swana le dinonyana tšeo di sa kgonego go itwela.’”
15 Na selepe se ka ikgogomošetša motho yo a remago ka sona,
Goba na saga e ka ikgogomošetša motho yo a sagago ka yona?
Le gona na lepara le ka emišetša godimo motho yo a le swerego,
Goba na kgati e ka emišetša godimo motho yo a sego a dirwa ka kota?
16 Ka gona Morena wa nnete, yena Jehofa wa madira,O tla dira gore banna bao ba nonnego ba ote kudu,Gomme Asiria e ka se sa ba le letago, e tlo ba bjalo ka ge eka mollo o ile wa e tšhuma lorelore.
17 Seetša sa Isiraele se tla fetoga mollo,Gomme Modimo wa gagwe yo Mokgethwa a fetoga kgabo ya mollo.Mollo woo o tla tšhuma wa fetša ngwang le mehlašana ya meetlwa ya Moasiria ka letšatši letee.
18 Modimo o tla fedišetša sa ruri sethokgwa se sebotse sa Moasiria le serapa sa dienywa.Letago la Moasiria le tla hwelela go swana le motho yo a babjago yoo mmele wa gagwe o felago ganyenyane-ganyenyane ka baka la bolwetši bjo šoro.
19 Sethokgweng sa gagwe go tla šala mehlare e sego kaeYeo le mošemanyana a ka kgonago go e bala.
20 Letšatšing leo bao ba šetšego ba IsiraeleLe ditlogolwana tša Jakobo tšeo di phologilego,Ba ka se sa ithekga ka setšhaba seo se ba hlasetšego,Eupša ba tla ithekga ka Jehofa, yena Modimo yo Mokgethwa wa Isiraele,E bile ba tla mmotegela ka dipelo tša bona ka moka.
21 Go tla boa feela ditlogolwana tša Jakobo tšeo di šetšego,Tša boela go Modimo yo Matla.
22 Wena Isiraele,Le ge setšhaba sa gago e le se sentšhi go swana le santa ya lewatle,Go tla boa feela batho ba sego kae bao ba šetšego.
Kotlo ya go loka yeo Modimo a šetšego a phethile gore o tla e tlišetša setšhaba se,E tla ba wela go swana le mafula.
23 Ka gobane phetho yeo Mmuši Morena Jehofa wa madiraA šetšego a e dirile ya go le fediša e tla phethwa nageng ka moka.
24 Ka gona Mmuši Morena Jehofa wa madira o re: “Lena batho ba ka bao ba dulago Tsione, le se ke la boifa Baasiria bao ba bego ba le itia ka kgati le bao ba bego ba le emišetša lepara go swana le kamoo Baegepeta ba bego ba dira ka gona.
25 E se kgale kotlo ya ka e tla fela, gomme bogale bja ka bo tla fela ge Baasiria ba šetše ba fedišitšwe.
26 Jehofa wa madira o tlo ba itia ka sefepi, go swana le nakong ya ge a fenya Bamidiane leswikeng la Horebe. E bile lepara la gagwe o tla le emišetša godimo ga lewatle go swana le ge a ile a dira bjalo kua Egepeta.
27 “Letšatšing leo morwalo wa Moasiria o tla tloga magetleng a lena,Gomme joko ya gagwe ya tlošwa melaleng ya lena,Le gona joko yeo e tla robega ka baka la makhura.”*
28 Baasiria ba hlasetše Ayathe,Ba fetela Migirone,Gomme ba tlogela dithoto tša bona Mikimashe.
29 Ba fetile mo go tshelegago nokeng,Gomme ba robala Geba.Rama yona e a thothomela, ge e le badudi ba Gibea yeo e lego motse wa Saulo bona ba tšhabile.
30 Lena badudi ba Galime, goeletšang le be le lle.
Wena Laishe, theetša.
Le wena Anathothe yo a šokišago, theetša!
31 Badudi ba Madimana ba tšhabile.
Badudi ba Gebimi bona ba tšhabetše moo go šireletšegilego.
32 Lona letšatšing le Baasiria ba tla khutša Nobe.
Ba emišetša matsogo a bona thabeng ya motse wa TsioneE le gore ba tšhošetše thaba yeo Jerusalema e lego go yona.
33 Tsebang gore Morena wa nnete, yena Jehofa wa madira,O robaganya makala o šoro.Mehlare e meteleletelele e tla ripiwa,Gomme mehlare e metelele yona e tla rengwa.
34 O rema sethokgwa ka selepe,Gomme yo matla o tla wiša mehlare ya Libanoni.
Mengwalo ya tlase
^ Go ka direga gore makhura ao go bolelwago ka ona mo ke a go tšhuma mabone goba ao a bego a dirišwa ge dikgoši di kgethwa.
