Jesaya 61:1-11
61 Mmuši Morena Jehofa o mphile moya wa gagwe,Ka gobane Jehofa o ntloditše gore ke botše batho ba boleta ditaba tše dibotse.
O nthomile gore ke fodiše dipelo tša bao ba kwelego bohloko,Ke tsebiše bao ba thopilwego gore ba tla lokollwa,Le gore ke tsebiše bao ba golegilwego gore ba tla budullwa mahlo.
2 Ke tsebiše gore nako ya Jehofa ya go gaugela ba boleta e fihlile,Le gore nako ya gore Modimo wa rena a lefetše manaba a gagwe e fihlile,Ke homotše bohle bao ba llago,
3 Ke hlokomele bao ba llelago Tsione,Ke ba nee sa go rwalwa hlogong go e na le go ba nea molora,Ke ba nee makhura a gore ba thabe go e na le gore ba lle,Ke ba nee seaparo seo ba tlago go se diriša go ntumiša go e na le gore ba nyame.
Ba tla bitšwa mehlare e megolo ya go lokaYeo e bjetšwego ke Jehofa e le gore ba mo tagafatše.
4 Ba tla aga leswa marope a kgale,Ba tsoša mafelo ao e lego kgale a šwalalantšwe,Ba tsošološa metse yeo e sentšwego,E lego mafelo ao e bilego marope go tloga molokong o mongwe go ya go o mongwe.
5 “Batho bao e sego Baisiraele ba tla tla ba diša mehlape ya lena ya dinku le dipudi,Gomme ya ba balemi ba lena e bile ba le lemela diterebe.
6 Ge e le lena, le tla bitšwa baperisita ba Jehofa,Ba tla le bitša bahlanka ba Modimo wa rena.
Le tla šomiša mahumo a ditšhaba,Gomme la ikgantšha ka letago la tšona.
7 Go e na le gore batho ba ka ba hlabje ke dihlong, ba tla šegofatšwa kudu,Go e na le gore ba tlontlollwe, ba tla goeletša ba thabile ka baka la seo ba tlago go se hwetša.
Ka gona ba tla hwetša dikarolo tše pedi nageng ya bona.
Ba tla thaba go ya go ile.
8 Nna Jehofa, ke rata toka,Gomme ke hloile botsotsi le dilo tše di sa lokago.
Ke tla tshepagala gomme ka ba nea moputso wa bona,E bile ka dira kgwerano ya sa ruri le bona.
9 Bana ba bona ba tla tuma ditšhabeng,Gomme ditlogolo tša bona tša tuma merafong.
Ka moka bao ba ba bonago ba tla tsebaGore ke bana bao Jehofa a ba šegofaditšego.”
10 Ke tla thaba kudu ka baka la Jehofa.
Ke tla thaba ka pelo ka moka ka baka la Modimo wa ka.
Ka gobane o nkapešitše diaparo tša phološo,A ntatetša ka seaparo sa toka,Go no swana le monyadi yo a rwalago tuku hlogong go swana le moperisita,Le go swana le monyadiwa yo a ikgabišago ka dilo tša gagwe tša go ikgabiša.
11 Go no swana le ge lefase le hlogiša dimela tša lona,Le go swana le ge serapa se dira gore dilo tšeo di bjetšwego go sona di mele,Mmuši Morena Jehofa le yena o tla dira gore toka e mele,Gomme o tla dira gore batho ba ditšhaba ka moka ba mo tumiše.
