Jobo 22:1-30
22 Elifase wa go tšwa Themane a araba Jobo a re:
2 “Na motho a ka hola Modimo?
Na motho le ge e le ofe yo a nago le temogo a ka hola Modimo?
3 Na Ramatlaohle o na le taba le gore wena o lokile,Goba na go na le ka mokgwa wo a holegago ka gona ka gobane wena o botega?
4 Na o tla go otla,Le gona na o tla go ahlola ka gobane o mo hlompha?
5 Na ga se a go otla ka gobane o dira dilo tše mpe kudu,E bile melato ya gago e ka se fele?
6 O amoga banabeno dilo wa di swarelela ntle le lebaka,E bile o tšeela batho diaparo wa ba tlogela ba hloboletše.
7 Yo a lapilego ga o mo fe meetse,Gomme yo a swerwego ke tlala o mo tima dijo.
8 Naga ke ya yo a nago le matla,E bile go yona go dula motho yo a ratwago.
9 Wena o bušeditše bahlologadi morago ba lekeleditše diatla,E bile o gobaditše ditšhiwana.
10 Ke ka baka leo go lego bjalo ka ge eka melaba e go dikologile,Gomme dikotsi tša kapejana di a go tšhoša.
11 Ke ka baka leo go nago le leswiswi le leso moo o sa kgonego le go bona,Gomme o tšewa ke mafula.
12 Na Modimo ga a godimodimo magodimong?
Le gona bona gore dinaledi ka moka di godimodimo.
13 Eupša wena o itše: ‘Modimo o tseba’ng?
Na a ka ahlola a širilwe ke leswiswi le lesoleso?
14 Maru a a mo šira,Ka gona ge a sepela karolong ya godimodimo ya legodimong ga a kgone go re bona.
15 Na o tla sepela tseleng ya kgale,Yeo batho ba babe ba sepetšego go yona,
16 E lego batho bao ba hwilego kapela,Go swana le ntlo yeo fantešeni ya yona e gogotšwego ke mafula?
17 Ba be ba botša Modimo wa nnete ba re: ‘Re tlogele!’
E bile ba re: ‘Ramatlaohle a ka re dira’ng?’
18 Eupša ke yena a tladitšego dintlo tša bona ka dilo tše dibotse,
(Dikgopolo tša bona tše mpe, ga ke di nagane le gatee).
19 Baloki ba tlo bona batho ba babe ba fedišwa gomme ba thaba,Motho yo a se nago molato o tla kwera batho ba babe a re:
20 ‘Bao ba re ganetšago ba fedišitšwe,Gomme mollo o tla fiša dilo tša bona tšeo di šetšego.’
21 Tseba Modimo gomme o tla ba le khutšo,Ke moka o tla diragalelwa ke dilo tše dibotse.
22 Amogela molao wa gagwe,Gomme o tsenye mantšu a gagwe pelong ya gago.
23 Ge e ba o ka boela go Ramatlaohle, dilo di tla boela tša go sepelela gabotse.Ge e ba o ka tloša dilo tše mpe tenteng ya gago,
24 Le gona ge e ba o ka lahlela gauta ya gago leroleng,Gomme gauta ya maemo a godimo* wa e lahlela meeding yeo e tletšego maswika,
25 Gona Ramatlaohle o tla ba bjalo ka gauta ya gago,Gomme a ba bjalo ka silifera ya gago e botsebotse.
26 Ke moka o tla thaba ka baka la Ramatlaohle,Gomme wa emišetša sefahlego sa gago go Modimo o sa tšhabe selo.
27 O tla mo rapela gomme yena o tla go kwa,Ke moka wa kgona go phetha dikeno tša gago.
28 Selo se sengwe le se sengwe seo o nyakago go se dira se tla atlega,Gomme seetša se tla bonegela tsela ya gago.
29 Ka gobane o tla tlontlollwa ge o ikgogomoša,Eupša Modimo o tla phološa bao ba ikokobeditšego.
30 Yena o tla phološa bao ba se nago molato,Ka gona ge e ba o se na molato le wena o tla phološwa.”
Mengwalo ya tlase
^ Goba, “gauta ya kua Ofira.” Gauta ya maemo a godimo e be e hwetšwa lefelong le.
