Jesaya 43:1-28
43 Wena Jakobo, Jehofa Mmopi wa gago,Yena yo a go dirilego, wena Isiraele, o re:
“O se ke wa tšhoga ka gobane ke go rekolotše.
Ke go biditše ka leina la gago.
Wena o wa ka.
2 Le ge o ka phatša meetseng, ke tla ba le wena,Le ge o ka tshela dinoka, di ka se go gogole.
Le ge o ka feta mollong, o ka se swe,E bile le kgabo ya mollo e ka se go tlabole.
3 Ka gobane ke nna Jehofa Modimo wa gago,Yena Mokgethwa wa Isiraele, Mophološi wa gago.
Ke fane ka Egepeta gore e be topollo ya gago,Ka fana ka Ethopia le Seba, gore ke go rekolle.
4 Ka gobane o bile bohlokwa mahlong a ka,Ke go tšere o le yo a hlomphegago, e bile ke go ratile.
Bjale ke tla ntšha batho le ditšhaba gore ke neelane ka bona,Gore ke phološe bophelo bja gago.
5 O se ke wa tšhoga ka gobane ke na le wena.
Ke tla buša bana ba gago go tšwa ka bohlabela,Gomme ka le kgobokanya ka moka go tšwa ka bodikela.
6 Ke tla re go leboa: ‘Ba buše!’
Gomme ka re go borwa: ‘O se ke wa ba thibela.
Buša barwa ba ka go tšwa kgole, gomme o buše le barwedi ba ka go tšwa mafelelong a lefase,
7 O buše le yo mongwe le yo mongwe yo a bitšwago ka leina la kaYo ke mmopilego gore ke itagafatše,E lego yena yo ke mo dirilego.’
8 Tliša batho bao ba foufetšego le ge ba na le mahlo,Gotee le bao ba sa kgonego go kwa le ge ba na le ditsebe.
9 Anke ditšhaba ka moka di kgobokanywe felo gotee,Le gona anke merafo ka moka e kgobokanywe.
Ke mang mo gare ga medimo ya bona* a ka bolelago se?
Goba na e ka dira gore re tsebe dilo tšeo di tlago go direga nakong e tlago?
Anke e tliše dihlatse go bontšha gore e bolela nnete,Goba anke dihlatse tšeo di kwe gomme di re: ‘Yeo ke nnete!’”
10 Jehofa o re: “Lena le dihlatse tša ka,Yena mohlanka wa ka yo ke mo kgethilego,E le gore le ntsebe gomme le be le tumelo go nna,Le gore le kwešiše gore ke dula ke sa fetoge.
Ga se gwa ka gwa ba le modimo yo a kilego a ba gona pele ga ka,E bile le ka morago ga ka, go ka se be le modimo yo mongwe yo a tlago go ba gona.
11 Ke nna feela ke lego Jehofa, gomme ga go na yo a phološago ntle le nna.”
12 “Ke nna yo ke boletšego seo ke tlago go se dira, yo a le phološitšego le yo a tsebišitšego seGe mo gare ga lena go be go se na modimo o šele.
Ka gona le dihlatse tša ka, e bile ke nna Modimo wa nnete,” o realo Jehofa.
13 Le gona ke dula ke sa fetoge,E bile ga go na yo a ka phamolago selo ka seatleng sa ka.
Ge ke dira selo, ke mang yo a ka nthibelago?”
14 Se ke seo Jehofa, Mokgethwa wa Isiraele, yena yo a tlago go le rekolla a se bolelago, o re:
“Ke tla romela mašole Babilona ka baka la lena, gomme ka wiša dikeiti ka moka,E bile Bakaladea ba tla lla gabohloko, ba le ka dikepeng tša bona.
15 Ke nna Jehofa Mokgethwa wa lena, Mmopi wa Isiraele, yena Kgoši ya lena.”
16 Se ke seo Jehofa a se bolelago,Yena yo a dirago tsela yeo e phatšago lewatleng,Le tsela yeo e phatšago meetseng a matla,
17 Yena yo a tlišago kariki ya ntwa le pere,Mašole gotee le banna ba bogale, o re:
“Ba tla rapalala gomme ba se kgone go tsoga.
Ruri ba tla fedišwa. Ba tla tingwa go swana le thapo ya lebone.”
18 “Le se ke la gopola dilo tša kgale,Le gona le se ke la dulela go nagana ka dilo tša nakong e fetilego.
19 Bonang! Ke dira selo se seswa.Gaešita le gona bjale se a tšwelela.
Na ga le se bone?
Ke tla dira tsela yeo e phatšago lešokeng,Ka dira le dinoka tšeo di phatšago leganateng.
20 Diphoofolo tša naga di tla ntumiša,Le diphukubje le dimpšhe,Ka gobane ke dirile gore go be le meetse lešokeng,Le dinoka leganateng,Gore batho ba ka, bona bao ke ba kgethilego, ba nwe,
21 Bona batho bao ke ba bopilego gore e be ba ka,E le gore ba tle ba ntumiše.
22 Eupša ga se wa mpitša, wena Jakobo,Ka gobane ke go lapišitše, wena Isiraele.
23 Ga se wa ntlišetša dinku gore e be dibego tša gago tša go fišwa tše di feletšego,Le gona ga se wa ntumiša ka dihlabelo tša gago.
Ga se ka go gapeletša gore o ntlišetše dimpho,Goba ka go lapiša ka gore o nthuntšhetše diorelo.
24 Ga se wa nthekela mahlaka a go nkga bose* ka tšhelete ya gago,E bile ga se wa nkhoriša ka makhura a dihlabelo tša gago.
Go e na le moo, o nkimeditše ka dibe tša gago,E bile wa ntapiša ka diphošo tša gago.
25 Ke nna ke phumolago dibe tša lena ka baka la leina la ka,E bile nka se sa di gopola.
26 Anke re sekišane, o nkgopotše ge e ba go na le seo ke se lebetšego,Hlalosa taba ya gago go bontšha gore ga o na molato.
27 Rakgolokhukhu wa gago, e lego yena motho wa mathomo, o dirile sebe,Gomme baetapele ba gago ba ntlhanogetše.
28 Ke tla dira gore dintona tša lefelong le lekgethwa, e se sa ba tšeo di hlwekilego,E bile ke tla fediša Jakobo,Gomme ka dira gore Isiraele a rogakwe.
Mengwalo ya tlase
^ Phetolelo ya lentšu ka lentšu e re, “gare ga bona.”
^ Mo go bolelwa ka semela sa go nkga bose, seo go sa tsebjego gabotse gore ke semela sa mohuta mang.
