Jesaya 62:1-12
-
Leina le leswa la Tsione (1-12)
62 Nka se ke ka homola ka baka la Tsione,Nka se ke ka dula ka iketla ka baka la Jerusalema,Go fihlela go loka ga yona go phadima bjalo ka seetša,Gomme phološo ya yona e tuka bjalo ka lebone.
2 “Wena mosadi, ditšhaba di tla bona go loka ga gago,Gomme dikgoši ka moka tša bona letago la gago.
O tla bitšwa ka leina le leswa,Leo Jehofa ka boyena a tlago go le kgetha.
3 O tla swana le mphapahlogo wa bobotse seatleng sa Jehofa,Le tuku ya bogoši seatleng sa Modimo wa gago.
4 O ka se sa bitšwa mosadi yo a tlogetšwego,Le naga ya gago e ka se sa bitšwa lerope,
Eupša wena o tla bitšwa Yo a Nkgahlago,Gomme naga ya gago e tla bitšwa Yo a Nyetšwego.
Ka gobane o tla be o kgahla Jehofa,Le gona naga ya gago e tla swana le mosadi yo a nyetšwego.
5 Go no swana le ge lesogana le nyala kgarebe,Barwa ba gago ba tla go nyala.
Modimo wa gago o tla go thabela,Go no swana le ge monyadi a thabela monyadiwa.
6 Wena Jerusalema, ke beile batho ba go leta motse mabotong a gago.
Ga se ba swanela go homola mosegare ka moka le bošego ka moka.
Lena bao le bolelago ka Jehofa,Le se ke la khutša,
7 Le gona le tšwele pele le mo rapela go ba go fihlela a tiišitše Jerusalema,Le go fihlela a dira gore batho lefaseng ka moka ba e rete.”
8 Jehofa o dirile keno ka go emiša seatla sa gagwe sa le letona, lona letsogo la gagwe le matla, a re:
“Nka se sa nea manaba a lena mabele a lena gore e be dijo tša ona,E bile batho bao e sego Baisiraele ba ka se nwe beine ya lena e mpsha yeo le e šometšego ka thata.
9 Eupša bao ba kgobelago mabele ba tla a ja gomme ba tumiša Jehofa,E bile bao ba kgobelago diterebe ba tla nwa beine malapeng a ka a makgethwa.”
10 Etšwang, etšwang ka dikeiti.
Kgorelang batho tsela.
Bulang tsela e kgolo, e buleng.
Tlošang maswika mo go yona.
Emišetšang ditšhaba leswao.
11 Bonang! Jehofa o dirile gore se se kwale le go fihla mafelelong a lefase:
“Botšang morwedi wa Tsione le re:‘O kgauswi le go phološwa.
Ke yena a nago le moputso wa gagwe,Gomme moputso wo a o patelago o mo pele ga gagwe.’”
12 Batho ba tla ba bitša setšhaba se sekgethwa, sona seo se rekolotšwego ke Jehofa,Gomme wena o tla bitšwa yo a tsongwago, Motse wo Modimo a sa Kago a o Tlogelela sa Ruri.
