Jesaya 33:1-24
33 Go madimabe wena o fedišago ditšhaba eupša go se na yo a go fedišago,Wena yo a radiago ba bangwe eupša go se na yo a go radiago,
Ge o feditše go fediša ba bangwe, o tla fedišwa.
Ge o feditše go radia, o tla radiiwa.
2 Jehofa, re gaugele hle.
Re tshepile wena.
Re thekge ka letsogo la gago mesong e mengwe le e mengwe.Hle re phološe ge re tlaletšwe.
3 Batho ba a tšhaba ge ba ekwa lešata le legolo.
Ge o ema ditšhaba di a gašana.
4 Dilo tšeo le di tšerego ntweng di tla kgoboketšwa, go no swana le ge ditšie tšeo di senyago di kgobokana.Batho ba tla kitimela dilo tšeo go swana le ditšie tšeo di sepelago ka sehlopha.
5 Jehofa o tla phagamišwaKa gobane o dula godimo mo go phagamego.
O tla dira gore Tsione go tlale toka le go loka.
6 O tla dira gore le šireletšege,E bile seo se kgahlišago ke gore o le phološa ka tsela e kgolo,O le nea bohlale le tsebo le gore le boife Jehofa.
7 Bonang! Banna bao ba nago le sebete ba goeletša seterateng,Batho bao ba romilwego go yo dira khutšo ba lla gabohloko.
8 Ditsela tše dikgolo di sentšwe,Ga go sa na motho yo a sepelago ditseleng.
Lenaba le sentše kgwerano,Le ganne metse,Ga le na taba le motho le ge e le ofe.
9 Naga e a lla, e bile e omile.
Libanoni e hlabja ke dihlong e bile e bodile.
Ngwedi wa Sharona o swana le leganata,Gomme Bashani le Karamele di hlohlorega matlakala a tšona.
10 Jehofa o re: “Bjale ke tla ema,Ke tla bontšha matla a ka,E bile ke tla bontšha bogolo bja ka.
11 Le imile bjang bjo bo omilego e bile le tla belega mahlaka.
Mekgwa ya lena e mebe e tla le tšhuma ya le fetša go swana le mollo.
12 Ditšhaba di tla swana le molora.
Di tla fišwa ka mollo go swana le meetlwa yeo e remilwego.
13 Lena bao le lego kgole, ekwang seo ke tlago go se dira,
Gomme lena le lego kgauswi dumelang gore ke na le matla!
14 Badiradibe kua Tsione ba tšhogile,Batho bao ba hlanogetšego Modimo ba a thothomela,
Gomme ba re: ‘Ke mang mo go rena yo a ka dulago mollong o tšhumago?
Ke mang mo go rena yo a ka dulago malakabeng a mollo wo o sa timego?’
15 Ke motho yo a dulago a sepela tseleng ya go loka,Yo a bolelago tše di lokilego,Yo a ganago dilo tša go hloka nnete, yo a ganago go hwetša dilo ka boradia,Yo a ganago go tšea pipamolomo,Yo a sa nyakego le go kwa batho ba rera go tšholla madi,Le yo a tswalelago mahlo a gagwe gore a se ke a bona dilo tše mpe,
16 Ke yo a tlago go dula godimo dithabeng,Lefelo la gagwe leo le šireletšegilego le tla ba gare ga maswika ao go lego thata go fihla go ona.O tla newa dijo tša gagwe,Gomme meetse a gagwe a ka se fele.”
17 Mahlo a gago a tla bona kgoši yeo e nago le letago,A tla bona naga ya kgole.
18 Ka pelong ya gago o tla gopola selo seo se tšhošago gomme wa re:
“Mongwaledi o kae?
O kae yo a kadilego lekgetho?
O kae yo a badilego mafelo a šireletšegilego ao motho a ka tšhabelago go ona?”
19 O ka se sa bona batho ba mereba,Batho bao ba bolelago leleme leo le sa kwagalego gabotse,Bao ba bolelago leleme leo le sa tlwaelegago le leo go lego thata go le kwešiša.
20 Lebelela Tsione, e lego motse wo re ketekago menyanya ya rena go wona!
Mahlo a gago a tlo bona gore Jerusalema ke lefelo la go dula leo le nago le khutšo,Tente yeo go se nago motho yo a ka kgonago go e šuthiša.
Ga go na motho yo a tlago go ntšha dipikiri tša yona,E bile dithapo tša yona di ka se ripaganywe.
21 Eupša gona lefelong leo, Jehofa, Yena yo Mogolo,O tla re šireletša go swana le dinoka le dinokana tšeo di šireleditšego motse.Dikepe tša ntwa di ka se ye lefelong leo,Le gona dikepe tše dikgolo di ka se fete lefelong leo.
22 Jehofa ke Moahlodi wa rena,Jehofa ke yena a re neago molao,Jehofa ke Kgoši ya rena,Ke yena yo a tlago go re phološa.
23 Dithapo tša gago di tla lekelela,Di ka se kgone go thekga diphilara tša sekepe goba go phurolla seila.
Ka nako yeo go tla arolwa dilo tše dintšhi tšeo le di tšerego ntweng,Le batho bao ba golofetšego ba tla hwetša dilo tše dintšhi.
24 Ga go na motho yo a dulago moo yo a tla rego: “Ke a babja.”
Modimo o tla be a lebaletše batho bao ba dulago nageng yeo melato ya bona.
