Jesaya 51:1-23
51 “Ntheetšeng, lena bao le lekago go dira dilo tše di lokilego,Lena bao le tsomago Jehofa.
Gopolang leswika leo le ntšhitšwego go lona,Le molete woo le epilwego go wona.
2 Gopolang Aborahama tatago lenaLe Sara yoo a le belegego.
Aborahama o be a le noši ge ke be ke mmitša,Gomme ke ile ka mo šegofatša ka ba ka dira gore a be le ditlogolo tše dintšhi.
3 Jehofa o tla homotša Tsione.
O tla homotša marope a yona ka moka,A dira gore lešoka la yona le swane le Edene,Gomme a dira gore leganata la yona le swane le serapa sa Jehofa.
Tsione go tla ba le lethabo, boipshino,Ditebogo le dikoša tše bose.
4 “Ntheetšeng lena batho ba ka,Hlwayang tsebe lena setšhaba sa ka.
Ka gobane molao o tla tšwa go nna,Gomme ke tla bea toka ya ka gore e be seetša merafong.
5 Toka ya ka e a batamela.
Phološo ya ka e tla tla go lena,Gomme ke tla diriša matla a ka go ahlola merafo.
Dihlakahlaka di tla nkholofela,Tša letela gore ke di phološe.
6 Emišetšang mahlo a lena magodimong,Le be le lebelele tlase lefaseng.
Magodimo a tla moyafala go swana le muši,Lefase lona la hlagala go swana le seaparo,Gomme badudi ba lona ba hwa go swana le menang.
Eupša ge e le phološo ya ka e tla ba ya sa ruri,Gomme go loka ga ka go tla dula go le gona.
7 Ntheetšeng, lena bao le tsebago seo se lokilego,Lena batho bao molao wa ka o lego dipelong tša bona.
Le se ke la boifa ge batho ba le kwera,E bile le se ke la tšhoga ge ba le roga.
8 Diboko di tla ba ja tša ba fetša go swana le seaparo,Gomme diboko tša go ja diaparo* tša ba ja tša ba fetša go swana le boya bja nku.
Eupša ge e le toka ya ka e tla dula e le gona go ya go ile,Gomme phološo ya ka e tla dula e le gona melokong ka moka.”
9 Anke Jehofa a emiše letsogo la gagwe,Anke a emiše letsogo la gagwe gore a bontšhe matla a gagwe!
Anke a le emiše go swana le mehleng ya kgale, go swana le melokong e fetilego.
Na ga se wena o pšhatlagantšego Rahaba,*Wena yo a hlabilego sephedi se segologolo sa ka lewatleng?
10 Na ga se wena o omišitšego lewatle, wona meetse a bodiba bjo bogolo?
Na ga se wena o ilego wa bula tsela ka garegare ga lewatle gore bao o ba rekolotšego ba tle ba tshele?
11 Batho ba Jehofa bao ba phološitšwego ba tla boa.
Ba tla boa Tsione ba goeletša ka lethabo,Gomme ba tla thaba go ya go ile.
Ba tla thaba ba ba ba ipshina,Le gona ba ka se sa nyama e bile ba ka se sa lla.
12 Modimo o re: “Ke nna ke le homotšago.
Goreng le tšhaba motho wa nama le madi yoo mafelelong a tlago go hwa,Le tšhaba ngwana wa motho yo a tlago go omelela go swana le bjang bjo botala?
13 Goreng le lebala Jehofa yo a le bopilego,Yena yo a phurolotšego magodimo le go thea motheo wa lefase?
Letšatši ka moka le be le dula le tšhogile bogale bja yo a le gatelelago,Bjalo ka ge eka o tlo le fediša.
Bjale bogale bja yo a le gatelelago bo kae?
14 Yo a tlemilwego ka diketane o tla tlemollwa kgauswinyane,A ka se hwe a ya moleteng,E bile a ka se tsoge a hloka dijo.
15 Eupša ke nna Jehofa Modimo wa lena,Yena yo a bilošago lewatle le go dira gore maphoto a lona a dume.Leina la ka ke Jehofa wa madira.
16 Ke tla dira gore o bolele mantšu a ka,Gomme ka go šireletša ka seatla sa ka,E le gore ke hlome magodimo le go thea motheo wa lefase,Gomme ke re go Tsione: ‘Lena le batho ba ka.’
17 Tsoga, tsoga! Ema wena Jerusalema,Wena yo a nwelego bogale ka komiking ya Jehofa yeo e lego ka seatleng sa gagwe.
O nwele beine ka komiki,O e nwele go fihlela o e fetša gomme e dira gore o thekesele.
18 Ga go le o tee wa bana ba gagwe ka moka bao a ba belegego yo a lego moo gore a mo hlahle,Le gona ga go le o tee wa bana ba gagwe ka moka bao a ba godišitšego yo a mo swerego ka seatla.
19 O tla diragalelwa ke dilo tše tše pedi:
O tla fedišwa gomme wa senywa, wa ba wa welwa ke tlala le sabola.
Ke mang yo a tlago go go kwela bohloko?
Ke mang yo a tlago go go homotša?
20 Bana ba gago ba idibetše.
Ba rapaletše khoneng ya seterata se sengwe le se sengwe,Go swana le nku ya naga yeo e tantšwego ka neteng.
Jehofa o ba galefetše kudu, yena Modimo wa gago o ba kgalemile kudu.”
21 Ka gona, theetša se hle wena mosadi yo a hlakišwagoLe yo a tagilwego, le ge a se a tagwa ke beine.
22 Morena Jehofa, yena Modimo wa gago yo a lwelago batho ba gagwe o re:
“Ke tla go amoga komiki yeo e lego ka seatleng sa gago yeo e dirago gore o thekesele,Sona senwelo sa beine, e lego komiki ya ka ya bogale.O ka se tsoge wa e nwa gape.
23 Ke tla e bea ka seatleng sa bao ba go tlaišago,Bao ba rilego go wena: ‘Inama gore re sepele godimo ga gago.’
Ka gona o ile wa dira gore mokokotlo wa gago o swane le mobu,O swane le seterata gore ba sepele mo go wona.”
Mengwalo ya tlase
^ Phetolelo ya lentšu ka lentšu e re, “tshwele.” Se ke sephedi seo se nyakilego se swana le serurubele.
^ Bona Tlhaloso ya Mantšu.
