Jesaya 63:1-19
63 Ke mang yo a tšwago Edomo,Yo a aperego diaparo tša mebala e tagilego a etšwa Botsera,Yo a aperego diaparo tše di hlomphegago,Yo a gwantago ka matla a gagwe a magolo?
“Ke nna yo a bolelago se se lokilego,Yena yo a nago le matla a magolo a go phološa.”
2 Ke ka baka la’ng diaparo tša gago e le tše dikhwibidu,Le gona ke ka baka la’ng diaparo tša gago di swana le tša yo a gatakelago diterebe?
3 “Ke gataketše diterebe gore ke dire beine ke nnoši,
Go be go se na motho yo a tšwago ditšhabeng tše dingwe yo a bego a na le nna.
Ke ile ka gatakela manaba a ka ke galefileE bile ke kwatile kudu.
Diaparo tša ka di be di thankgetše ka madi a ona,Gomme ke šilafaditše diaparo tša ka ka moka.
4 Ka gobane ke šetše ke kgethile letšatši leo ke tlago go lefetša ka lona,E bile ngwaga wa go rekolla batho ba ka o fihlile.
5 Ke ile ka lebelela eupša go be go se na yo a nthušago,Ke ile ka makatšwa ke gore ga go na motho yo a nthekgago.
Ka gona ke ile ka tliša phološo ke diriša letsogo la ka,Gomme pefelo ya ka ke yona e ilego ya nnea matla.
6 Ke gataketše ditšhaba ke galefile,Ka di dira gore di tagwe ke pefelo ya ka,Gomme ka tšhollela madi a tšona fase.”
7 Ke tla bolela ka mediro ya botho* bja Jehofa,Ke tla reta Jehofa ka baka la dilo ka moka tšeoJehofa a re diretšego tšona,Ka bolela le ka dilo tše dintšhi tšeo a di diretšego BaisiraeleKa baka la kgaugelo ya gagwe le botho bja gagwe bjo bogolo.
8 Ka gobane o itše: “Ruri setšhaba se ke batho ba ka, ke barwa ba ka bao ba tlago go dula ba mpotegela.”
Ka gona o ile a ba Mophološi wa bona.
9 Nakong ka moka ya ge ba be ba gateletšegile le yena o be a gateletšega.
Yo a ilego a mo roma o ile a ba phološa.
O ile a ba rekolla ka lerato la gagwe le lešoko la gagwe,Gomme a ba kuka le go ba hlokomela mengwageng yeo ka moka.
10 Eupša bona ba ile ba se kwe Modimo, gomme ba ganetšana le moya wa gagwe o mokgethwa.*
O ile a fetoga lenaba la bona,E bile a lwa le bona.
11 Bona ba gopola mehleng ya kgale,Nakong ya ge Moshe mohlanka wa gagwe a sa phela, ba re:
“O kae yo a re ntšhitšego lewatleng le badiši ba setšhaba sa gagwe?
O kae yo a tsentšego moya wa gagwe o mokgethwa go yena?
12 O kae yena yo a ilego a dira gore letsogo la gagwe le matla le thekge letsogo la le letona la Moshe,Yo a ilego a aroganya meetse ka pele ga rena,Gore a dire gore leina la gagwe le dule le gopolwa go ya go ile?
13 O kae yena yo a dirilego gore re phatše meetseng ao a bilogago,E le gore re sepele ntle le go kgopša,Go no swana le pere yeo e lego nageng yeo e bulegilego?
14 Go no swana le ge phoofolo e theogela moeding gore e yo khutša,Le moya wa Jehofa o ile wa ba dira gore ba khutše.”
Ka gona o ile wa etelela pele batho ba gago ka tsela ye,E le gore leina la gago le tumišwe.
15 Lebelela o le legodimong gomme o bone,O lebelele o le lefelong la gago le le phagamego, le lekgethwa le leo le nago le letago.
Ke ka baka la’ng o se sa re šetša, le gona ke ka baka la’ng o se sa šomiša matla a gago?Kwelobohloko ya gago le kgaugelo ya gago di kae?
O re timile tšona.
16 Wena o Tatago rena,Le ge Aborahama a ka se re tsebe,Le Isiraele le yena a ka se re tsebe,Fela wena Jehofa, o Tatago rena.
Yena yo a re rekolotšego ka leina la gagwe go tloga kgale.
17 Wena Jehofa, goreng o re tlogela re aroga ditseleng tša gago?
Goreng o re tlogela re thatafiša dipelo tša rena gomme re sa go boife?
Re gaugele gape hle ka baka la bahlanka ba gago,Bao e lego bohwa bja gago.
18 Setšhaba sa gago se sekgethwa se ile sa dula nageng yeo o se filego yona ka nakwana.
Manaba a rena a gataketše lefelo la gago le lekgethwa.
19 Go tloga kgale re ile ra ba bjalo ka ge eka ga se wa ka wa re buša,Ra ba bjalo ka bao ba sa kago ba bitšwa ka leina la gago.
Mengwalo ya tlase
^ Phetolelo ya lentšu ka lentšu e re, “lerato le le botegago.”
^ Goba, “ba kweša moya wa gagwe o mokgethwa bohloko.”
