Jesaya 59:1-21
59 Letsogo la Jehofa ga se le le kopana moo le ka palelwago ke go le phološa,Le tsebe ya gagwe ga se ya thibana moo e ka palelwago ke go le kwa.
2 Diphošo tša lena ke tšona tše di le arogantšego le Modimo wa lena.
Dibe tša lena di dirile gore a le utele sefahlego sa gagwe,E bile o gana go le kwa.
3 Diatla tša lena di šilafaditšwe ke madi,Gomme menwana ya lena e šilafaditšwe ke diphošo.
Melomo ya lena e bolela maaka, gomme maleme a lena a ngunanguna ka dilo tša go se loke.
4 Ga go na yo a goeletšago a lwela toka,Ga go na yo a rego a le kgorong ya tsheko a bolela nnete.
Ba tshepile lefeela e bile ba bolela dilo tša go hloka mohola.
Ba ima mathata bjalo ka ge eka ba imile ngwana, gomme ba belega dilo tše di gobatšago.
5 Ba phaphašitše mae a dinoga tša mpholo,Gomme ba loga bolepu bja segokgo.
Yo a jago mae a tšona o tla hwa,Gomme lee leo le thubilwego le tla phaphaša noga ya marabe.
6 Bolepu bja bona e ka se be seaparo,Gomme dilo tšeo ba di dirago di ka se ba hole ka selo.
Mediro ya bona ke e gobatšago,Gomme ba dira bošoro ka diatla tša bona.
7 Maoto a bona a kitimela go dira dilo tše mpe,Gomme ba akgofela go tšholla madi ao a se nago molato.
Menagano ya bona ke menagano e gobatšago,Ba a senyetšana e bile ba kwešana bohloko.
8 Ga ba tsebe go dira khutšo le batho ba bangwe,E bile ga ba dire dilo ka toka.
Ditsela tša bona di kgopame.Ga go na le o tee yo a sepelago go tšona yo a tlago go ba le khutšo.
9 Ke ka baka leo toka e lego kgole le rena,Gomme go loka ga go re fihlele.
Re dula re holofetše gore go tla ba le seetša, eupša re bona leswiswi,Re holofetše gore go tla ba le seetša, eupša re sepela leswiswing.
10 Re phopholetša leboto go swana le batho bao ba foufetšego,Re dulela go phopholetša go swana le bao ba se nago mahlo.
Re kgopša mosegare wa sekgalela bjalo ka ge eka ke leswiswing la bošego.Re no ba bjalo ka bahu gare ga dinatla.
11 Ka moka ga rena re bopa bjalo ka dibere,Re kuruetša bjalo ka maeba re nyamile.
Re holofetše gore go be le toka, eupša ga e gona.Re holofetše gore re phološwe, eupša ga go na yo a re phološago.
12 Melato ya rena ke e mentšhi pele ga gago,Ge e le dibe tša rena di hlatsela gore re na le molato.
Re tseba gabotse melato ya rena,E bile re tseba dibe tša rena.
13 Re tshetše molao gomme ra latola Jehofa,Re furaletše Modimo wa rena.
Re boletše ka go gatelela ba bangwe le go hlanogela Modimo.Re nagana ka maaka ao re ka a bolelago ke moka ra a bolela.
14 Batho ba gana go bontšha toka,E bile ga go na yo a lokilego.Ge ba le mebarakeng ga go na yo a bolelago nnete,Gomme yo a lokilego ga a kgone go ya moo.
15 Nnete ga e sa le gona,Gomme motho yo a tlogelago go dira dilo tše mpe o a fedišwa.
Jehofa o bone se gomme a se ke a thaba,Ka gobane go be go se na toka.
16 Ge a bona gore ga go na motho yo a thušago,O ile a makatšwa ke gore ga go na yo a namolago.Ka gona o ile a phološa a diriša seatla sa gagwe,Gomme go loka ga gagwe ke gona go ilego gwa mo nea matla.
17 Ke moka o ile a apara go loka bjalo ka ge eka ke seaparo sa ntwa,Gomme a rwala kefa ya phološo hlogong ya gagwe.
O ile a ikapeša ka seaparo sa tefetšo,Gomme a itatetša ka seaparo sa phišego.
18 O tla ba putsa go ya ka mediro ya bona.
O tla tukela manaba a gagwe bogale, a a otla go ya le ka melato ya ona.
Le dihlakahlaka o tla di lefetša go ya ka melato ya tšona.
19 Bao ba lego ka bodikela ba tla boifa leina la Jehofa,Gomme bao ba lego ka bohlabela ba tla mo nea letago,Ka gobane Jehofa o tla kapejana go swana le noka yeo e elelago ka matla,Noka yeo e kgorometšwago ke moya wa Modimo.
20 Jehofa o re: “Yo a rekollago o tla tla Tsione,O tla tla go ditlogolwana tša Jakobo tšeo di tlogelago go dira dilo tše mpe.”
21 Jehofa o re: “Ge e le nna, kgwerano ya ka le bona še: “Moya wa ka wo o lego go wena le mantšu a ka ao ke dirilego gore o a bolele, a ka se tlošwe molomong wa gago, goba melomong ya bana ba gago, goba melomong ya ditlogolo tša gago go tloga gona bjale go ya go ile,” o realo Jehofa.
