Jobo 23:1-17
23 Jobo a araba a re:
2 “Gaešita le lehono ke tla no tšwela pele ke belaela,Ga ke na matla ka baka la ge ke tshwenyegile.
3 Ge nkabe ke tseba moo nka hwetšago Modimo,
Ke be ke tla ya moo a dulago gona.
4 Ke tla bolela pele ga Modimo gore ke ka baka la eng ke se na molato,Gomme ka nea mabaka a mantšhi a go ikemelela.
5 Ke be ke tlo tseba kamoo a bego a tlo nkaraba ka gona,Gomme ka theetša seo a mpotšago sona.
6 Na o be a tla lwa le nna a diriša matla a gagwe a magolo?
Aowa! Yena o be a tla ntheetša.
7 Gona moo moloki o be a tla lokiša ditaba le Modimo,Gomme moahlodi wa ka o be a ka se sa mpona molato.
8 Ge ke eya ka bohlabela, ga ke mo hwetše,Le gona ge ke eya ka bodikela, ga ke mo hwetše.
9 Ge ke eya ka go le letshadi moo Modimo a šomago gona, ga ke mmone.Ge ke retologela ka go le letona, le gona ga ke mmone.
10 Eupša yena o tseba tsela yeo ke e tšerego.
Ka morago ga ge a ntekile, ke tla tšwa ke swana le gauta yeo e hlwekilego.
11 Ke mo ekišitše mo e ka bago dilong ka moka,Ka sepela tseleng ya gagwe ke sa aroge.
12 Ga se ka tshela ditaelo tšeo a nneilego tšona.
Ke latetše melao ya gagwe go feta kamoo a bego a ntaetše ka gona.
13 Ge a ikemišeditše go dira selo, ke mang yo a ka mo ganetšago?
Ge a nyaka go dira selo, o a se dira.
14 Ka gobane o tla dira ka mo go feletšego seo a ikemišeditšego go se dira ka nna,Gomme go na le dilo tše dintšhi tša go swana le tše tšeo a di nagannego.
15 Ke ka baka leo ke tshwenyegilego ka baka la gagwe.Ge ke nagana ka yena ke tšhoga kudu.
16 Modimo o dirile gore ke felelwe ke matla ka go ntšhoša,Gomme Ramatlaohle o dirile gore ke boife.
17 Eupša le leswiswi le lesoleso ga se la dira gore ke homole,Le ge le nkhupeditše sefahlego.
