Jesaya 26:1-21
26 Letšatšing leo nageng ya Juda go tla opelwa koša ye:
“Re na le motse wo o tiilego.
Modimo o dira gore maboto a wona le mafelo a šireletšegilego a re phološe.
2 Bulang dikeiti,Gore setšhaba se se lokilego le seo se tshepegago se tsene.
3 O tla šireletša bao ba ithekgilego ka wena,O tla dira gore ba dule ba na le khutšo,Ka gobane ba tshepile wena.
4 Tshepang Jehofa ka dinako ka moka,Ka gobane Jah* yena Jehofa ke Leswika la go ya go ile.
5 “O kokobeditše batho bao ba ikgogomošago,* e lego wona motse wa go ikgogomoša.
O o theošetša fase,A o rapalatša fase lefaseng,A o wišetša fase leroleng.
6 Batho ba tla gatakela motse wo ka maoto a bona,Wa gatakelwa ke batho ba maemo a tlasana le ba go nyatšega.”
7 Tsela ya moloki ga se ya kgopama.
Wena ka ge o lokile,O tla tloša dilo tšeo di ka dirago gore motho yo a lokilego a kgopše.
8 Wena Jehofa, re tshepile wena ge re dutše re nyaka tsela ya go loka.Re rata leina la gago kudu,
E bile re duma okare le ka dula le gopolwa.
9 Ke letše ke go gopotše bošego ka moka ka pelo ya ka ka moka,Ke dula ke go nyaka ke sa kgaotše,Ka gobane ge o ahlola lefase,Batho bao ba dulago go lona ba ithuta go loka.
10 Gaešita le ge motho yo mobe a ka šokelwa,A ka se ke a ithuta go dira dilo tšeo di lokilego.
Le ge a ka ba nageng ya go loka, o tlo fo dira dilo tše mpe,E bile a ka se bone bogolo bja Jehofa.
11 Wena Jehofa, o emišitše letsogo la gago, eupša batho ba babe ga ba le bone.
Ba tla bona gore ga o nyake selo ka batho ba gago, gomme ba tla hlabja ke dihlong.
Mollo o tlo ja manaba a gago gomme wa a fetša.
12 Wena Jehofa, o tla re nea khutšo,Ka gobane dilo ka moka tšeo re di dirilegoRe kgonne go di dira ka baka la gago.
13 Wena Jehofa Modimo wa rena, ke nnete gore dikgoši tše dingwe ka ntle le wena di re bušitše,Eupša re dula re bolela ka leina la gago le nnoši.
14 Dikgoši tšeo di hwile, di ka se phele.
Ga di na matla,* di ka se kgone go tsoga.
Ka gobane o di otlile wa di fediša,Gomme wa dira gore di se sa gopolwa.
15 Wena Jehofa o okeditše setšhaba,O dirile gore e be se sentšhi,O itagafaditše.
O okeditše kudu mellwane ka moka ya naga.
16 Wena Jehofa, ge batho ba gago ba be ba le tlalelong, ba ile ba kgopela thušo go wena.Ge o be o ba laya, ba ile ba go rapela ka setu go tšwa pelong.
17 Go no swana le ge mosadi wa moimana yo a lego kgauswi le go belegaA goeletša ka ge a ekwa bohloko,Le rena o dirile gore re ikwe bjalo, wena Jehofa.
18 Re ile ra ima, ra ba le dihlabi tša go belega,Eupša go no swana le ge eka re belege phefo.
Ga se ra phološa naga,Gomme ga go na motho yo a belegego ngwana gore a tle a phele mo nageng.
19 Modimo o re: “Bahu ba gabo lena ba tlo phela gape.
Ditopo tša batho ba ka* di tlo phela gape.
Tsogang gomme le goeletše ka lethabo,Lena bao le ithobaletšego leroleng!
Phoka ya lena e swana le ya mesong.Gomme lefase le tla dira gore bao ba hwilego ba phele gape.
20 “Lena batho ba ka, sepelang le tseneng ka diphapošing tša lena tša ka gare,Gomme le tswaleleng mabati a lena ge le se no tsena.
Le khuteng ka nakwana,Go fihla bogale bja ka bo fetile.
21 Nna Jehofa ke tla ke etšwa lefelong la kaGore ke tlo sekiša badudi ba naga ka molato wa bona,Gomme naga e tla pepentšha madi ao a tšholotšwego go yona,E bile e ka se sa hlwa e uta batho bao ba bolailwego mo go yona.”
Mengwalo ya tlase
^ “Jah” ke tsela e kopana ya go bitša leina Jehofa.
^ Phetolelo ya lentšu ka lentšu e re, “bao ba dulago mo go phagamego, e lego motse o phagamego.”
^ Phetolelo ya lentšu ka lentšu e re, “Bao ba se nago matla ka ge ba hwile.”
^ Phetolelo ya lentšu ka lentšu e re, “Ditopo tša ka.”
