Jobo 27:1-23
27 Jobo a tšwela pele a re:
2 “Ke ikana ka Modimo yo a phelago, yena yoo a sego a mpontšha toka,Le gona ke ikana ka Ramatlaohle yo a phelago, yena yoo a ntlhafišeditšego bophelo, ke re:
3 Ge feela ke sa buša moya,Le ge feela moya wa Modimo o sa le ka dinkong tša ka,
4 Nka se bolele dilo tša go se loke,E bile nka se bolele maaka!
5 Nka se tsoge ke boletše gore le lokile!
Ke tla dula ke botegela Modimo go fihlela ke ehwa!
6 Ke tla dula ke dira dilo tša go loka, e bile nka se tsoge ke tlogetše go dira seo.Ge feela ke sa phela, nka se ipone molato.
7 Anke lenaba la ka le fetoge motho yo mobe,Gomme bao ba ntlhaselago ba be bjalo ka batho ba babe.
8 Ka gobane motho yo mobe o na le kholofelo efeGe Modimo a mo fedišitše?
9 Ge e ba a le tlalelong,Na Modimo o tla mo kwa ge a lla a nyaka thušo?
10 Goba na Ramatlaohle o tla dira gore a thabe?
Na o tla dula a rapela Modimo ka dinako ka moka?
11 Ke tla le ruta ka matla a Modimo,Nka se le fihlele selo le setee ka Ramatlaohle.
12 Bonang! Ge e ba ka moka ga lena le kile la bona dipono,Go reng le bolela dilo tša go se re selo?
13 Se ke selo seo Modimo a se neago motho yo mobe,Bohwa bjoo Ramatlaohle a bo neago bao ba nago le matla.
14 Ge e ba barwa ba gagwe e eba ba bantšhi, ba tla bolawa ka sabola,Gomme ditlogolo tša gagwe tša se be le dijo tše di lekanego.
15 Barwa ba gagwe bao ba phologilego ba tla bolawa ke bolwetši bjo bošoro,Gomme basadi ba bona ba ka se ba llele.
16 Le ge a ka kgoboketša silifera e ntšhi bjalo ka ge eka o kgoboketša lerole,Gomme a ba le diaparo tše dintšhi a di kgobela bjalo ka ge eka ke mmoto wa letsopa,
17 Moloki ke yena a tlago go apara diaparo tšeo a di kgobokeditšego,Gomme bao ba se nago molato ba tla abelana silifera ya gagwe.
18 Ntlo yeo a e agago e ka se tie go no swana le ntlo ya serurubele,Le gona ga se ya tia go swana le moriti wo o dirilwego ke motho yo a letilego mašemo.
19 O tla robala a humile, eupša a ka se bune selo,Ge a bula mahlo a gagwe, o tla hwetša go se na selo.
20 Dilo tšeo di mo tšhošago di mo tlela kapejana go swana le mafula,Ledimo la mo tšea bošego.
21 Phefo ya bohlabela e tla mo tšea gomme a se sa ba gona,Ya mo tloša moo a dulago gona.
22 Yena ge a leka go e tšhabela,E tla mo tšubutla e sa mo šokele.
23 Go bjalo ka ge eka phefo yeo e a mo kwera,E bile e a mo tlontlolla a le moo a dulago gona.
