Jesaya 22:1-25
22 Molaetša wo o lego mabapi le go ahlola Moedi wo go Bontšhwago Dipono go Wona šo:
Bothata bja gago ke eng ge batho ka moka ba nametše ditlhakeng tša dintlo?
2 Wena motse wa lešata le wo o thabilego,O be o tletše mpherefere.
Batho ba gago bao ba bolailwego ga se ba bolawa ka lerumo,E bile ga se ba hwela ntweng.
3 Batho ba gago ka moka bao ba gatelelago ba bangwe ba tšhabile gotee.
Batho ba ba golegile ntle le gore ba diriše bora.
Batho ka moka bao ba ilego ba hwetšwa ba golegilwe,Le ge ba be ba tšhabetše kgole.
4 Ke ka baka leo ke itšego: “Tlogelang go ntebelela,Ke tla lla gabohloko.
Le se ke la dulela go nyaka go nkhomotša.Ka baka la ge batho ba ka ba fedišitšwe.
5 Ka gobane le ke letšatši leo le tšwago go Mmuši Morena, yena Jehofa wa madira,E lego letšatši la go gakanega, la go fenywa le la go tlalelwaMoeding wo go Bontšhwago Dipono go Wona.
Go na le leboto leo le phušolwago,Gomme go kwala batho ba lla thabeng.
6 Batho ba Elama ba tšea mokotla wo o nago le mesebe,Gomme ba tla ba nametše dikariki tšeo di gogwago ke dipere.Batho ba Kiri bona ba tla ba swere kotse.
7 Meedi ya gago yeo e phalago e mengwe ka mokaE tla tlala ka dikariki tša ntwa,Ge e le dipere tšona di tla ema keiting.
8 Leboto leo le šireletšago Juda* le tla tlošwa.
“Letšatšing leo o tla lebelela thoko ya Ntlo ya Sethokgweng yeo go yona go bewago dibetša,
9 gomme le tla bona mašoba a mantšhi lebotong la Motse wa Dafida. Le gona le tla ga meetse letangwaneng la ka tlase.
10 Le tla bala dintlo tša Jerusalema, e bile le tla phušola le dintlo gore le tiiše leboto.
11 Le tla direla meetse a letangwana la kgale lefelo la go bolokela meetse magareng ga maboto a mabedi. Eupša le ka se tshepe Modiri wa lona yo Mogolo, e bile yo a le dirilego kgale le ka se mmone.
12 Letšatšing leo Mmuši Morena Jehofa wa madira,O tla laela batho gore ba lle, ba kwe bohloko kudu,Ba kote dihlogo e bile ba apare diaparo tšeo di bontšhago gore ba nyamile.
13 Eupša bona ba thabile e bile ba a ipshina,Ba hlaba dikgomo le dinkuBa ja nama e bile ba nwa beine.
Ba re: ‘A re jeng, a re nweng, ka gobane gosasa re tlo hwa.’”
14 Ke moka Jehofa wa madira o nkutollela taba ye ke theeditše a re: “‘Le ka se lebalelwe molato wo go fihlela le ehwa,’ se ke seo se bolelwago ke Mmuši Morena, yena Jehofa wa madira.”
15 Mmuši Morena Jehofa wa madira, o re: “Sepela o ye go Shebana yo a hlokometšego ntlo ya ka mošate gomme o re go yena:
16 ‘O kgahlwa ke eng mo, le gona na go na le motho wa geno mo ge o bile o ikepetše lebitla mo?’ Shebana o ikepela lebitla lefelong leo le phagamego, o ikepela lebitla leswikeng.
17 Le gona o mmotše o re: ‘Tseba gore Jehofa o tla go swara a tiišitše gomme a go lahlela fase gabohloko.
18 Ruri o tla go phuthaganya, a go fošetša nageng ya kgole go swana le ge kgwele e fošetšwa kgole. O tla hwela moo gomme dikariki tša gago tše di hlomphegago tša felela moo, ke moka seo sa dira gore ntlo ya mong wa gago e nyatšege.
19 Ke tla go tloša maemong a gago, gomme ka go raka mošomong wa gago.
20 “‘Letšatšing leo ke tla bitša mohlanka wa ka, e lego Eliakima morwa wa Hilikia.
21 Ke tla mo apeša seaparo sa gago, ka mo tlema ka lepanta la gago ka le tiiša, gomme ka mo nea matla ao o bego o na le wona. E tla ba tatago badudi ba Jerusalema le setšhaba sa Juda.
22 Ke tla bea senotlelo sa ntlo ya Dafida legetleng la gagwe, yena o tla bula gomme ga go na yo a tlago go tswalela. E bile o tla tswalela, gomme ga go na yo a tlago go bula.
23 Ke tla mo kokotela go swana le sepikiri seo se kokotetšwego lebotong leo le tiilego, gomme o tla ba bjalo ka setulo sa bogoši seo se nago le letago ntlong ya tatagwe.
24 Letago ka moka la ntlo ya tatagwe ba tla le fega godimo ga gagwe, godimo ga ditlogolo le ditlogolwana, godimo ga dibjana ka moka tše dinyenyane, dikotlelo le dinkgo ka moka tše dikgolo.
25 Jehofa wa madira o re: “‘Letšatšing leo, sepikiri seo se kokotetšwego lebotong leo le tiilego se tla tlošwa, sa robiwa gomme sa wa, ke moka dilo tšeo di bego di le go sona di tla wa gomme tša senyega, ka gobane se ke seo se boletšwego ke Jehofa.’”
Mengwalo ya tlase
^ Goba, “selo seo se širago Juda.”
