Jobo 2:1-13
2 Ka morago ga moo go ile gwa tla letšatši la gore barongwa ba tle ba eme pele ga Jehofa, gomme Sathane le yena a tsena gona moo gare ga bona gore a tle a eme pele ga Jehofa.
2 Ke moka Jehofa a botšiša Sathane a re: “O tšwa kae?” Sathane a araba Jehofa a re: “Ke tšo itshepelela le lefase ke eya kua le kua.”
3 Jehofa a re go Sathane: “Na o bone mohlanka wa ka Jobo? Ga go na motho yo a swanago le yena lefaseng. Ke monna yo a lokilego le yo a tshepegago, yo a ntlhomphago kudu le yo a tšhabago go dira dilo tše mpe. Yena o sa dutše a tshepega ka pelo ka moka le ge o leka go ntira gore ke mo hlafišetše bophelo ntle le lebaka.”
4 Eupša Sathane a araba Jehofa a re: “Letlalo ka letlalo. Motho a ka dira selo se sengwe le se sengwe e le gore a phološe bophelo bja gagwe.
5 Bjale wena otlolla seatla sa gago o mo kweše bohloko mmeleng, gomme o tla go roga a le mo pele ga gago.”
6 Jehofa a re go Sathane: “O ka dira selo se sengwe le sengwe seo o se nyakago ka yena eupša o se ke wa mmolaya.”
7 Ka gona Sathane a tloga pele ga Jehofa, gomme a otla Jobo ka dišo tše bohloko go tloga leotong go fihla hlogong.
8 Ke moka Jobo a tšea karolwana ya moeta wo o pšhatlegilego gore a ingwaye ka yona, gomme a yo dula meloreng.
9 Mafelelong mosadi wa gagwe a re go yena: “Na o sa dutše o tshepega ka pelo ya gago ka moka? Roga Modimo o hwe!”
10 Eupša Jobo a re go mosadi wa gagwe: “O bolela bjalo ka basadi ba go se nagane. Ge e ba re amogela dilo tše dibotse go tšwa go Modimo wa nnete, na ga se ra swanela go amogela le tše mpe?” Le ge Jobo a diragaletšwe ke dilo tše ka moka, ga se a ka a bolela le ge e ka ba selo setee se sebe.
11 Bagwera ba bararo ba Jobo e lego Elifase wa go tšwa Themane, Bilidada wa go tšwa Shua le Tsofara wa go tšwa Naama, ba ile ba kwa ka mathata ka moka ao a mo wetšego. Ka gona, yo mongwe le yo mongwe wa bona o ile a tloga mo a dulago, ka ge ba kwane gore ba kopane ba ye go Jobo gore ba yo lla le yena le go mo homotša.
12 Erile ge ba bona Jobo ba sa le kgole, ba se mo tsebe. Ke moka ba thoma go llela godimo, le go gagola diaparo tša bona e bile ba gašetša mobu godimo gomme wa ba tšhela dihlogong.
13 Ba dula le yena moo fase ka matšatši a šupago le mašego a šupago, go se na le yo a ntšhago le lentšu, ka gobane ba be ba bona gore o kwa bohloko kudu.
