Jesaya 11:1-16
11 Go tla mela lekala kutung ya Jese,Gomme medung ya gagwe go tla hloga lehlogedi leo le tlago go enywa dienywa.
2 Moya wa Jehofa o tla ba go yena.Ka baka leo o tla ba bohlale, a ba le kwešišo,A nea keletšo e botse, a ba le matla,A ba le tsebo e ntšhi, e bile a hlompha Jehofa kudu.
3 O tla thabela go hlompha Jehofa.
A ka se no ahlola go ya ka seo a se bonago,Goba a sola motho go ya ka seo a se kwago.
4 O tla ahlola batho ba maemo a tlase ka toka.O dira diphetho tše dibotse e le gore a šireletše batho bao ba ikokobeditšego.
Dilo tšeo a di bolelago di tla ba bjalo ka kgati yeo a tlago go e diriša go otla lefase,Gomme o tla bolaya batho ba babe ka mantšu a gagwe.*
5 Go loka e tla ba lepanta la dinoka tša gagwe,Gomme go tshepega ya ba lepanta la matheka a gagwe.
6 Phiri e tla dula le kwana,Nkwe e tla iketla le putšanyane,Namane le tau le phoofolo e nonnego di tla dula gotee,Gomme mošemanyana o tla di diša.
7 Kgomo le bere di tla fula gotee,Bana ba tšona ba tla robala gotee.
Tau le yona e tlo fula bjang go fo swana le poo.
8 Ngwana yo a sa nyantšhwago o tla ralokela moleteng wa noga e kotsi,*Gomme ngwana yo a tshwelego letswele o tla bea seatla sa gagwe moleteng wa noga ya mpholo.
9 Di ka se gobatše mothoGoba tša senya thabeng ka moka ya ka e kgethwa,Ka gobane lefase le tlo tlala ka batho bao ba tsebago Jehofa,Go no swana le ge meetse a tletše ka lewatleng.
10 Letšatšing leo motho yo e lego modu wa Jese e tla ba leswao go batho.
Ditšhaba di tla ya go yena gore di kgopele maele,Gomme lefelo leo a dulago go lona e tla ba la letago.
11 Letšatšing leo Jehofa o tla bontšha matla a gagwe ka lekga la bobedi gore a thuše batho ba gagwe bao ba šetšego Asiria, Egepeta, Patorose, Ethopia,* Elama, Shineara, Hamathi le dihlakahlakeng tša lewatle, gomme a ba buša go tšwa dinageng tšeo.
12 Modimo o tla emišetša ditšhaba folaga, gomme a kgoboketša Baisiraele bao ba gašanego dinageng tše dingwe. O tla kgoboketša Bajuda bao ba gašanego go tšwa lefaseng ka moka.*
13 Efuraime e ka se sa ba le mona,Gomme manaba a Bajuda a tlo fedišwa.
Efuraime e ka se jele Juda mona,Juda le yona e ka se be lenaba la Efuraime.
14 Batho ba Efuraime le batho ba Juda ba tla hlasela Bafilisita ka bodikela,Ba tla thopa batho ba ka Bohlabela.
Ba tla hlasela Edomo le Moaba,Gomme ba laola Baamoni.
15 Jehofa o tla aroganya karolo ya lewatle la Egepeta,Gomme o tla tšhošetša Noka ya Eforate ka seatla sa gagwe.
O tla diriša mohemo wa gagwe wo o fišago go dira gore dinokana tša yona tše šupago di gope,Gomme a dira gore batho ba tshele noka yeo ba apere dieta.
16 Go tla ba le tsela e kgolo yeo batho ba gago bao ba šetšego Asiria ba tlago go sepela ka yona,Go no swana le ge e ile ya ba gona letšatšing la ge Baisiraele ba be ba etšwa nageng ya Egepeta.
Mengwalo ya tlase
^ Phetolelo ya lentšu ka lentšu e re, “ka moya wa molomo wa gagwe.”
^ Goba, “peetla.”
^ Goba, Kushe.
^ Goba “dikhutlong tše nne tša lefase.”
