Jesaya 45:1-25
45 Se ke seo nna Jehofa ke se botšago motlotšwa wa ka, e lego Korese,Yoo ke swerego seatla sa gagwe sa le letona,Gore ke fenye ditšhaba tšeo di lego pele ga gagwe,E le gore ke amoge dikgoši matla,Ke bule mabati a mabedi,Gore dikeiti tša motse di se tlo tswalelwa. Ke re:
2 “Ke tla go eta pele,Ka batalatša meboto ya naga.
Ke tla pšhatlaganya mabati a koporo,Gomme ka ripa le ditshipi tša go tswalela mojako.
3 Ke tla go nea mahumo ao a lego leswiswingLe ao a utilwego mafelong a utegilego,E le gore o tsebe gore ke nna Jehofa,Yena Modimo wa Isiraele, yo a go bitšago ka leina la gago.
4 Ke go bitša ka leina la gago,Ka baka la mohlanka wa ka Jakobo le Isiraele yo ke mo kgethilego,
Le gona, ke dirile gore leina la gago le hlomphege, gaešita le ge o be o sa ntsebe.
5 Ke nna Jehofa ke nnoši,
Ga go na Modimo yo mongwe ka ntle le nna.
Ke tla go matlafatša, gaešita le ge o be o sa ntsebe,
6 E le gore batho ba tsebeGo tšwa ka bohlabela go fihla ka bodikelaGore ga go na Modimo yo mongwe ntle le nna.
Ke nna Jehofa, ga go na yo mongwe.
7 Ke dira seetša e bile ke dira leswiswi,Ke dira gore go be le khutšo, ka ba ka dira gore go be le masetlapelo,Ke nna Jehofa yo a dirago dilo tše ka moka.
8 “Lena magodimo, nešang pula go tšwa godimo,Anke maru a rothiše toko.
Anke lefase le bulege gomme le mediše phološo,Gotee le toko.
Ke nna Jehofa ke dirilego dilo tše.”
9 Go madimabe yo a lwago le Mmopi wa gagwe,Ka gobane o fo swana le karolwana ya sebjana seo se pšhatlegilego sa letsopa,Yeo e lego gare ga dikarolwana tšeo di lahletšwego fase tša sebjana sa letsopa seo se pšhatlegilego!
Na letsopa le ka re go Mmopi wa lona: “O bopa eng?”
Goba na le selo seo o se dirilego se ka re: “Ga o na diatla”?
10 Go madimabe yo a rego go tate: “Ngwana yo wa gago ke wa mohuta mang?”
Gomme a re go mma: “Ngwana yo o mmelegego ke wa mohuta mang?”
11 Jehofa Mokgethwa wa Isiraele, e lego yena yo a mmopilego,
O re: “Na ga le tshepe dilo tšeo ke rego di tlo direga,Gomme la mpotša gore ke dire eng ka bana ba ka, e lego bona bao ke ba bopilego?
12 Ke dirile lefase e bile ke bopile le batho bao ba lego go lona.
Ke phurolotše magodimo ka diatla tša ka,Gomme dilo ka moka tšeo di lego go ona ke di fa ditaelo.”
13 Jehofa wa madira o re: “Ke kgethile monna ka ge ke lokile,Gomme ke tla dira gore go se ke gwa ba le selo seo se mo šitišago ditseleng tša gagwe.
Ke yena a tlago go aga motse wa ka,Gomme a ntšha batho ba ka bothopša, ntle le go patela goba go ntšha pipamolomo.”
14 Jehofa o re:
“Dipoelo tšeo Egepeta e di hwetšago ka morago ga ge e rekišitše, le dilo tšeo di rekišwago tša Ethopia le tša Baseba e tla ba tša gago.Baethopia le Baseba, e lego bona batho ba batelele,
Ba tla tla le go wena, gomme e tla ba batho ba gago.
Ba tla go šala morago ba bofilwe ka diketane.
Ba tla go khunamela gomme ba go rapela ba re: ‘Ruri Modimo o na le wena,Gomme ga go na yo mongwe, ga go na Modimo yo mongwe ntle le yena.’”
15 Wena Modimo wa Isiraele, Mophološi,Ruri o Modimo yo a sa dulego a utolla seo a se dirago.
16 Ka moka ga bona ba tla hlabišwa dihlong ba ba ba kokobetšwa.Bao ba dirago medingwana ba tla sepela ba le ka moka ba hlabilwe ke dihlong.
17 Eupša wena Isiraele, Jehofa o tla go phološa go ya go ile.
O ka se hlabišwe dihlong goba wa gobošwa go ya go ile.
18 A ke mantšu a Jehofa,Yena Mmopi wa magodimo, e lego Modimo wa nnete,Yoo a dirilego lefase a ba a le dira ka go tia gore le se šišinyege,Yoo a sego a le bopela lefeela, eupša a le bopetše gore batho ba dule go lona,
O re: “Ke nna Jehofa, ga go na yo mongwe ntle le nna.
19 Ga se ka bolela ke le lefelong leo le utegilego, e lego lefelong la leswiswi.Ga se ka botša ditlogolwana tša Jakobo ka re:‘Lena batho ntsomeng, eupša go iteka ga lena e tla ba ga lefeela.’
Ke nna Jehofa, yo a bolelago seo se lokilego le seo se tshepegago.
20 “Kgobokanang gomme le tle.
Lena bao le phonyokgilego ditšhabeng, kopanang.
Bao ba swerego diswantšho tša bona tšeo di betlilwego, ga ba tsebe selo,Gomme ba rapela modimo yo a ka se kgonego go ba phološa.
21 Bolelang le be le tšweletše taba ya lena.
Anke le rerišane ka kwano.
Ke mang yo a boletšego e sa le pele dilo tše go tloga kgale?Le gona, ke mang yo a di boletšego go tloga ka nako yeo?
Na ga se nna Jehofa?
Ga go na Modimo yo mongwe ntle le nna,Ke Modimo yo a lokilego le yo a phološago, ga go na yo mongwe ka ntle le nna.
22 “Boelang go nna gomme ke tla le phološa, lena batho ka moka bao ba lego lefaseng ka moka,Ka gobane ke nna Modimo, ga go na yo mongwe ntle le nna.
23 Ke enne ka bophelo bja ka,Dilo tšeo ke di boletšego ke tša nnete,Gomme di ka se fetoge.
Batho ka moka ba tla khunama pele ga ka,Gomme ba dira keno ya gore ba tla dula ba mpotegela.
24 Ke moka ba tla re go nna: ‘Ruri Jehofa ke Modimo yo a lokilego le yo a nago le matla.
Batho ka moka bao ba mo galefetšego ba tla tla pele ga gagwe ba hlabja ke dihlong.
25 Ditlogolwana tša Isiraele ka moka, di tla bona gore di dirile phetho e botse ka go hlankela Jehofa,E bile di tla ikgantšha ka dilo tšeo a ba diretšego tšona.’”
