Jobo 24:1-25
24 “Ke ka baka la’ng Ramatlaohle a se a bea letšatši la kahlolo,
Ke ka baka la’ng bao ba mo tsebago ba se ba bona letšatši la gagwe?
2 Batho ba šuthiša mellwane,Ba utswa mehlape ya dinku gomme ba e diša.
3 Ba tšea ditonki tša ditšhiwana,Gomme ba tšea poo ya mohlologadi ba e swara go fihlela a ba patela.
4 Ga ba dumelele badiidi go sepela tseleng.Batho bao ba hlakago ba swanelwa ke go iphihla ka baka la bona.
5 Badiidi ba tšama ba nyaka dijo go swana le ditonki tša nageng kua lešokeng,Ba nyakela bana ba bona dijo kua leganateng.
6 Ba swanelwa ke go yo buna tšhemong ya motho yo mongwe,E bile ba topelela dilo tšeo di šetšego mašemong a diterebe a motho yo mobe.
7 Ba lala ba hlobotše ba se na diaparo,Ga go na seo ba ka se aparago ge go tonya.
8 Ba kolobišwa ke pula ya matlorotloro dithabeng,Ba kgomarela maswika ka ge go se na mo ba ka tšhabelago gona.
9 Tšhiwana ba e tšea e sa nyanya letswele la mmago yona,Gomme ba tšea diaparo tša modiidi ba di swara go fihlela a tlo ba patela.
10 Ba ba gapeletša go sepela ba hlobotše ba se na diaparo,E bile ba rwala dingata tša mabele ba swerwe ke tlala.
11 Ba šoma ka thata gare ga maboto go fiša tšhiritšhiri,Ba gata diterebe ka maoto gore ba dire beine, eupša ba swarwa ke lenyora.
12 Batho bao ba hwago motseng ba a tsetsela.Bao ba gobetšego kudu ba lla ba nyaka thušo,Eupša Modimo ga a bone seo e le phošo.
13 Go na le bao ba hloilego seetša,Ga ba tsebe ditsela tša sona,E bile ga ba sepele ditseleng tša sona.
14 Mmolai o tsoga mosegare,O bolaya mohlaki le modiidi ga sehlogo.Bošego o fetoga lehodu.
15 Sehlotlolo se letela gore e be leswiswi,Se re: ‘Ga go na yo a tlago go mpona!’
Se ikhupetša sefahlego.
16 Ge e le leswiswi, mahodu a thuba ka dintlong,Mosegare a itswalelela ka dintlong.
Ga a rate seetša.
17 A a boifa mesong go no swana le ge batho ba bangwe ba boifa leswiswi,A tlwaetše dilo tšeo di tšhošago batho bošego.
18 Eupša meetse a gogola mahodu ao ka lebelo.
Naga ya ona e tla rogakwa.
A ka se sa boela mašemong a ona a diterebe.
19 Go no swana le ge komelelo le phišo di dira gore meetse a kapoko a ome,Le Lebitla* le tšea bao ba dirilego dibe!
20 Badiradibe ba tla lebalwa ke bommago bona, gomme diboko di tla ipshina ka bona,
Ba ka se sa gopolwa.
Batho ba babe ba tla robja go swana le mohlare.
21 Batho ba babe ba swara mosadi yo a sa belegego gampe,E bile ba tlaiša mohlologadi.
22 Modimo o tla diriša matla a gagwe go fediša batho ba matla,Le ge batho ba babe ba ka ba le maemo a godimo, ga ba tsebe ge e ba ba tla phela goba ba tla hwa.
23 Modimo o ba dumelela gore ba itshepe le go ikwa ba šireletšegile,Eupša o lebeletše selo se sengwe le se sengwe seo ba se dirago.
24 Ba phagamišwa ka nakwana, ke moka ba se sa ba gona.
Ba kokobeditšwe, gomme ba kgoboketšwa go swana le motho yo mongwe le yo mongwe,Ba ripša go etša korong.
25 Bjale ke mang yo a tlago go hlatsela gore ke bolela maaka,Goba a hlatsela gore seo ke se bolelago ke lefeela?”
Mengwalo ya tlase
^ Bona Tlhaloso ya Mantšu.
