Jesaya 15:1-9
-
Molaetša wa mabapi le go ahlola Moaba (1-9)
15 Molaetša wo o lego mabapi le go ahlola Moaba šo:
Ari yeo e lego Moaba e rile tuu!Ka gobane e sentšwe bošego.
Kiri yeo e lego Moaba e rile tuu!Ka gobane e sentšwe bošego.
2 Batho ba rotogetše tempeleng le Diboni,Ba rotogetše le mafelong a phagamego gore ba yo lla.
Batho ba Moaba ba llela Nebo le Medeba.
Batho ka moka ba kotile dihlogo tša bona matwadi, e bile ba kotile ditedu.
3 Ba apere diaparo tše di bontšhago gore ba nyamile ba le diterateng tša motse woo.
Ka moka ga bona ba lla gabohloko ba le ditlhakeng tša dintlo tša bona le mebarakeng,Gomme ba theoga ba tšama ba lla.
4 Batho ba Heshibone le ba Eleale ba a goeletša,Mantšu a bona a kwagala go fihla Jahatsa.
Ke ka lebaka leo banna ba Moaba bao ba swerego dibetša ba duletšego go goeletša.
Setšhaba se a thothomela.
5 Pelo ya ka e llela Moaba.
Batho ba Moaba bao ba tšhabago ba tšhabetše Tsoare le Egilathe-shelishia.
Ba tšama ba lla ge ba rotoga mmotong wa Luhithe.Ge ba le tseleng yeo e yago Horonaima, ba tšama ba kgitla sello ka baka la masetlapelo.
6 Ka gobane meetse a Nimirimi a pšhele.Bjang bjo botala bo omile,Bjang ga bo sa le gona, e bile ga go na selo se setala seo se šetšego.
7 Ke ka lebaka leo ba rwalago diphahlo le mahumo ao ba šetšego ka ona,Ba tshelela le tšona ka mošola wa moedi wo o nago le mehlare ya mepopoliri.
8 Sello seo se kwagala tikologong ka moka ya Moaba.
E bile se kwagala le EgilaimiLe Beera-elima.
9 Ka gobane meetse a Dimone a tletše madi.Le gona go sa na le masetlapelo a mangwe ao ke tlago go a tlišetša batho ba Dimone.
Ke tla romela ditau tšeo di tlago go hlasela batho ba MoabaBao ba phologilego le bao ba šetšego nageng.
