Jesaya 60:1-22
60 “Tsoga, wena mosadi, o hlabiše seetša ka gobane seetša sa gago se fihlile,
Letago la Jehofa le phadima godimo ga gago.
2 Tseba gore leswiswi le tla aparetša lefase,Gomme ditšhaba tšona tša aparelwa ke monyama o mogolo.Eupša Jehofa o tla go phadimišetša seetša,Gomme letago la gagwe le tla bonagala go wena.
3 Ditšhaba di tla ya seetšeng sa gago,Gomme dikgoši di tla ya letagong la gago leo le phadimago.
4 Gaša mahlo gohle gomme o bone.
Ka moka ba kgobokeditšwe ba tla go wena.
Barwa ba gago ba dulela go tla ba etšwa kgole,Gomme barwedi ba gago ba kukilwe lethekeng.
5 Ka nako yeo o tla bona gomme wa phadima,E bile pelo ya gago e tla tlala lethabo ya ba ya thakgala,Ka gobane mahumo a lewatle a tla tla go wena,E bile matlotlo a ditšhaba a tla tla go wena.
6 Dikamela tše dintšhintšhi di tla tlala nageng ya gago,E lego dikamela tše dinyenyane tše ditona tša Midiane le tša Efaa.
Batho ka moka bao ba tšwago Sheba ba tla tla.Ba tla rwala gauta le dinkgišabose.
Gomme ba tla tumiša Jehofa.
7 Mehlape ka moka ya dinku le dipudi e tla kgobokeletšwa go wena.
Dinku tše tona tša Nebayothe di tla go hlankela.
Ke tla di amogela gore go dirwe dihlabelo ka tšona aletareng ya ka,Gomme ke tla botsefatša ntlo ya ka ya letago.
8 Ke bomang ba bao ba tlago ba kitima bjalo ka maru,Le bjalo ka maeba ao a fofelago dihlageng tša ona?
9 Ge e le dihlakahlaka tšona di tla holofela nna,Dikepe tša Tarashishi tšona tša etelela pele,E le gore di tliše bana ba gago bao ba tšwago kgole,Ba tla tla ba swere silifera ya bona le gauta ya bona,E le gore ba tumiše leina la Jehofa Modimo wa gago, yena Mokgethwa wa Isiraele,Ka gobane o tla go botsefatša.
10 Batho bao ba tšwago dinageng tše dingwe ba tla aga maboto a gago,Gomme dikgoši tša bona tša go hlankela,Ka gobane ke le otlile ke sa galefile,Eupša ke tla le bontšha botho, ka le gaugela.
11 Dikeiti tša gago di tla dula di bulegile,Di ka se tswalelwe mosegare le bošego,E le gore go tlišwe mahumo a ditšhaba go wena,Gomme dikgoši tša bona e tla ba tšona di etelelago pele tabeng ye.
12 Setšhaba le ge e le sefe le mmušo le ge e le ofe tšeo di ka se kego tša go hlankela di tla fedišwa,Ruri ditšhaba di tla fedišetšwa sa ruri.
13 Mehlare e mebotsebotse ya Libanoni e tla tlišwa go wena,Wa tlišetšwa le mehlare ya mejunipere, ya mopalatane le ya mosiprese,E le gore e tle e botsefatše lefelo la ka le lekgethwa,Ke tla tagafatša le lefelo leo dinao tša ka di gatilego go lona.
14 Barwa ba batho bao ba bego ba go gateletše, ba tla tla go wena gomme ba go khunamela.Batho ka moka bao ba bego ba go nyatša ba tla khunama dinaong tša gago,Gomme ba tla swanelwa ke go go bitša motse wa Jehofa,Yona Tsione ya Mokgethwa wa Isiraele.
15 Le ge ke ile ka go lahla gomme batho ba go hloya, e bile gwa se be le motho yo a phatšago go wena,Ke tla go dira selo seo batho ba tlago go se tumiša go ya go ile,Seo ba tlago go se thabela melokong ka moka.
16 O tla nwa maswi a ditšhaba,Wa šomiša mahumo a dikgoši,*Gomme o tla tseba gore nna Jehofa ke Mophološi wa gago,Le gore Modimo yo Matla wa Jakobo ke yena a go rekollago.
17 Ke tla tliša gauta gore e tšeele koporo legato,Ka tliša silifera gore e tšeele tšhipi legato,Gomme ka tliša koporo gore e tšeele kota legato,E bile ka tliša tšhipi gore e tšeele maswika legato,Ke tla dira gore khutšo e be balebeledi ba gago,Gomme go loka ya ba batho bao ba go neago mošomo.
18 Go ka se sa kwala bošoro nageng ya gago,Gomme mellwaneng ya gago go ka se sa kwala batho ba senya goba ba šwalalanya.
O tla bitša maboto a gago gore ke Phološo, gomme dikeiti tša gago wa di bitša Tumišo.
19 Letšatši le ka se sa go hlabišetša seetša mosegare,Gomme ngwedi o ka se sa go fa seetša.Ka gobane Jehofa ke yena e tlago go ba seetša sa gago go ya go ile,Gomme Modimo wa gago e tla ba botse bja gago.
20 Letšatši la gago le ka se sa sobela,E bile ngwedi wa gago o tla dula o phadima.Ka gobane Jehofa e tla ba seetša sa gago sa go ya go ile,Gomme matšatši a go lla ga gago a tla be a fedile.
21 Ge e le batho ba gago ka moka e tla ba bao ba lokilego,Ba tla dula nageng go ya go ile.
Bona ke lekalana leo ke le bjetšego,E lego wona mošomo wa diatla tša ka, e le gore nna ke botsefatšwe.
22 Yo monyenyane e tla ba ba seketeGomme yo a fokolago a fetoga setšhaba se matla.
Nna Jehofa, ke tla dira gore dilo tše ka moka tšeo ke di bolelago di direge kapejana ka nako ya gona.”
Mengwalo ya tlase
^ Phetolelo ya lentšu ka lentšu e re, “Wa anya matswele a dikgoši.”
