Jesaya 34:1-17
34 Lena ditšhaba, batamelang gore le tlo kwa,Lena merafo, hlwayang tsebe.
Anke lefase le dilo ka moka tšeo di tletšego go lona di theetše,Gotee le naga le dilo ka moka tšeo e di tšweletšago.
2 Ka gobane Jehofa o galefetše ditšhaba ka moka,E bile o galefetše le mašole a tšona ka moka.
O tla di fediša,A di bolaya.
3 Batho bao ba bolailwego ditšhabeng tšeo ba tla lahlelwa ka ntle,Monkgo wa ditopo tša bona o tla rotogela godimo.Dithaba di tla kolobišwa ke madi a bona.
4 Madira a magodimong ka moka a tlo bola,Le magodimo a tlo phuthwa go swana le lengwalo la go phuthwa.
Madira a ona ka moka a tla pona a hlohlorega,Go swana le ge matlakala ao a omilego a hlohlorega mohlareng wa moterebe,Le go swana le ge lego leo le ponnego le ewa mohlareng wa mogo.
5 “Ka gobane sabola ya ka e tla tlala madi kua magodimong.
Ke tla e diriša go ahlola Edomo,E lego batho bao ke phethilego gore ke tlo ba fediša.
6 Nna Jehofa ke na le sabola, e tla tlala ka madi.
E tla kgamathela ka makhura,Ya kgamathela ka madi a dinku tše ditona le a dipudi,Le ka makhura a dipshio tša dinku tše ditona.
Ka gobane nna Jehofa, go na le sehlabelo seo ke tlago go se dira kua Botsera,E lego polao e kgolo nageng ya Edomo.
7 Dipoo tša naga* di tla theoga le tšona,Gomme dipowana di tla theoga le dipoo tše matla.
Naga ya tšona e tla kgamathela ka madi,Gomme mobu wa tšona wa tshotshoma makhura.”
8 Ka gobane Jehofa o na le letšatši leo a tlago go lefetša manaba a gagwe,Ngwaga wo a tlago go otla batho bao ba senyeditšego Tsione.
9 Mafula a yona a tla fetoga sekontiri,Gomme mobu wa yona wa fetoga sebabole.Naga ya yona e tlo swana le sekontiri seo se swago.
10 Edomo e ka se ke ya tingwa bošego le mosegare,Muši wa yona o tla dula o tupa go ya go ile.
E tla dula e le marope melokong ka moka,Ga go na yo a tla fetago mo go yona go ya go ile.
11 Mo go yona go tla dula mogole, noko,Maribiši le magokobu.
Modimo o tla diriša thapo ya go meta le maswika go meta naga ye,Go bontšha gore e tla fedišwa e bile e tla fetoga lefeela.
12 Mo go bakgomana ba yona ga go na bao e tlago go ba dikgoši,Gomme baetapele ba yona ka moka ba ka se sa ba gona.
13 Mabotong a yona a matelele go tla mela meetlwa,Gomme mafelong a yona a šireleditšwego go tla mela mehlašana ya go hlohlona le ditshehlo.
E tla fetoga lefelo leo diphukubjeLe dimpšhe di tlago go dula go lona.
14 Diphoofolo tša leganateng di tla kopana le dimpša tša naga,Gomme pudi ya nageng e tla bitša bagwera ba yona.
Nonyana yeo e bitšwago leubauba* e tla dula moo ya iketla.
15 Noga e tla dira sehlaga moo gomme ya beela mae,E bile e tla a phaphaša ya a kgobokanya moriting wa yona.
Dipekwa di tla kgobokana moo, e nngwe le e nngwe e tona e tla dula le e tshadi.
16 Nyakišišang ka pukung ya Jehofa gomme le e balele godimo.
Ga go le e tee ya diphoofolo tšeo yeo e sego gona,E nngwe le e nngwe e tona e na le e tshadi,Ka gobane Jehofa ke yena a ntšhitšego taelo,Gomme moya wa gagwe ke wona wo o di kgobokantšego.
17 Ke yena a di abetšego naga,Gomme seatla sa gagwe se metile lefelo leo a di abetšego lona.
Di tla dula go lona go ya go ile,Di tla dula go lona melokong ka moka.
Mengwalo ya tlase
^ Go bonagala e le diphoofolo tšeo di swanago le dinare.
^ Ye ke nonyana yeo e swanago le leribiši.
