Jobo 12:1-25
12 Jobo a araba a re:
2 “Ruri lena le batho bao ba tsebago dilo,E bile ge le ehwa, bohlale bja lena bo tla hwa le lena!
3 Eupša le nna go na le dilo tšeo ke di kwešišago,
Ga le mphale ka selo,
Ke mang a sa tsebego dilo tše?
4 Ke segwa le ke bagwera ba ka,Ka gobane ke kgopela thušo go Modimo e bile ke nyaka gore a nkarabe.
Nna motho yo a lokilego le yo a sa solegego ke a kwerwa.
5 Motho yo dilo di mo sepelelago gabotse o nagana gore ga go na selo se sebe seo se ka mo diragalelago,O nagana gore dilo tše mpe di diragalela feela bao ba šetšego ba na le mathata.
6 Ditsotsi di dula ka khutšo magaeng a tšona,Gomme bao ba galefišago Modimo ba šireletšegile,Ke bao ba swerego medingwana ya bona ka diatleng.
7 Eupša botšiša diphoofolo, gomme tšona di tla go ruta,O botšiše le dinonyana tša magodimo, gomme le tšona di tla go botša.
8 Goba o lebelele lefase gabotse, gomme le tla go ruta,O lebelele le dihlapi tša lewatle, gomme le tšona di tla go botša.
9 Gare ga dilo tše ka moka,Ke efe yeo e sa tsebego gore e dirilwe ke Jehofa?
10 Bophelo bja sephedi se sengwe le se sengweLe bja motho yo mongwe le yo mongwe bo ka diatleng tša gagwe.
11 Na tsebe ga e senkasenke mantšu,Go no swana le ge leleme le ekwa tatso ya dijo?
12 Na bohlale ga bo hwetšwe go batšofadi,Le gona na batho bao e lego kgale ba phela ga se bona ba kwešišago bophelo?
13 Modimo o bohlale e bile o na le matla,O na le kwešišo e bile o tla phethagatša dilo tšeo a nyakago go di dira.
14 Ge a phušola selo, se ka se agiwe gape,Ge a ka tswalelela selo, ga go na motho yo a ka se bulago.
15 Ge a sa neše pula, lefase le a oma,Ge a e neša, go ba le mafula mo lefaseng.
16 O na le matla e bile o bohlale,Motho yo a dirago sebe le yo a dirišago batho sebe ke ba gagwe,
17 O tlontlolla ba bohlale,Baahlodi a ba fetoša ditlaela.
18 O tloša diketane tšeo dikgoši di bofilego batho ka tšona,Gomme a tlema dikgoši tšeo ka mapanta mathekeng.
19 O tlontlolla baperisita,A wiša le bao e lego kgale ba buša.
20 O tswalela melomo ya baeletši bao ba tshepegago,Bakgalabje bona a ba tšeela bohlale.
21 O dira gore batho bao ba hlomphegago ba nyatšege,Gomme bao ba nago le matla o dira gore ba fokole.
22 O utolla diphiri tša ka maswiswing,Gomme leswiswi le lesoleso a le hlabišetša seetša.
23 O dira gore ditšhaba di be le matla, gomme ka morago a di fediša.E bile o oketša ditšhaba, gomme ka morago a di iša bothopša.
24 O dira gore baetapele ba ditšhaba e be ditlaela,E bile o dira gore ba ralale leganateng.
25 Ba phopholetša leswiswi moo go se nago seetša,O dira gore ba thekesele go swana le ditagwa.
