Jesaya 7:1-25
7 Kgoši Retsini wa Siria le Peka morwa wa Remalia, e lego kgoši ya Isiraele, ba ile ba tla gore ba tlo lwa le Jerusalema gomme ba se ke ba e fenya. Se se diragetše mehleng ya Kgoši Ahasi morwa wa Jothama, yo e lego morwa wa Usia kgoši ya Juda.
2 Ba ka mošate wa Dafida ba ile ba begelwa gore: “Mašole a Siria a ipopile ngatana e tee le mašole a Efuraime.”
Ke moka Ahasi le setšhaba sa gagwe ba thoma go thothomela go swana le mehlare ya nageng ge e šišinywa ke phefo.
3 Jehofa a botša Jesaya a re: “Ke kgopela gore wena le morwa wa gago Sheara-jashubu le yo gahlana le Ahasi mo go felelago foro yeo e lego tseleng e kgolo yeo e yago mo go šomelago motho yo a hlatswetšago batho diaparo.
4 O mmotše o re: ‘Thekga ditho. O se ke wa tšhoga e bile o se ke wa felelwa ke matla ka baka la dikota tše tše pedi tšeo di lego kgauswi le go swa. O se ke wa tšhošwa ke ge Retsini kgoši ya Siria le morwa wa Remalia ba galefile kudu.
5 Ka gobane Siria le Efuraime le morwa wa Remalia ba go logetše maanomabe gomme ba re:
6 “A re yeng re yo lwa le naga ya Juda re e rathaganye, re e thope e be ya rena e bile re kgethe morwa wa Tabeele gore e be kgoši ya naga yeo.”
7 “‘Mmuši Morena Jehofa o re:
“Seo se ka se kgonege,E bile se ka se direge.
8 Mošate wa Siria ke Damaseko,Gomme mošate wa Damaseko ke Retsini.
Pele mengwaga e 65 e fela,Setšhaba sa Efuraime se tla fedišetšwa sa ruri sa se sa hlwa se eba gona.
9 Mošate wa Efuraime ke Samaria,Gomme kgoši ya Samaria yona ke morwa wa Remalia.
Ge le se na tumelo e tiilegoMmušo wa lena o ka se tie.”’”
10 Jehofa a tšwela pele a bolela le Ahasi a re:
11 “Kgopela nna Jehofa Modimo wa gago gore ke go bontšhe leswao leo o tlago go bona ka lona gore dilo tše di tla direga e le ka nnete. Leswao leo le ka ba le le tlasetlase go swana le Lebitla* goba le le godimodimo go swana le magodimo.”
12 Eupša Ahasi a re: “Nka se kgopele selo seo, e bile nka se leke Jehofa.”
13 Ke moka Jesaya a re: “Theetšang, lena ditlogolwana tša Dafida. Na ga se la kgotsofala ge le tena batho, e bile na le nyaka le go tena Modimo?
14 Ka gona Jehofa yena o tla le nea leswao le: Tsebang gore kgarebe e tla ima, ya belega morwa gomme e tla mo reela leina la Imanuele.
15 Morwa yoo o tla ja potoro le todi ya dinose go fihlela a tseba phapano magareng ga selo se sebe le se sebotse.
16 Le pele mošemane yo a ka tseba go gana se sebe gomme a kgetha se sebotse, go tla be go se gwa šala motho nageng ya dikgoši tše pedi tšeo o di boifago.
17 Jehofa o tla dira gore wena, setšhaba sa gago le ba ntlo ya tatago le welwe ke masetlapelo ao a sa kago a ba gona ge e sa le Efuraime e hlanogela Juda, ka gobane o tla romela kgoši ya Asiria gore e le hlasele.
18 “Letšatšing leo Jehofa o tlo letša molodi a bitša dintšhi tšeo di lego mafelelong a Noka ya Nile ya Egepeta le dinose tšeo di lego nageng ya Asiria,
19 gomme ka moka di tla tla tša kotama meeding, maswikeng a magolo, mehlašaneng ka moka ya meetlwa le mafelong ka moka ao diphoofolo di nwago meetse.
20 “Letšatšing leo Jehofa o tla diriša kgoši ya Asiria go kota dihlogo tša lena le meriri ya maoto a lena a diriša legare leo le adimilwego ke Ahasi ka mošola wa Noka ya Eforate.
21 “Letšatšing leo motho o tla phološa kgomo e nyenyane mohlapeng wa gagwe le dinku tše pedi.
22 Ka baka la ge go tla be go na le maswi a mantšhi, o tla ja potoro. Ka gobane batho ka moka bao ba šetšego mo nageng ba tla ja potoro le todi ya dinose.
23 “Letšatšing leo mafelo ka moka ao a bego a na le mehlare ya meterebe e 1 000 (sekete) yeo e ka rekwago ka ditšhelete tša silifera tše 1 000 (sekete) a tla mela feela dihlašana tša meetlwa le sekoro.
24 Batho ba tla ya moo ba swere mesebe le bora, ka gobane naga ka moka e tla be e metše mehlašana ya meetlwa le sekoro.
25 Dithaba ka moka tšeo batho ba bego ba tlwaetše go di hlagola ka mogoma, o ka se di batamele ka gobane o tla be o tšhaba mehlašana ya meetlwa le sekoro. Dithaba tšeo di tla fetoga mafelo ao dipoo le dinku di fulago go ona.”
Mengwalo ya tlase
^ Bona Tlhaloso ya Mantšu.
