Jesaya 55:1-13
55 Lena bohle bao le nyorilwego etlang le nweng meetse.
Lena bao le se nago tšhelete etlang le tšeeng dijo tša lena gomme le je.
Etlang le tšeeng beine le maswi ntle le gore le ntšhe tšhelete le go patela.
2 Ke ka baka la’ng le duletše go reka dilo tšeo e sego dijo tša nnete,Le gona ke ka baka la’ng le fetša tšhelete ya lena le reka dilo tšeo di ka se le khorišego?
Ntheetšeng gabotse gomme le tla ja dijo tše dibotse,Le gona le tlo thabela dijo tše dibosebose.
3 Ntheetšeng gomme le tle go nna.
Theetšang, gomme le tla dula le phela, le gona ke tla dira kgwerano ya sa ruri le lena,E lego yeo ke e dirilego go tshepiša Dafida gore ke tla mmontšha botho.*Tshepišo ye e tla phethagala
4 Bona! Ke mo kgethile gore e be hlatse ditšhabeng,Ke mo kgethile gore e be moetapele e bile e be mmuši wa ditšhaba.
5 Bona! Wena o tla bitša setšhaba seo o sa se tsebego,Gomme batho ba setšhaba seo bao ba sa go tsebego ba tla kitimela go wena,Ka baka la Jehofa Modimo wa gago, yena Mokgethwa wa Isiraele,Ka gobane o tla dira gore o be le letago.
6 Tsomang Jehofa a sa hwetšagala.
Mmitšeng a sa le kgauswi.
7 Anke motho yo mobe a tlogele dilo tše mpe tšeo a di dirago,Le gona anke motho yo a kwešago ba bangwe bohloko a tlogele tsela yeo a naganago ka yona,A a boele go Jehofa yo a tlago go mo gaugela,Le go Modimo wa rena ka gobane o tla mo lebalela ka pelo ka moka.
8 Jehofa o re: “Dikgopolo tša ka ga di swane le tša lena,Le dilo tšeo le di dirago ga di swane le tšeo ke di dirago.”
9 “Go no swana le ge magodimo a phagametše lefase,Le dilo tšeo ke di dirago di phagame kudu go feta tšeo lena le di dirago,Le dikgopolo tša ka di phagametše dikgopolo tša lena.
10 Go no swana le ge pula le kapoko di ena di etšwa legodimong,Gomme di sa boele morago ka ntle le gore di nošetše lefase le go dira gore dibjalo di mele le go hloga,E bile di dira gore mobjadi a be le peu le batho ba be le dijo,
11 Go bjalo le ka mantšu ao a tšwago molomong wa ka.
A ka se boele go nna a se a phethagala,Dilo di tla direga ka mokgwa wo ke di boletšego,Gomme mantšu a ka a tla phethega.
12 Le tla sepela le thabile,E bile le tla tlišwa ka khutšo.
Dithaba le meboto di tla thaba ge le fihla,Gomme mehlare ka moka ya nageng e tla phaphatha matsogo.
13 Go e na le gore go mele mehlašana ya meetlwa go tla mela mohlare wa mojunipere.*Go e na le gore go mele mohlašana wa go hlohlona* go tla mela mohlare wa momirite.
Se se tla dira gore Jehofa a tume,E lego leswao leo le ka se tsogego le hweletše.”
Mengwalo ya tlase
^ Phetolelo ya lentšu ka lentšu e re, “lerato le le botegago.”
^ Wo ke mohlašana wo o nago le matlakala ao a phadimago le mapolomo a mašweu a go nkga bose.
^ Goba “bogopa.”
